12.35 இலட்சம் ரூபாய் லஞ்சம் பெற்ற சிறைச்சாலை உதவி அத்தியாட்சகர் கைது

திருகோணமலை விளக்கமறியல் சிறைச்சாலையின் உதவி அத்தியாட்சகர் 12 இலட்சத்து 35 ஆயிரம் ரூபாய் லஞ்சப் பணத்தைப் பெற்றுக் கொண்ட குற்றச்சாட்டில் கைது செய்யப்பட்டுள்ளார்.

இலஞ்சம் அல்லது ஊழல் பற்றிய குற்றச்சாட்டுகளைப் புலனாய்வு செய்வதற்கான ஆணைக்குழுவின் (CIABOC) அதிகாரிகளினால் இக்கைது நடவடிக்கை முன்னெடுக்கப்பட்டுள்ளது.

சிறைச்சாலையிலுள்ள தடுத்து வைக்கப்பட்டுள்ள கைதிகளுக்கு உலர் உணவுப் பொருட்களை விநியோகிக்கும் விநியோகஸ்தர் ஒருவரிடமிருந்தே குறித்த அதிகாரி இந்த லஞ்சப் பணத்தைக் கோரியுள்ளதாகத் தெரிவிக்கப்படுகிறது.

சிறைச்சாலை காவலர் ஒருவரின் ஊடாகவே குறித்த உதவி அத்தியாட்சகர் 1,235,000 ரூபாய் பணத்தைக் கோரிப் பெற்றுக்கொண்ட நிலையில் கைது செய்யப்பட்டுள்ளார்.

இச்சம்பவம் தொடர்பான மேலதிக விசாரணைகளை இலஞ்ச ஊழல் ஆணைக்குழுவின் அதிகாரிகள் தீவிரமாக முன்னெடுத்து வருகின்றனர்.