இலங்கைக்கு கடத்த முயன்ற 57 கிலோ போதைப்பொருட்கள் கனடாவில் கைப்பற்றல்: பயணி கைது

கனடாவின் ரொறன்ரோ பியர்சன் சர்வதேச விமான நிலையத்தில் மேற்கொள்ளப்பட்ட தீவிர சோதனையின் போது, இலங்கைக்கு கடத்துவதற்காகப் பயணப் பொதிகளில் மறைத்து வைக்கப்பட்டிருந்த 57 கிலோகிராம் எடையுள்ள போதைப்பொருட்களைக் கனடா எல்லை சேவைகள் முகவரகம் கைப்பற்றியுள்ளது.

பயணி ஒருவரின் பயணப் பெட்டிகளைச் பரிசோதித்தபோதே, அதில் சூட்சுமமாக மறைத்து வைக்கப்பட்டிருந்த 44 கிலோகிராம் கஞ்சா பிசின் (Hashish) மற்றும் 13 கிலோகிராம் கொக்கைன் (Cocaine) ஆகிய அபாயகரமான போதைப்பொருட்கள் கண்டெடுக்கப்பட்டுள்ளன.

இச் சம்பவம் கடந்த செப்டம்பர் 3ஆம் திகதி இடம்பெற்றுள்ள போதிலும், இது தொடர்பான உத்தியோகபூர்வ தகவலை கனடா எல்லை சேவைகள் முகவரகம் செப்டம்பர் 23ஆம் திகதியே பகிரங்கமாக வெளியிட்டது.

கைப்பற்றப்பட்ட போதைப்பொருள் பொட்டலங்கள் மற்றும் மூன்று பயணப் பெட்டிகள் காட்சிப்படுத்தப்பட்டுள்ள புகைப்படங்களையும் எல்லை சேவைகள் முகவரகம் வெளியிட்டுள்ளது.

இச் சம்பவத்துடன் தொடர்புடைய சந்தேகநபர் உடனடியாகக் கைது செய்யப்பட்டு, மேலதிக விசாரணை மற்றும் சட்ட நடவடிக்கைகளுக்காகச் சான்றுகளுடன் ராயல் கனடியன் மவுண்டட் பொலிஸாரிடம் ஒப்படைக்கப்பட்டுள்ளார்.

இருப்பினும், கைது செய்யப்பட்ட நபரின் அடையாளத்தையோ அல்லது அவர் மீது சுமத்தப்பட்டுள்ள குற்றச்சாட்டுகள் குறித்த மேலதிக விபரங்களையோ கனடிய அதிகாரிகள் இதுவரை வெளியிடவில்லை.