ஷாருக்கானின் ‘King’ திரைப்படம் – வெளிநாட்டு விநியோக உரிமை ரூ.175 கோடிக்கு விற்பனை!

பொலிவூட் சூப்பர் ஸ்டார் ஷாருக்கான் நடிப்பில் உருவாகிவரும் ‘King’ திரைப்படம், வெளிநாட்டு திரையரங்கு விநியோக உரிமையை இந்திய ரூபாய் 175 கோடிக்கு விற்பனை செய்து புதிய சாதனை படைத்துள்ளதாகத் தெரிவிக்கப்படுகிறது.

NDTV Profit வெளியிட்டுள்ள தகவலின்படி, துபாயைத் தளமாகக் கொண்ட Phars Films நிறுவனம், இத்திரைப்படத்தின் சர்வதேச திரையரங்கு விநியோக உரிமையை 175 கோடி இந்திய ரூபாய் (1.75 பில்லியன் ரூபாய்) குறைந்தபட்ச உத்தரவாதத் தொகை (Minimum Guarantee) அடிப்படையில் பெற்றுள்ளது.

இந்தியத் திரைப்படமொன்றுக்கு வெளிநாட்டு விநியோக உரிமைக்காக வழங்கப்பட்டுள்ள மிக உயர்ந்த குறைந்தபட்ச உத்தரவாதத் தொகை இதுவெனக் கூறப்படுகிறது. இதற்கு முன்னர் எந்தவொரு இந்தியத் திரைப்படமும் இவ்வாறான ஒப்பந்தத்தில் 100 கோடி இந்திய ரூபாயைக் கடந்ததில்லை எனத் தெரிவிக்கப்படுகிறது.

இதுவரை ஷாருக்கானின் ‘Pathaan’, ‘Jawan’, ‘Dunki’ உள்ளிட்ட வெற்றித் திரைப்படங்களின் வெளிநாட்டு விநியோகப் பணிகளைக் கையாண்ட Yash Raj Films நிறுவனத்திடமிருந்து, அந்தப் பொறுப்பை Phars Films நிறுவனம் ஏற்கவுள்ளதாகவும் தகவல்கள் தெரிவிக்கின்றன.

புதிய ஒப்பந்தத்தின் அடிப்படையில், மத்திய கிழக்கு நாடுகளில் திரைப்படத்தின் விநியோகத்தை Phars Films நேரடியாகக் கையாளவுள்ளது. அதேவேளை, வட அமெரிக்கா மற்றும் ஐரோப்பா உள்ளிட்ட ஏனைய சர்வதேச சந்தைகளில் உள்ளூர் விநியோக நிறுவனங்களுடன் இணைந்து செயற்படத் திட்டமிட்டுள்ளது.

இந்த ஒப்பந்தம் ‘King’ திரைப்படத்தின் மீதான வர்த்தக எதிர்பார்ப்புகளையும் அதிகரித்துள்ளது. முதலீடு செய்யப்பட்டுள்ள பெருந்தொகையை மீட்டெடுப்பதற்கு சர்வதேச சந்தைகளில் இத்திரைப்படம் வலுவான வசூலைப் பெற்றுக்கொள்ள வேண்டிய நிலை ஏற்பட்டுள்ளது.

‘Pathaan’ திரைப்படத்தின் மூலம் ஷாருக்கானுடன் இணைந்து பணியாற்றிய சித்தார்த் ஆனந்த் இத்திரைப்படத்தை இயக்கியுள்ளார்.

மேலும், இத்திரைப்படத்தில் தீபிகா படுகோன், சுஹானா கான், அபிஷேக் பச்சன், அனில் கபூர் மற்றும் ராணி முகர்ஜி உள்ளிட்ட முன்னணி நட்சத்திரங்கள் பலரும் இணைந்து நடித்துள்ளனர்.

கிறிஸ்மஸ் விடுமுறைக் காலத்தை முன்னிட்டு, எதிர்வரும் 2026 டிசம்பர் 24ஆம் திகதி உலகளாவிய ரீதியில் ‘King’ திரைப்படம் திரையரங்குகளில் வெளியாகவுள்ளதாக அறிவிக்கப்பட்டுள்ளது.