யாழ்ப்பாணத்தில் பெண் படுகொலை: தாயாருக்கு படுகாயம் விளைவித்த இளைஞன் புகையிரதத்தில் பாய்ந்து தற்கொலை

யாழ்ப்பாணத்தில் பெண் ஒருவரை கத்தியால் வெட்டி படுகொலை செய்த இளைஞன், அப்பெண்ணின் தாயாரையும் படுகாயப்படுத்திவிட்டு புகையிரதத்தின் (Train) முன்பாக பாய்ந்து தற்கொலை செய்துகொண்ட கோர சம்பவம் ஒன்று திங்கட்கிழமை (05) இரவு இடம்பெற்றுள்ளது.

யாழ்ப்பாணம், கோவில் வீதியில் அமைந்துள்ள வீடொன்றிற்குள் நேற்றைய தினம் அத்துமீறி நுழைந்த இளைஞன் ஒருவன், அங்கிருந்த ஒரு பிள்ளையின் தாயாரான இளம் விரிவுரையாளர் மீது கத்தியால் சரமாரியாகத் தாக்குதல் நடத்தியுள்ளான். மேலும், அப்பெண்ணின் தலைமுடியையும் கத்தியால் அறுத்து கொடூரமாகத் தாக்கியதில், அவர் சம்பவ இடத்திலேயே பரிதாபமாக உயிரிழந்தார்.

இதனைத் தொடர்ந்து, வீடிலிருந்த பெண்ணின் தாயார் மீதும் குறித்த இளைஞன் கத்திவெட்டுத் தாக்குதலை மேற்கொண்டுள்ளான். இதில் படுகாயமடைந்த தாயார், உடனடியாக மீட்கப்பட்டு யாழ்ப்பாணம் போதனா வைத்தியசாலையில் தீவிர சிகிச்சைப் பிரிவில் அனுமதிக்கப்பட்டுள்ளார்.

சம்பவ இடத்திலிருந்து தப்பிச் சென்ற தாக்குதல்தாரி, அரியாலை பகுதியில் யாழ்ப்பாணத்திலிருந்து கொழும்பு நோக்கிப் பயணித்த இரவு தபால் புகையிரதத்தின் முன் பாய்ந்து தனது உயிரை மாய்த்துக்கொண்டுள்ளான்.

இச்சம்பவத்தில் யாழ்ப்பாணத்தைச் சேர்ந்த சமையல் கலைஞரான ஆன் லக்ஷா இக்னேஷியஸ் (வயது 32) என்ற ஒரு பிள்ளையின் தாயாரே படுகொலை செய்யப்பட்டுள்ளார். பெண்ணைக் கொலை செய்துவிட்டுப் புகையிரதத்தில் பாய்ந்து தற்கொலை செய்துகொண்டவர் கிளிநொச்சி, பரந்தன் சிவபுரம் பகுதியைச் சேர்ந்த தேவதாஸ் புகழரசன் (வயது 23) என அடையாளி காணப்பட்டுள்ளார்.

படுகொலை செய்யப்பட்ட பெண் சமையல் கலைஞராகப் பணியாற்றும் யாழ்ப்பாணத்திலுள்ள பிரபல நட்சத்திர விடுதியில் , உயிரிழந்த இளைஞனும் சமையற்கலை பயிற்சியினை நிறைவு செய்து, பயிற்சி சமையல் கலைஞராகப் பணியாற்றி வந்துள்ளார். இவர்கள் இருவருக்கும் இடையே நிலவிய காதல் விவகாரமே இந்தக் கொலைச் சம்பவத்திற்குக் காரணமாக இருக்கலாம் எனப் பொலிஸார் சந்தேகம் வெளியிட்டுள்ளனர்.

சம்பவம் இடம்பெற்ற வீட்டில் தடயவியல் பொலிஸார் தீவிர சோதனைகளை மேற்கொண்டுள்ளதுடன், சடலத்தைக் கைப்பற்றி உடற்கூற்றுப் பரிசோதனைக்காக (Autopsy) யாழ்ப்பாணம் போதனா வைத்தியசாலைக்கு அனுப்பி வைத்துள்ளனர்.

உயிரிழந்த பெண்ணின் கணவர் கடந்த 2021 ஆம் ஆண்டு உயிரிழந்த நிலையில், அவர் மறுமணம் செய்யாது தனது பெண் குழந்தையுடன் வசித்து வந்தமை குறிப்பிடத்தக்கது. இச்சம்பவம் தொடர்பில் மேலதிக விசாரணைகளை யாழ்ப்பாணப் பொலிஸார் முன்னெடுத்து வருகின்றனர்.