உலக சந்தையில் மசகு எண்ணெய் விலை வீழ்ச்சி – விநியோகம் அதிகரிக்கும் என எதிர்பார்ப்பு!
உலக சந்தையில் மசகு எண்ணெயின் விலைகள் திங்கட்கிழமை (16) வீழ்ச்சியடைந்துள்ளன. மத்திய கிழக்கிலிருந்து ஹோர்முஸ் நீரிணை ஊடாக எண்ணெய் ஏற்றுமதி போர் தொடங்குவதற்கு முந்தைய நிலையை அண்மித்துள்ளதுடன், உலகளாவிய எண்ணெய் விநியோகம் அதிகரிக்கும் என்ற எதிர்பார்ப்பும் இந்த விலை வீழ்ச்சிக்குக் காரணமாக அமைந்துள்ளது.
இதன்படி, சர்வதேச சந்தையில் பிரெண்ட் (Brent) ரக மசகு எண்ணெய் பீப்பாய் ஒன்றின் விலை 47 சதங்களால் (0.49%) குறைந்து 95.37 அமெரிக்க டொலராகப் பதிவாகியுள்ளது.
அதேவேளை, அமெரிக்காவின் வெஸ்ட் டெக்சாஸ் இன்டர்மீடியட் (WTI) ரக மசகு எண்ணெய் பீப்பாய் ஒன்றின் விலை 23 சதங்களால் (0.26%) வீழ்ச்சியடைந்து 88.33 அமெரிக்க டொலராகப் பதிவாகியுள்ளது.
அமெரிக்கா மற்றும் இஸ்ரேல் - ஈரான் இடையிலான போர் காரணமாக அதிகரித்திருந்த புவிசார் அரசியல் பதற்றங்கள் தணிவதற்கான அறிகுறிகள் தென்படுவதும் எண்ணெய் விலையில் தாக்கத்தை ஏற்படுத்தியுள்ளதாகத் தெரிவிக்கப்படுகிறது.
சர்வதேச எரிசக்தி முகவரகத்தின் (IEA) கணிப்பின்படி, இந்த ஆண்டின் நான்காவது காலாண்டில் உலக எண்ணெய் சந்தையில் தேவையை விட விநியோகம் அதிகரித்து உபரி நிலை உருவாகும் என எதிர்பார்க்கப்படுகிறது.
அந்தக் காலப்பகுதியில் நாளாந்த எண்ணெய் விநியோகம் சராசரியாக 105 மில்லியன் பீப்பாய்களாக இருக்கும் எனவும், இது எதிர்பார்க்கப்படும் தேவையை விட நாளொன்றுக்கு 1.7 மில்லியன் பீப்பாய்கள் அதிகமாகும் எனவும் அந்த முகவரகம் தெரிவித்துள்ளது.
மேலும், அவசரகால எண்ணெய் கையிருப்பிலிருந்து வெளியிடுவதற்கு மார்ச் மாதம் உறுதியளிக்கப்பட்ட எண்ணெயில், எதிர்வரும் பெப்ரவரி மாத இறுதிக்குள் 71 மில்லியன் பீப்பாய்கள் சந்தைக்கு கிடைக்கச் செய்யப்படும் என்றும் தெரிவிக்கப்பட்டுள்ளது. இதில் 15 மில்லியன் பீப்பாய்கள் டீசல் எரிபொருளாகும்.
இதற்கிடையில், அமெரிக்க ஜனாதிபதி டொனால்ட் ட்ரம்ப், அமெரிக்க துறைமுகங்களுக்கு இடையில் வெளிநாட்டுக் கொடிகளைத் தாங்கிய கப்பல்கள் எரிபொருட்களை எடுத்துச் செல்ல அனுமதிக்கும் வகையில், ஜோன்ஸ் சட்டத்தின் (Jones Act) தற்காலிக விலக்கை மேலும் 90 நாட்களுக்கு நீடித்துள்ளார்.
இந்த நடவடிக்கை அமெரிக்காவுக்குள் எண்ணெய் மற்றும் எரிபொருட்களை எடுத்துச் செல்லக்கூடிய கப்பல்களின் எண்ணிக்கையை அதிகரிப்பதுடன், விநியோகத்தை மேலும் இலகுவாக்கும் என எதிர்பார்க்கப்படுகிறது.
எனினும், ஹோர்முஸ் நீரிணை ஊடாக எண்ணெய் ஏற்றிச் செல்லும் கப்பல்கள் எதிர்கொள்ளும் பாதுகாப்பு அச்சுறுத்தல்கள் காரணமாக கப்பல் போக்குவரத்துக் கட்டணங்கள் தொடர்ந்து அதிகமாகவே உள்ளன.
இந்நிலையில், ஹோர்முஸ் நீரிணைக்கு கிழக்கே கடற்படை கண்ணிவெடியில் மோதிய எண்ணெய் கப்பலொன்று தீப்பற்றியுள்ளதாக ஈரான் கடற்படை ஞாயிற்றுக்கிழமை இரவு அறிவித்துள்ளது. ஈரானின் அரச ஊடகங்கள் இந்தத் தகவலை வெளியிட்டுள்ளன.
எனினும், இந்தச் சம்பவம் தொடர்பான தகவல்களை ரொய்ட்டர்ஸ் செய்தி நிறுவனம் சுயாதீனமாக உறுதிப்படுத்தவில்லை.