2027 பாடநூல் அச்சிடலுக்கு ரூ. 1.61 பில்லியன்: 21 நிறுவனங்களுக்கு ஒப்பந்தம்

2027ஆம் கல்வியாண்டில் மாணவர்களுக்கு இலவசமாக விநியோகிப்பதற்காகத் தேவையான பாடநூல்கள் மற்றும் கற்றல் தொகுதிகளை அச்சிடும் பணிக்காக, 21 அச்சிடும் நிறுவனங்களுக்கு 1,614.69 மில்லியன் ரூபாய் பெறுமதியான ஒப்பந்தங்களை வழங்குவதற்கு அரசாங்கம் அனுமதி அளித்துள்ளது.

இத்திட்டத்தின் முதற்கட்டத்தின் கீழ், 1, 2 மற்றும் 6ஆம் தர மாணவர்களுக்குத் தேவையான கற்றல் தொகுதிகள் உட்பட 421 வகையான பாடநூல்களும் கற்றல் தொகுதிகளும் அச்சிடப்படவுள்ளன.

தேசிய போட்டிமுறை கொள்முதல் நடைமுறையின் கீழ், கல்வி வெளியீட்டுத் திணைக்களத்தினால் அச்சிடும் நிறுவனங்களைத் தேர்ந்தெடுப்பதற்காகக் கோரப்பட்ட ஏலங்களில் (Bids) மொத்தம் 31 விண்ணப்பங்கள் சமர்ப்பிக்கப்பட்டிருந்தன.

குறித்த விண்ணப்பங்களை மதிப்பீடு செய்த பின்னர், உயர் மட்ட நிலையான கொள்முதல் குழுவின் பரிந்துரைகளின் அடிப்படையில், தகுதிபெற்ற 21 அச்சிடும் நிறுவனங்களுக்கு இந்த ஒப்பந்தங்களை வழங்குவதற்கு தீர்மானிக்கப்பட்டுள்ளது.

வழங்கப்படவுள்ள ஒப்பந்தங்களின் மொத்தப் பெறுமதியான 1.614 பில்லியன் ரூபாயில் பெறுமதி சேர்க்கப்பட்ட வரி (VAT) சேர்க்கப்படவில்லை என்பது குறிப்பிடத்தக்கது.

கல்வி, உயர்கல்வி மற்றும் தொழிற்கல்வி அமைச்சராகப் பொறுப்பு வகிக்கும் பிரதமரினால் சமர்ப்பிக்கப்பட்ட இந்த அச்சிடல் ஒப்பந்தங்களுக்கான அமைச்சரவைப் பத்திரத்திற்கே இவ்வாறு அமைச்சரவையின் ஒப்புதல் வழங்கப்பட்டுள்ளது.