மேற்கு வங்கத்திலும் காலடி பதித்தது தவெக: சமூகப் பணிகள் மூலம் மக்களைக் கவர திட்டம்!
நடிகர் விஜய்யின் தமிழக வெற்றிக் கழகம் (தவெக) தனது கட்சி அமைப்பை வெளிமாநிலங்களுக்கும் விரிவுபடுத்தும் நடவடிக்கைகளில் தீவிரம் காட்டி வருகிறது. கேரளத்தைத் தொடர்ந்து, தற்போது வடமாநிலமான மேற்கு வங்கத்திலும் தவெகவின் புதிய கிளை அலுவலகம் திறக்கப்பட்டுள்ளது.
மேற்கு வங்க மாநிலம், கிழக்கு பர்தவான் மாவட்டத்திற்குட்பட்ட பகுபூர் பகுதியில் இப்புதிய கிளை அலுவலகம் நேற்று முன்தினம் உத்தியோகபூர்வமாகத் திறந்து வைக்கப்பட்டதாக கட்சி வட்டாரங்கள் தெரிவித்துள்ளன.
தமிழ்நாட்டிலிருந்து வருகை தந்த தவெக நிர்வாகி ராஜங்கம், நாடாவை வெட்டி இப்புதிய அலுவலகத்தை ஆரம்பித்து வைத்தார். இந்நிகழ்வில் மேற்கு வங்க மாநில ஒருங்கிணைப்பாளர் சைத்தாலி ராய், இணை ஒருங்கிணைப்பாளர் சஞ்சய் டி மற்றும் பல்வேறு மாவட்டங்களைச் சேர்ந்த கட்சி உறுப்பினர்களும் கலந்துகொண்டனர்.
நிகழ்வில் உரையாற்றிய மாநில ஒருங்கிணைப்பாளர் சைத்தாலி ராய் கூறுகையில், "இந்த அலுவலகத் திறப்பின் மூலம் மேற்கு வங்க மாநிலத்தில் தவெகவின் அமைப்பு ரீதியான செயல்பாடுகள் உத்தியோகபூர்வமாகத் தொடங்கியுள்ளன. தற்போதைக்கு நேரடி அரசியல் நடவடிக்கைகளில் ஈடுபடாமல், மக்கள் நலச் சமூகப் பணிகள் வாயிலாகச் சாமானிய மக்களைச் சென்றடைவதே எங்களின் முதன்மை இலக்காகும். இதற்கான தெளிவான வழிகாட்டல்கள் தமிழ்நாட்டிலுள்ள தவெக தலைமைப் பீடத்திலிருந்து எங்களுக்கு வழங்கப்பட்டுள்ளன" எனக் குறிப்பிட்டார்.
கிழக்கு பர்தவான் மாவட்டத்தைத் தொடர்ந்து பங்குரா, பிர்பும் மற்றும் புருலியா ஆகிய மாவட்டங்களிலும் விரைவில் தவெகவின் கட்சி அலுவலகங்கள் திறக்கப்படவுள்ளதாக நிர்வாகிகளால் தெரிவிக்கப்பட்டுள்ளது.
