“ரீல்ஸ் மூலம் எதையும் கற்றுக்கொள்ள முடியாது” – நடிகர் சூர்யா கருத்து

நவீன தொழில்நுட்ப வளர்ச்சிக்கு மத்தியில் சமூக வலைத்தளங்களில் ரீல்ஸ் பார்ப்பதற்கு மட்டுமே நேரத்தைச் செலவிடாமல், சாதனையாளர்களின் வாழ்க்கைப் பயணங்களை ஆராய்ந்து கற்றுக்கொள்ள வேண்டும் என்று நடிகர் சூர்யா தெரிவித்துள்ளார்.

நடிகர் சிவகுமார் கல்வி அறக்கட்டளையின் 47-வது ஆண்டு விழா, அகரம் பவுண்டேஷன் அலுவலகத்தில் நடைபெற்றது. இந்நிகழ்வில் கல்லூரிகளில் சேர்ந்துள்ள 25 மாணவ, மாணவியருக்கு தலா ரூ.10,000 வீதம் கல்வி ஊக்கத்தொகை வழங்கப்பட்டது.

மேலும், மூத்த ஓவியர் ஜீவானந்தனுக்கு ரூ.1 லட்சம் பொற்கிழியுடன் விருது வழங்கி கௌரவிக்கப்பட்டது. திண்டிவனம் தாய் தமிழ்ப் பள்ளி ஆசிரியர்களின் மாதச் சம்பளப் பங்களிப்புக்காக ரூ.6,28,000 வழங்கப்பட்டது. அத்துடன், ஈரோடு சுடர் அமைப்புக்கு ரூ.2 லட்சமும், வாழை அமைப்புக்கு ரூ.3 லட்சமும் நிதியுதவி வழங்கப்பட்டது.

இந்த நிகழ்ச்சியில் நடிகர் சிவகுமார், மாணவ, மாணவியர், அகரம் பவுண்டேஷன் தன்னார்வலர்கள் மற்றும் சமூக ஆர்வலர்கள் உள்ளிட்ட பலர் கலந்துகொண்டனர்.

“வாழ்க்கையில் முன்னேறிய பிறகு மற்றவர்களையும் உயர்த்த வேண்டும்”

நிகழ்ச்சியில் பேசிய நடிகர் சூர்யா, அகரம் பவுண்டேஷன் தொடங்கப்பட்டு 20 ஆண்டுகள் கடந்துவிட்டதாகக் குறிப்பிட்டார். இதுவரை முதல் தலைமுறையைச் சேர்ந்த மாணவ, மாணவியரின் குடும்பங்களில் சுமார் 7,000 பேரைச் சென்றடைய முடிந்துள்ளதாகவும், அகரம் மூலம் தொடர்ந்து பல்வேறு பணிகள் முன்னெடுக்கப்பட்டு வருவதாகவும் தெரிவித்தார்.

வாழ்க்கையில் முன்னேறி உயர்ந்த நிலையை அடைந்தவர்கள், தங்களுக்குப் பக்கபலமாக இருந்தவர்களையும், தங்களது வளர்ச்சிக்குப் பங்களித்தவர்களையும் மறந்துவிடக் கூடாது என்று அவர் வலியுறுத்தினார். அதேபோல், ஒருவர் வாழ்க்கையில் முன்னேறிய பிறகு, குறைந்தபட்சம் மற்றொருவரையாவது உயர்த்துவதற்கு உதவ வேண்டும் என்றும் குறிப்பிட்டார்.

சாதனையாளர்களின் வாழ்க்கையை ஆராய்ந்து படிக்க வேண்டும்

தொடர்ந்து பேசிய அவர், இன்ஸ்டாகிராம் போன்ற சமூக வலைத்தளங்களில் ரீல்ஸ் பார்ப்பது மட்டுமே ஒருவருக்கு பயனுள்ள அறிவையும் அனுபவத்தையும் அளித்துவிடாது என்றார்.

“ரீல்ஸ் என்பது ஒரு கதைதான். அதைப் பார்த்துக்கொண்டிருப்பதால் மட்டும் நாம் எதையும் கற்றுக்கொள்ள முடியாது. நாம் யாரைப் பின்தொடர்கிறோம் என்பது மிகவும் முக்கியம். கனவு உலகத்திலேயே மூழ்கியிருந்தால், அந்த உலகத்திலேயேதான் நாம் இருந்துகொண்டிருப்போம்” என்று தெரிவித்தார்.

உலகின் முன்னணி தொழிலதிபர்களில் ஒருவரான எலான் மஸ்க் எங்கிருந்து தனது பயணத்தைத் தொடங்கி, இன்று இந்த நிலையை அடைந்தார் என்பதை அறிந்துகொள்ள வேண்டும் என்றும் சூர்யா கூறினார்.

சாதனையாளர்களின் வாழ்க்கையைப் பற்றிய பாட்காஸ்ட்கள், ஆய்வுகள் மற்றும் அவர்களது வெற்றிப் பயணங்கள் குறித்த தகவல்களைத் தேடிப் படிப்பது மாணவர்களுக்கு மிகவும் பயனுள்ளதாக இருக்கும் என்றும் அவர் சுட்டிக்காட்டினார்.

இத்தகைய முயற்சிகள் மாணவர்கள் தங்களுக்குள் இருக்கும் திறமைகளை அடையாளம் கண்டு, அவற்றை வெளிக்கொண்டு வருவதற்கு உதவும் என்றும் நடிகர் சூர்யா தெரிவித்தார்.