ரூ.10,000 சம்பளப் பிரச்சினை: சூரத்தில் ரூ.24 கோடி ஆடைகள் தீக்கிரை!

குஜராத் மாநிலம் சூரத் நகரில் அமைந்துள்ள பிரபல ஆடைச் சந்தையில் இடம்பெற்ற பாரிய தீ விபத்துக்கு, ரூ.10,000 நிலுவைச் சம்பளத்தை வழங்காத முதலாளிக்கு பாடம் புகட்ட முனைந்த முன்னாள் கணக்காளரே காரணம் என்பது பொலிஸ் விசாரணைகளில் தெரியவந்துள்ளது. இச்சம்பவத்தில் 14 கடைகள் முற்றிலும் எரிந்து சாம்பலானதுடன், சுமார் ரூ.24 கோடி பெறுமதியான ஆடைகள் நாசமாகியுள்ளன.

கண்காணிப்புக் கேமரா (CCTV) உதவியுடன் கைது

சூரத் நகரில் அமைந்துள்ள ‘ஷியாம் சங்கினி’ ஆடைச் சந்தையில் கடந்த செப்டம்பர் 8-ஆம் திகதி நள்ளிரவில் திடீரெனப் பாரிய தீ விபத்து ஏற்பட்டது. இச்சம்பவம் தொடர்பில் வழக்குப் பதிவு செய்த சாரோலி பகுதிப் பொலிஸார், ‘விஸ்வாஸ் திட்டம் கட்டம்-2’ இன் கீழ் அப்பகுதியில் பொருத்தப்பட்டிருந்த கண்காணிப்புக் கேமராக்களின் (CCTV) பதிவுகளைத் தீவிரமாகப் பரிசீலித்தனர்.

அப்போது, முகத்தைத் துணியால் மூடிய நபர் ஒருவர், கடைக்கு வெளியே வைக்கப்பட்டிருந்த துணிப் பார்சல்களுக்குத் தீ வைக்கும் காட்சிகள் பதிவாகியிருந்தன. அதனடிப்படையில் மேற்கொள்ளப்பட்ட தேடுதலில், டிண்டோலி பகுதியைச் சேர்ந்த வினோத் பண்டிட் சாவ்லே என்பவரே இச்செயலில் ஈடுபட்டது கண்டுபிடிக்கப்பட்டு, பொலிஸாரால் கைது செய்யப்பட்டார்.

பழிவாங்கும் நோக்கில் நடந்த செயல்

கைதான நபரிடம் நடத்தப்பட்ட விசாரணையில் வெளியாகியுள்ள தகவல்கள் வருமாறு:

வினோத் சாவ்லே குறித்த கடையில் கடந்த ஏப்ரல் மாதம் முதல் மூன்று மாதங்கள் கணக்காளராகப் பணியாற்றியுள்ளார். எனினும், கணக்கு வழக்குகளைச் சரியாகக் கையாளத் தவறியதால் ஜூன் மாதம் அவர் வேலையிலிருந்து நீக்கப்பட்டுள்ளார்.

வேலையிலிருந்து நீக்கப்பட்ட போதிலும், அவருக்குச் சேர வேண்டிய ரூ.10,000 நிலுவைச் சம்பளத்தை முதலாளி வழங்காமல் இழுத்தடித்துள்ளார். இதனால் கடும் ஆத்திரமடைந்த சாவ்லே, கடை உரிமையாளருக்குப் பாடம் புகட்டத் திட்டமிட்டுள்ளார்.

ரூ.150 பெட்ரோலால் ஏற்பட்ட பெரும் நாசம்

திட்டமிட்டபடி, அருகில் உள்ள எரிபொருள் நிரப்பு நிலையத்தில் ரூ.150-க்கு பாட்டிலில் பெட்ரோல் வாங்கி வந்த சாவ்லே, செப்டம்பர் 8-ஆம் திகதி நள்ளிரவு சந்தைக்குள் நுழைந்துள்ளார். தான் குறிவைத்த கடைக்கு வெளியே வைக்கப்பட்டிருந்த துணிப் பெட்டிகள் மற்றும் பார்சல்கள் மீது பெட்ரோலை ஊற்றித் தீ வைத்துள்ளார்.

அத்தீ கணப்பொழுதில் அருகிலிருந்த கடைகளுக்கும் வேகமாகப் பரவியதில், 14 கடைகள் முற்றிலும் எரிந்து நாசமாகின. சிறு தொகையான நிலுவைச் சம்பளத் தகராறினால், ஒட்டுமொத்த சந்தைக்கும் ரூ.24 கோடி பாரிய இழப்பு ஏற்பட்டுள்ளதாகப் பொலிஸார் தெரிவித்துள்ளனர்.