இஸ்ரேல் தேர்தல் முடிவுகள்: நெதன்யாகுவின் கூட்டணி முன்னிலை!

இஸ்ரேல் நாடாளுமன்றத் தேர்தலில் 56 சதவீத வாக்குகள் எண்ணப்பட்டுள்ள நிலையில், பிரதமர் பெஞ்சமின் நெதன்யாகுவின் அரசியல் கூட்டணி 55 ஆசனங்களைப் பெற்று முன்னிலையில் உள்ளதாகத் தெரிவிக்கப்பட்டுள்ளது.

அல் ஜசீரா வெளியிட்டுள்ள சமீபத்திய தேர்தல் நிலவரங்களின்படி, 120 உறுப்பினர்களைக் கொண்ட இஸ்ரேல் நாடாளுமன்றத்தில் (க்னெசெட்) நெதன்யாகுவின் கூட்டணி 55 ஆசனங்களைப் பெற்றுக்கொள்ளும் என எதிர்பார்க்கப்படுகிறது.

எதிர்க்கட்சிகள் 49 ஆசனங்களையும், அரபு தலைமையிலான கட்சிகள் எஞ்சிய 16 ஆசனங்களையும் கைப்பற்றும் எனக் கணிக்கப்பட்டுள்ளது. இஸ்ரேலின் மத்திய தேர்தல் குழு வெளியிட்டுள்ள தரவுகளின்படி, இதுவரை சுமார் 28 இலட்சம் வாக்குகள் எண்ணப்பட்டுள்ளன. இது மொத்த வாக்குகளில் 56 சதவீதமாகும்.

லிகுட் கட்சி முன்னிலை

தேர்தல் களத்தில் நெதன்யாகுவின் லிகுட் கட்சி தனிப்பெரும் கட்சியாகத் தொடர்ந்து முன்னிலையில் உள்ளது. அக்கட்சி இதுவரை 20.7 சதவீத வாக்குகளைப் பெற்றுள்ளதாகத் தெரிவிக்கப்பட்டுள்ளது.

முன்னாள் இராணுவத் தளபதி காடி ஐசன்கோட்டின் யாஷார் கட்சி 16.7 சதவீத வாக்குகளுடன் இரண்டாவது இடத்திலும், முன்னாள் பிரதமர் நஃப்தாலி பென்னட்டின் 'டுகெதர்' (Together) கூட்டணி 9 சதவீத வாக்குகளுடன் மூன்றாவது இடத்திலும் உள்ளன.

ஆட்சி அமைப்பதில் நெருக்கடி?

நெதன்யாகுவின் கூட்டணி தேர்தலில் முன்னிலை வகித்தாலும், நாடாளுமன்றத்தில் பெரும்பான்மையைப் பெற்று அரசாங்கத்தை அமைப்பதற்குத் தேவையான 61 ஆசனங்களை விட ஆறு ஆசனங்கள் குறைவாகவே காணப்படுகின்றன.

இதனால், அடுத்த அரசாங்கத்தை அமைப்பதில் ஏனைய கட்சிகளுடன் மேற்கொள்ளப்படும் கூட்டணி பேச்சுவார்த்தைகள் முக்கிய பங்கு வகிக்கும் என எதிர்பார்க்கப்படுகிறது.

நெதன்யாகுவின் தலைமைத்துவம், காஸா போர், பிராந்திய பாதுகாப்பு மற்றும் 2023 ஒக்டோபர் 7ஆம் திகதி இடம்பெற்ற தாக்குதல்கள் தொடர்பான பொறுப்புக்கூறல் கோரிக்கைகள் உள்ளிட்ட விவகாரங்களால் இஸ்ரேலில் அரசியல் பிளவுகள் தீவிரமடைந்துள்ள பின்னணியில் இந்தத் தேர்தல் நடைபெற்றுள்ளது.

எவ்வாறாயினும், தற்போது வெளியாகியுள்ள தேர்தல் முடிவுகள் ஆரம்பகட்டத் தரவுகளாகவே உள்ளன. வாக்கு எண்ணிக்கை தொடர்ந்து நடைபெறுவதால், கட்சிகளின் ஆசன எண்ணிக்கைகளில் மாற்றங்கள் ஏற்படக்கூடும் எனத் தெரிவிக்கப்பட்டுள்ளது.