பொதுநலவாய உச்சி மாநாட்டில் இலங்கைத் தூதுக்குழுவுக்குத் தலைமை தாங்கும் பிரதமர் ஹரிணி!

இலங்கையின் பிரதமர் கலாநிதி ஹரிணி அமரசூரிய, 2026ஆம் ஆண்டுக்கான 28ஆவது பொதுநலவாய நாடுகளின் அரச தலைவர்கள் மாநாட்டில் (CHOGM 2026) பங்கேற்கும் இலங்கைத் தூதுக்குழுவுக்குத் தலைமை தாங்கவுள்ளார்.

எதிர்வரும் நவம்பர் 1ஆம் திகதி முதல் 4ஆம் திகதி வரை அன்டிகுவா மற்றும் பார்புடாவின் தலைநகரான சென். ஜோன்ஸில் இந்த மாநாடு நடைபெறவுள்ளது.

வெளிவிவகார, வெளிநாட்டு வேலைவாய்ப்பு மற்றும் சுற்றுலாத்துறை அமைச்சு வெளியிட்டுள்ள தகவலின்படி, பொதுநலவாய அமைப்பின் 56 உறுப்பு நாடுகளின் தலைவர்கள் பங்கேற்கும் இந்த மாநாடு, 'செழிப்பான பொதுநலவாயத்திற்கான கூட்டாண்மை மற்றும் முதலீடுகளை விரைவுபடுத்துதல்' என்ற தொனிப்பொருளில் நடைபெறுகிறது.

இந்த மாநாட்டின் போது நடைபெறும் முக்கிய அமர்வுகள் மற்றும் தலைவர்களின் விசேட கலந்துரையாடல்களில் பிரதமர் ஹரிணி அமரசூரிய பங்கேற்கவுள்ளார்.

இதன்போது பொருளாதார ஒத்துழைப்பு, முதலீடுகளை ஊக்குவித்தல், டிஜிட்டல் மாற்றம், இளைஞர் வலுவூட்டல், காலநிலை மாற்றம் மற்றும் நல்லாட்சி உள்ளிட்ட விடயங்களில் இலங்கையின் முன்னுரிமைகள் தொடர்பில் அவர் எடுத்துரைக்கவுள்ளார்.

அத்துடன், பல்வேறு நாடுகளின் அரச தலைவர்கள், அரசாங்கத் தலைவர்கள், அரசியல் பிரதிநிதிகள் மற்றும் வர்த்தகத் தலைவர்களையும் சந்தித்து இருதரப்பு கலந்துரையாடல்களை நடத்தவுள்ளார்.

இந்தச் சந்திப்புகள் ஊடாக இலங்கையின் இராஜதந்திர உறவுகள், வர்த்தகத் தொடர்புகள் மற்றும் அபிவிருத்திக் கூட்டாண்மைகளை மேலும் வலுப்படுத்த எதிர்பார்க்கப்படுகிறது.

மேலும், பொதுநலவாய பெண்கள் மன்றம், பொதுநலவாய தலைவர்கள் மற்றும் நிறுவனங்களின் பிரதம நிறைவேற்று அதிகாரிகளுக்கான முதலீட்டு உச்சி மாநாடு, உலகளாவிய கண் சுகாதார உச்சி மாநாடு ஆகிய நிகழ்வுகளிலும் பிரதமர் உரையாற்றவுள்ளார்.

முதலீடுகளை அடிப்படையாகக் கொண்ட பொருளாதார வளர்ச்சி, பெண்களின் வலுவூட்டல் மற்றும் உலகளாவிய சுகாதார ஒத்துழைப்பு ஆகியவற்றில் இலங்கையின் நிலைப்பாடுகளையும் முன்னுரிமைகளையும் பிரதமரின் இந்தப் பங்கேற்பு வெளிப்படுத்தும் என வெளிவிவகார அமைச்சு தெரிவித்துள்ளது.