ஆந்திர கடற்பகுதியில் 5 சென்னை மீனவர்கள் சடலமாக மீட்பு; 4 பேரைத் தேடும் பணி தீவிரம்

சென்னை மீன்பிடித் துறைமுகத்தில் இருந்து கடலுக்குச் சென்று காணாமல் போன 9 மீனவர்களில் 5 பேர் சடலங்களாக மீட்கப்பட்டுள்ள நிலையில், எஞ்சிய 4 மீனவர்களைத் தேடும் பணிகள் தீவிரப்படுத்தப்பட்டுள்ளன.

ஆந்திர மாநிலம் பிரகாசம் மாவட்டத்திலுள்ள கோதபட்டினம் கடலோரப் பகுதியில் மூன்று மீனவர்களின் சடலங்கள் அடையாளம் காணப்பட்டுள்ளன. மேலும், மீட்கப்பட்ட இரண்டு சடலங்களை அடையாளம் காணும் பணிகள் முன்னெடுக்கப்பட்டு வருகின்றன.

சென்னை மீன்பிடித் துறைமுகத்தில் இருந்து கடந்த ஒக்டோபர் 29ஆம் திகதி கா.பக்கிரிசாமி (49), ம.குப்பன் (48), சே.மோகன் (47), கா.ராஜேஷ் (52), ஆ.முருகன் (48), லா.குப்புசாமி (58), சி.விஜயகாந்த் (44), அ.அரவிந்த் (40), மு.நாராயணன் (57) ஆகிய 9 மீனவர்கள் விசைப்படகு மூலம் மீன்பிடிக்கக் கடலுக்குச் சென்றுள்ளனர்.

இதற்கிடையில், புயல் மற்றும் வானிலை தொடர்பான முன்னெச்சரிக்கை அறிவுறுத்தல்களைத் தொடர்ந்து, அவர்கள் ஆந்திர மாநிலம் நிஜாம்பட்டினம் மீன்பிடித் துறைமுகத்தில் பாதுகாப்பாகத் தங்கியிருந்துள்ளனர்.

இந்நிலையில், கடந்த நவம்பர் 2ஆம் திகதி இரவு ராமாயபட்டினம் துறைமுகத்தை நோக்கிப் பயணித்த அவர்களது படகு, நடுக்கடலில் இயந்திரக் கோளாறு காரணமாக செயலிழந்துள்ளது. இதுகுறித்து, படகிலிருந்த மீனவர்கள் நவம்பர் 3ஆம் திகதி அதிகாலை வயர்லெஸ் தொடர்பு மூலம் மற்றொரு படகிலிருந்த மீனவர்களுக்குத் தகவல் வழங்கியுள்ளனர்.

அதன்பின்னர், காணாமல் போன படகிலிருந்து எந்தவொரு தகவலும் கிடைக்காத நிலையில், தமிழக மற்றும் ஆந்திர மாநில மீன்பிடிப் படகுகள், இந்தியக் கடலோரக் காவல் படைக் கப்பல்கள் ஆகியவற்றின் உதவியுடன் தேடுதல் நடவடிக்கைகள் முன்னெடுக்கப்பட்டன.

இதனிடையே, மீனவர்கள் உயிரிழந்த செய்தி அறிந்து வேதனை அடைந்துள்ளதாகத் தெரிவித்துள்ள தமிழக முதலமைச்சர் விஜய், உயிரிழந்தவர்களின் குடும்பங்களுக்கு ஆழ்ந்த இரங்கலையும் தெரிவித்துள்ளார்.

மேலும், உயிரிழந்த மீனவர்களின் குடும்பங்களுக்கு தலா 7 இலட்சம் ரூபாய் நிவாரண நிதி வழங்கவும், அதில் தலா 2 இலட்சம் ரூபாயை உடனடியாக வழங்கவும் முதலமைச்சர் உத்தரவிட்டுள்ளார்.

அத்துடன், மீட்கப்பட்ட மீனவர்களின் சடலங்களை அரச செலவில் தமிழகத்துக்குக் கொண்டுவந்து குடும்பத்தினரிடம் ஒப்படைக்கவும், அடையாளம் காணப்படாத இரண்டு சடலங்களை அடையாளம் காணும் பணியையும், காணாமல் போன எஞ்சிய நான்கு மீனவர்களைத் தேடும் நடவடிக்கைகளையும் விரைவுபடுத்தவும் அதிகாரிகளுக்கு உத்தரவிடப்பட்டுள்ளது.