2027ஆம் ஆண்டு வரவு - செலவுத் திட்டத்தில் மேலும் வரிக்குறைப்புகள் – ஜனாதிபதி அநுர குமார அறிவிப்பு!

2027ஆம் ஆண்டுக்கான வரவு - செலவுத் திட்டத்தில் மேலும் சில வரிகளைக் குறைக்க அரசாங்கம் திட்டமிட்டுள்ளதாக ஜனாதிபதி அநுர குமார திஸாநாயக்க தெரிவித்துள்ளார்.

எனினும், இந்த வரிக்குறைப்புகள் அரசாங்கத்தின் வருமான இலக்குகளைப் பாதிக்காத வகையில் முன்னெடுக்கப்படும் என்றும் அவர் குறிப்பிட்டுள்ளார்.

நாட்டின் பொருளாதாரச் செயல்திறன் தொடர்பில் கருத்துத் தெரிவிக்கும்போதே ஜனாதிபதி இதனைத் தெரிவித்துள்ளார்.

தற்போதைய அரசாங்கம் ஆட்சிக்கு வந்த பின்னர் இதுவரை எந்தவொரு புதிய வரியையும் அறிமுகப்படுத்தவில்லை என்றும், மாறாக ஏற்கனவே நடைமுறையில் இருந்த சில வரிகள் குறிப்பிடத்தக்க அளவில் குறைக்கப்பட்டுள்ளதாகவும் அவர் சுட்டிக்காட்டியுள்ளார்.

மேலும், எதிர்வரும் வரவு - செலவுத் திட்டத்திலும் சில வரிகளைக் குறைக்க நடவடிக்கை எடுக்கப்படும் எனவும் ஜனாதிபதி தெரிவித்துள்ளார்.

கடந்த கால அரசாங்கங்கள் தமது வருமான இலக்குகளை அடைவதில் தொடர்ச்சியாகத் தோல்வியடைந்ததாகவும், எதிர்பார்க்கப்பட்ட வருமானத்தில் சுமார் 90 சதவீதத்தையே பெரும்பாலும் பெற்றுக்கொண்டதாகவும் அவர் குறிப்பிட்டுள்ளார்.

ஆனால், தற்போதைய அரசாங்கம் எதிர்பார்க்கப்பட்ட வருமான இலக்குகளைத் தாண்டி வருமானத்தைப் பெற்றுக்கொண்டுள்ளதாகவும், அதேவேளை முதன்மை வரவு - செலவுத் திட்ட உபரியையும் பேணிவருவதாகவும் ஜனாதிபதி தெரிவித்துள்ளார்.

இந்த முதன்மை உபரியானது, காலப்போக்கில் நாட்டின் கடன் சுமையைக் குறைப்பதற்கு உதவும் என்றும் அவர் நம்பிக்கை வெளியிட்டுள்ளார்.

இதேவேளை, அதிகரித்துவரும் பணவீக்கம் காரணமாகப் பொருட்கள் மற்றும் சேவைகளின் விலைகள் உயர்ந்து, பொதுமக்களின் குடும்பப் பொருளாதாரத்தில் மேலதிக அழுத்தங்களை ஏற்படுத்தியுள்ளதையும் ஜனாதிபதி ஏற்றுக்கொண்டுள்ளார்.

மத்திய கிழக்கில் தொடரும் மோதல்கள் மற்றும் சர்வதேச விநியோகப் பாதைகளில் ஏற்பட்டுள்ள இடையூறுகளே இந்தப் பணவீக்க அழுத்தங்களுக்கு முக்கிய காரணங்களில் ஒன்றாக அமைந்துள்ளதாகவும் அவர் தெரிவித்துள்ளார்.