ருவன்வெலிசாய அருகே மோதல்: 14 தையல்களுடன் வைத்தியசாலையிலிருந்து வெளியேறிய ராஜாங்கனை சத்தரதன தேரர்
அநுராதபுரம் ருவன்வெலிசாய விகாரைக்கு அருகில் பிக்குகள் முன்னெடுத்த போராட்டத்தின் போது ஏற்பட்ட மோதலில் தாக்கப்பட்டதாகக் கூறப்படும் ராஜாங்கனை சத்தரதன தேரர், தலையில் 14 தையல்களுடன் வைத்தியசாலையிலிருந்து வெளியேறியுள்ளார்.
சம்பவத்தைத் தொடர்ந்து தாம் வைத்தியசாலையில் சிகிச்சை பெற்று வந்ததாகவும், தற்போது தலையில் 14 தையல்கள் போடப்பட்ட நிலையில் வெளியேறுவதாகவும் அவர் சமூக ஊடகப் பதிவு ஒன்றின் மூலம் தெரிவித்துள்ளார்.
மேலும், தனது உயிருக்கு தொடர்ந்தும் அச்சுறுத்தல் இருப்பதாகக் குறிப்பிட்டுள்ள அவர், தனக்குப் பாதுகாப்பு வழங்குமாறு ஜனாதிபதி அநுரகுமார திஸாநாயக்கவிடம் கோரிக்கை விடுத்துள்ளார்.
அதேவேளை, ஜனாதிபதி அநுரகுமார திஸாநாயக்கவுக்கு தனது ஆதரவைத் தெரிவித்துள்ள அவர், மீண்டும் ஏதேனும் குழப்பமான சூழ்நிலை ஏற்பட்டால் அநுராதபுரத்திற்குத் திரும்புவேன் என்றும் தெரிவித்துள்ளார்.
தனக்குச் சிகிச்சையளித்த மருத்துவப் பணியாளர்கள், பொலிஸார், பாதுகாப்புப் பிரிவினர் மற்றும் சிகிச்சைக் காலத்தில் ஆதரவளித்த பொதுமக்கள் அனைவருக்கும் அவர் நன்றியும் தெரிவித்துள்ளார்.
