2030ஆம் ஆண்டுக்குள் கடலுணவு ஏற்றுமதி வருமானத்தை 680 மில்லியன் டொலராக உயர்த்த இலங்கை இலக்கு

இலங்கையின் கடலுணவு ஏற்றுமதி வருமானத்தை 2030ஆம் ஆண்டளவில் ஆண்டுக்கு 680 மில்லியன் அமெரிக்க டொலராக அதிகரிக்க முடியும் என இலங்கை கடலுணவு ஏற்றுமதியாளர்கள் சங்கம் (SEASL) தெரிவித்துள்ளது.

இதனைச் சாத்தியப்படுத்துவதற்கு தொடர்ச்சியான முதலீடுகள், மேம்படுத்தப்பட்ட உட்கட்டமைப்பு வசதிகள் மற்றும் சாதகமான வர்த்தகக் கொள்கைகள் அவசியம் என அந்தச் சங்கம் சுட்டிக்காட்டியுள்ளது.

2027ஆம் ஆண்டுக்கான அரசாங்கத்தின் வரவு செலவுத் திட்ட முன்மொழிவுகளை வரவேற்று வெளியிட்டுள்ள அறிக்கையிலேயே சங்கம் இதனைத் தெரிவித்துள்ளது.

முதலீட்டு ஊக்குவிப்புகள், மீன்பிடித்துறை அபிவிருத்தித் திட்டங்கள் மற்றும் வர்த்தகச் சீர்திருத்தங்கள் ஆகியவை இலங்கையின் கடலுணவு ஏற்றுமதிப் போட்டித்தன்மையை மேலும் வலுப்படுத்தும் எனவும் சங்கம் குறிப்பிட்டுள்ளது.

குறிப்பாக, தகுதிபெறும் பெரிய அளவிலான மீன்பிடித்துறை நிறுவனங்களுக்கு ஆண்டுக்கு 5 சதவீத வட்டி வீதத்தில் அதிகபட்சமாக 500 மில்லியன் ரூபா வரை சலுகைக் கடன் வழங்கும் திட்டத்தை சங்கம் வரவேற்றுள்ளது.

அத்துடன், 3 மில்லியன் அமெரிக்க டொலர் அல்லது அதற்கு மேற்பட்ட முதலீட்டில் மேற்கொள்ளப்படும், முதலீட்டுச் சபையின் (BOI) அங்கீகாரம் பெற்ற ஏற்றுமதி நோக்கிலான உற்பத்தித் திட்டங்களுக்கு 200 சதவீத அதிகரிக்கப்பட்ட மூலதனக் கொடுப்பனவு வழங்கும் முன்மொழிவும் கடலுணவு பதப்படுத்தல் துறையில் முதலீடுகளை ஊக்குவிக்கும் எனத் தெரிவிக்கப்பட்டுள்ளது.

இதன் மூலம் கடலுணவு பதப்படுத்தல், நவீன தொழில்நுட்பப் பயன்பாடு மற்றும் குளிர்சங்கிலி உட்கட்டமைப்பு வசதிகளை மேம்படுத்த முடியும் என சங்கம் நம்பிக்கை வெளியிட்டுள்ளது.

2026ஆம் ஆண்டின் முதல் ஒன்பது மாதங்களில் இலங்கை 246.12 மில்லியன் அமெரிக்க டொலர் பெறுமதியான கடலுணவுப் பொருட்களை ஏற்றுமதி செய்துள்ளதாகவும், இதில் பெறுமதி சேர்க்கப்பட்ட கடலுணவுப் பொருட்கள் மூலம் 64 மில்லியன் டொலர் வருமானம் கிடைத்துள்ளதாகவும் சங்கம் தெரிவித்துள்ளது.

மொத்த கடலுணவு ஏற்றுமதி வருமானத்தில் பெறுமதி சேர்க்கப்பட்ட பொருட்களின் பங்களிப்பு 2022ஆம் ஆண்டில் 4 சதவீதமாகக் காணப்பட்ட நிலையில், 2026 ஜனவரி முதல் செப்டெம்பர் வரையான காலப்பகுதியில் அது 26 சதவீதமாக அதிகரித்துள்ளது.

மேலும், வடக்கு மாகாணத்தின் மீன்பிடித்துறை உட்கட்டமைப்பு வசதிகளை மேம்படுத்துவதற்காக 5 பில்லியன் ரூபாவை ஒதுக்குவதற்கான முன்மொழிவையும் சங்கம் வரவேற்றுள்ளது.

இதன் கீழ் பேசாலை துறைமுகம் மற்றும் மீன்பிடி படகுகள் நங்கூரமிடும் இடங்களை அபிவிருத்தி செய்வதற்கான திட்டங்களும் உள்ளடக்கப்பட்டுள்ளன. அத்துடன், நிலையான மீன்பிடி வள முகாமைத்துவத்திற்காக 1 பில்லியன் ரூபா ஒதுக்கப்படுவதையும் சங்கம் வரவேற்றுள்ளது.

இந்த முதலீடுகள் மீன்பிடி உட்கட்டமைப்பு வசதிகளை மேம்படுத்துவதுடன், கரையோர மக்களின் வாழ்வாதாரத்தை வலுப்படுத்தவும் நிலையான கடலுணவு உற்பத்தியை அதிகரிக்கவும் உதவும் எனத் தெரிவிக்கப்பட்டுள்ளது.

இதேவேளை, சுங்க நடைமுறைகளில் மேற்கொள்ளப்படவுள்ள சீர்திருத்தங்கள், ஏற்றுமதிக்கான தற்காலிக இறக்குமதித் திட்டத்தில் (TIEP) ஏற்படுத்தப்படவுள்ள மேம்பாடுகள் மற்றும் வர்த்தகத்திற்கான தேசிய ஒற்றைச் சாளர முறைமை (National Single Window for Trade) ஆகியவற்றையும் சங்கம் வரவேற்றுள்ளது.

இந்த மாற்றங்கள் ஏற்றுமதி நடைமுறைகளை எளிமைப்படுத்துவதுடன், செலவுகளைக் குறைக்கவும் உதவும் என எதிர்பார்க்கப்படுகிறது.

இலங்கையின் மீன்வளர்ப்புத் துறையில், குறிப்பாக இறால் வளர்ப்பில், அதிகளவிலான விரிவாக்க வாய்ப்புகள் காணப்படுவதாக சங்கத்தின் பிரதிநிதி திலான் பெர்னாண்டோ தெரிவித்துள்ளார்.

இதன் மூலம் கடலுணவு உற்பத்தியை அதிகரிக்கவும் கிராமப்புற வேலைவாய்ப்புகளை உருவாக்கவும் ஏற்றுமதி வருமானத்தை வலுப்படுத்தவும் முடியும் என அவர் குறிப்பிட்டுள்ளார்.

எவ்வாறாயினும், வரவு செலவுத் திட்டத்தில் முன்மொழியப்பட்டுள்ள திட்டங்களை முறையாக நடைமுறைப்படுத்துவதே ஏற்றுமதி இலக்குகளை அடைவதற்கு முக்கியமானது என அவர் வலியுறுத்தியுள்ளார்.

ஏற்றுமதியாளர்கள் இந்தச் சலுகைகளை இலகுவாகப் பெற்றுக்கொள்ளக்கூடிய வகையில் நடவடிக்கைகள் மேற்கொள்ளப்பட வேண்டும் என்பதுடன், பெறுமதி சேர்க்கப்பட்ட பொருட்களை உற்பத்தி செய்வதற்கான மூலப்பொருள் இறக்குமதிகளில் தேவையற்ற கட்டுப்பாடுகள் விதிக்கப்படக் கூடாது எனவும் அவர் தெரிவித்துள்ளார்.

அதேநேரம், நிலையான மீன்பிடி வள முகாமைத்துவம் தேசிய முன்னுரிமையாகத் தொடர வேண்டும் எனவும் அவர் சுட்டிக்காட்டியுள்ளார்.

சரியான கொள்கைகள் மற்றும் அவற்றின் முறையான நடைமுறைப்படுத்தல் மூலம் 2030ஆம் ஆண்டளவில் இலங்கையின் கடலுணவு ஏற்றுமதி வருமானத்தை 680 மில்லியன் அமெரிக்க டொலராக உயர்த்த முடியும் என திலான் பெர்னாண்டோ மேலும் தெரிவித்துள்ளார்.

இலங்கையின் மீன்பிடித்துறை மற்றும் கடலுணவு ஏற்றுமதித் தொழில்துறையை அபிவிருத்தி செய்வதில் அர்ப்பணிப்புடன் செயற்படுவதற்காக ஜனாதிபதி அநுரகுமார திஸாநாயக்க, கடற்றொழில் அமைச்சர் இராமலிங்கம் சந்திரசேகர் மற்றும் பிரதி அமைச்சர் ரத்ன கமகே ஆகியோருக்கும் இலங்கை கடலுணவு ஏற்றுமதியாளர்கள் சங்கம் நன்றியைத் தெரிவித்துள்ளது.