2027 வரவு செலவுத் திட்டம்: வாகனங்கள் தொடர்பில் வெளியான புதிய முன்மொழிவுகள்

இலங்கையின் 2027ஆம் ஆண்டுக்கான வரவு செலவுத் திட்டத்தில் மின்சார வாகனங்களைப் பயன்படுத்தும் அரச அதிகாரிகளுக்கான கொடுப்பனவுகளை அதிகரித்தல், போக்குவரத்துக் கொடுப்பனவை இரட்டிப்பாக்குதல் மற்றும் வாகனப் பதிவு சேவைகளை டிஜிட்டல் மயமாக்குதல் உள்ளிட்ட பல்வேறு முன்மொழிவுகள் முன்வைக்கப்பட்டுள்ளன.

எனினும், கார்கள், SUV ரக வாகனங்கள் மற்றும் மோட்டார் சைக்கிள்களின் இறக்குமதி வரி அல்லது கலால் வரிகளில் புதிய குறைப்புகள் எதுவும் அறிவிக்கப்படவில்லை.

நாடாளுமன்றத்தில் 2027ஆம் ஆண்டுக்கான வரவு செலவுத் திட்டத்தை சமர்ப்பித்த ஜனாதிபதி அநுர குமார திசாநாயக்க, வாகனங்கள் மற்றும் போக்குவரத்துத் துறை தொடர்பில் பல்வேறு முன்மொழிவுகளை வெளியிட்டார்.

மின்சார வாகனப் பாவனைக்கு ஊக்குவிப்பு

அரச கடமைகளுக்காகத் தமது தனிப்பட்ட முழுமையான மின்சார வாகனங்களைப் பயன்படுத்தும் தகுதியுடைய அரச அதிகாரிகளுக்கு வழங்கப்படும் மாதாந்தக் கொடுப்பனவை 150 சதவீதத்தால் அதிகரிக்க முன்மொழியப்பட்டுள்ளது.

இந்த அதிகரிப்பு 2027 ஜூலை மாதம் முதல் நடைமுறைக்கு வரவுள்ளது.

போக்குவரத்துக் கொடுப்பனவு இரட்டிப்பு

அரச கடமைகளுக்காகத் தமது சொந்த வாகனங்களைப் பயன்படுத்தும் தகுதியுடைய நிறைவேற்று அதிகாரிகளுக்கான மாதாந்தப் போக்குவரத்துக் கொடுப்பனவை 50,000 ரூபாவிலிருந்து 100,000 ரூபாவாக அதிகரிக்கவும் முன்மொழியப்பட்டுள்ளது.

வாகனப் பதிவு சேவைகள் டிஜிட்டல் மயம்

வாகனப் பதிவு மற்றும் உரிமை மாற்ற நடவடிக்கைகளை நவீன டிஜிட்டல் முறைக்கு மாற்றுவதற்காக 700 மில்லியன் ரூபா ஒதுக்கீடு செய்யப்பட்டுள்ளது.

இதன் மூலம் சேவைகளின் வினைத்திறன் மற்றும் வெளிப்படைத்தன்மையை மேம்படுத்த எதிர்பார்க்கப்படுகிறது.

சாரதிகளுக்கான குறைபுள்ளி முறைமை

சாரதிகளின் போக்குவரத்துக் குற்றங்களைப் பதிவு செய்யும் டிஜிட்டல் குறைபுள்ளி முறைமையையும், வீதி பாதுகாப்பு சட்ட அமலாக்கக் கட்டமைப்பையும் அறிமுகப்படுத்துவதற்காக 1.5 பில்லியன் ரூபா ஒதுக்க முன்மொழியப்பட்டுள்ளது.

இந்த முறைமை மோட்டார் போக்குவரத்துத் திணைக்களம் மற்றும் இலங்கை பொலிஸாரை இணைக்கும் வகையில் உருவாக்கப்படவுள்ளது.

மோட்டார் போக்குவரத்துத் திணைக்களம் இடமாற்றம்

மோட்டார் போக்குவரத்துத் திணைக்களத்தை வெரஹெர பகுதிக்கு இடமாற்றுவதற்காக 600 மில்லியன் ரூபா ஒதுக்கீடு செய்யப்பட்டுள்ளது.

பொதுமக்களுக்கு வழங்கப்படும் சேவைகளை மேலும் மேம்படுத்தும் நோக்கில் இந்த நடவடிக்கை முன்னெடுக்கப்படவுள்ளது.

வாகன இறக்குமதி வரிகளில் சலுகைகள் இல்லை

இவ்வாறான முன்மொழிவுகள் முன்வைக்கப்பட்டுள்ள போதிலும், வாகன இறக்குமதிக்கான வரிகள் அல்லது கலால் வரிகளில் புதிய குறைப்புகள் எதுவும் 2027ஆம் ஆண்டுக்கான வரவு செலவுத் திட்டத்தில் அறிவிக்கப்படவில்லை.

வாகனங்களின் விலைகள் குறைய வாய்ப்பில்லை - இறக்குமதியாளர்கள்

இதற்கிடையில், 2027ஆம் ஆண்டுக்கான வரவு செலவுத் திட்டத்தில் வாகன இறக்குமதிக்கான வரிச் சலுகைகள் எதுவும் அறிவிக்கப்படாததால், வாகனங்களின் விலைகள் குறைவடைய வாய்ப்பில்லை என இலங்கை வாகன இறக்குமதியாளர்கள் சங்கம் தெரிவித்துள்ளது.

ஊடகங்களிடம் கருத்துத் தெரிவித்த அந்தச் சங்கத்தின் உப தலைவர் அரோஷா ரொட்ரிகோ, வரவு செலவுத் திட்டத்தின் ஊடாக அரசாங்கம் ஏதேனும் நிவாரணங்களை வழங்கும் என வாகன இறக்குமதியாளர்கள் எதிர்பார்த்திருந்த போதிலும், இறக்குமதி வரிக் கொள்கைகளில் எந்தவித மாற்றமும் அறிவிக்கப்படாதது ஏமாற்றமளிப்பதாகக் குறிப்பிட்டார்.

இந்த விவகாரம் தொடர்பில் நிதி அமைச்சுக்கும் அறிவிக்கப்பட்டதாகத் தெரிவித்த அவர், நாட்டின் அந்நியச் செலாவணி கையிருப்பு மற்றும் மத்திய கிழக்கில் நிலவும் மோதல் நிலைமை தொடர்பான கவலைகளை அமைச்சு சுட்டிக்காட்டியதாகவும் கூறினார்.

வரவு செலவுத் திட்டத்தில் வாகன இறக்குமதி வரிச் சலுகைகள் அறிவிக்கப்படலாம் என்ற எதிர்பார்ப்பில் பலர் வாகனங்களைக் கொள்வனவு செய்வதை ஒத்திவைத்திருந்ததாகவும் அவர் தெரிவித்தார்.

எனினும், புதிய வரிச் சலுகைகள் எதுவும் அறிவிக்கப்படாத நிலையில், தற்போதுள்ள வரிக் கட்டமைப்பின் கீழ் வாகனங்களின் விலைகள் குறைவடைவதற்கான வாய்ப்புகள் இல்லை என அரோஷா ரொட்ரிகோ மேலும் குறிப்பிட்டார்.