வங்காள விரிகுடாவில் உருவாகும் காற்றழுத்தத் தாழ்வு மண்டலம் புயலாக வலுப்பெற வாய்ப்பு – செங்குத்து எச்சரிக்கை!
வங்காள விரிகுடாவின் தென்கிழக்குப் பகுதியில் நிலவும் காற்றழுத்தத் தாழ்வுப் பகுதி, புயலாக வலுப்பெறக்கூடும் என்பதால், இலங்கையைச் சூழவுள்ள கடற்பரப்புகளிலும் வங்காள விரிகுடாவின் தென்கிழக்குப் பகுதிகளிலும் நாளை (14) அதிகாலை 5.30 மணி முதல் ஆழ்கடல் நடவடிக்கைகளில் ஈடுபட வேண்டாம் என கடற்படையினர் மற்றும் மீனவர்களுக்கு கடுமையான எச்சரிக்கை விடுக்கப்பட்டுள்ளது.
இலங்கை வளிமண்டலவியல் திணைக்களத்தின் இயற்கை அனர்த்தங்கள் தொடர்பான முன்னெச்சரிக்கை நிலையம், இன்று (13) மாலை 5 மணிக்கு இந்தச் செங்குத்து எச்சரிக்கையை (RED – TAKE ACTION) வெளியிட்டுள்ளது. இந்த எச்சரிக்கை எதிர்வரும் நவம்பர் 15ஆம் திகதி வரை அமுலில் இருக்கும் என அறிவிக்கப்பட்டுள்ளது.
தற்போது வங்காள விரிகுடாவின் தென்கிழக்குப் பகுதியில் நிலைகொண்டுள்ள குறித்த காற்றழுத்தத் தாழ்வுப் பகுதி, வடமேற்கு திசையை நோக்கி நகர்ந்து நவம்பர் 15ஆம் திகதியளவில் காற்றழுத்தத் தாழ்வு மண்டலமாக வலுப்பெறுமென எதிர்பார்க்கப்படுகிறது.
தொடர்ந்து, நவம்பர் 16ஆம் திகதியளவில் மத்திய வங்காள விரிகுடாப் பகுதியில் புயலாக வலுப்பெறக்கூடும் என வளிமண்டலவியல் திணைக்களம் எதிர்வுகூறியுள்ளது.
இதன்படி, வடக்கு அட்சரேகை 05 முதல் 15 வரையிலும், கிழக்கு தீர்க்கரேகை 80 முதல் 90 வரையிலும் உள்ள ஆழ்கடல் பகுதிகளுக்கும், காங்கேசன்துறையிலிருந்து திருகோணமலை மற்றும் பொத்துவில் ஊடாக அம்பாந்தோட்டை வரையிலான கடற்பரப்புகளுக்கும் இந்த எச்சரிக்கை பொருந்தும்.
குறித்த ஆபத்தான கடற்பரப்புகளில் ஏற்கனவே மீன்பிடி மற்றும் கடல்சார் நடவடிக்கைகளில் ஈடுபட்டுள்ளவர்கள் உடனடியாகப் பாதுகாப்பான இடங்களுக்குச் செல்லுமாறும், வளிமண்டலவியல் திணைக்களத்தினால் வெளியிடப்படும் அடுத்தடுத்த வானிலை அறிவிப்புகளை அவதானிக்குமாறும் அறிவுறுத்தப்பட்டுள்ளனர்.
