ஜப்பானுக்குப் போட்டியாக இந்தியாவின் புதிய அதிவேக 'B35' புல்லட் ரயில்!

இந்திய இரயில்வே துறை தன் சொந்தத் தொழில்நுட்பத்தில் இயங்கும் அதிவேகப் புல்லட் இரயிலை உருவாக்க தீவிர நடவடிக்கைகளை மேற்கொண்டு வருகிறது. மணிக்கு 350 கிலோமீட்டர் வேகத்தில் செல்லக்கூடிய 'B35' என்ற பெயரிடப்பட்ட இந்த அதிவேக இரயில், உள்நாட்டிலேயே உருவாக்கப்படும் மிக அதிவேகப் புல்லட் இரயிலாக அமையவுள்ளது.

வெளிநாட்டுத் தொழில்நுட்பத்தைச் சார்ந்திருப்பதைக் குறைத்து, உள்நாட்டுத் தொழில்நுட்பத்தை மேம்படுத்தும் திட்டத்தின் கீழ் இந்த நடவடிக்கை முன்னெடுக்கப்பட்டு வருகிறது. வரும் 2030 ஆம் ஆண்டிற்குள் இந்த உள்நாட்டுப் புல்லட் இரயில்களை உருவாக்குவதோடு, அவற்றைப் இயக்குவதற்குத் தேவையான உட்கட்டமைப்பு வசதிகளையும் நிறைவு செய்ய இந்தியா இலக்கு நிர்ணயித்துள்ளது.

மும்பை - அகமதாபாத் இடையிலான அதிவேக இரயில் நடைபாதை திட்டத்திற்கான திட்ட மதிப்பீட்டுத் தொகையை மத்திய அமைச்சரவை அண்மையில் உயர்த்தியதைத் தொடர்ந்து இந்நடவடிக்கை தீவிரமடைந்துள்ளது. இத்திட்டத்தின் மொத்தச் செலவு தற்போது 2 இலட்சம் கோடி ரூபாயைத் தாண்டியுள்ளது. இது 2015 ஆம் ஆண்டில் கணக்கிடப்பட்ட ஆரம்பக்கட்ட மதிப்பீட்டை விட இருமடங்காகும். இத்தொகையில் சுமார் 1 இலட்சம் கோடி ரூபாய் மத்திய பட்ஜெட் நிதி ஒதுக்கீடு மூலம் வழங்கப்படவுள்ளது.

ஜப்பான் நாடு தனது தற்போதைய E5 ரக இரயில்களின் உற்பத்தியை படிப்படியாக நிறுத்தவுள்ளதாக டிசம்பர் 2024 இல் அறிவித்ததைத் தொடர்ந்தே, இந்தியா 'B35' ரகப் புல்லட் இரயில்களை உருவாக்கும் பணியைத் தொடங்கியது. ஜப்பானின் புதிய E10 ரக இரயில்களின் உற்பத்தி 2030 இல் தொடங்கி, 2034 ஆம் ஆண்டளவில் பயன்பாட்டிற்கு வரும் என எதிர்பார்க்கப்படுகிறது. அவை பயன்பாட்டிற்கு வரும் பட்சத்தில் இந்திய அதிகாரிகளும் அந்த E10 இரயில்களைப் பயன்படுத்துவது குறித்து பரிசீலிக்கக் கூடும் என எதிர்பார்க்கப்படுகிறது.

அதேவேளையில், இந்தியா மணிக்கு 280 கிலோமீட்டர் வேகத்தில் செல்லக்கூடிய 'B28' ரக அதிவேக இரயில்களையும் சொந்தமாக வடிவமைத்து வருகிறது. மேலும், 'பாரத் ரயில் கட்டுப்பாட்டு அமைப்பு' என்ற புதிய சமிக்ஞை மற்றும் கட்டுப்பாட்டுத் தொழில்நுட்பத்தையும் இந்தியா உருவாக்கி வருகிறது. இரயில்களின் வேகத்தைக் கட்டுப்படுத்தவும், இரயில்களுக்கு இடையே பாதுகாப்பான இடைவெளியைப் பராமரிக்கவும் இது உதவும். இது சீனாவின் CTCS கட்டுப்பாட்டு அமைப்பிற்கு நிகரானதாகும்.

இந்திய இரயில்வே அமைச்சகத்தின் தகவலின்படி, 508 கிலோமீட்டர் நீளம் கொண்ட மும்பை - அகமதாபாத் அதிவேக இரயில் பாதையானது குஜராத், மகாராஷ்டிரா மற்றும் தாத்ரா நாகர் ஹவேலி ஆகிய பகுதிகள் வழியாகச் செல்கிறது. இதில் மும்பை, தானே, விரார், போய்சார், வாபி, பில்லிமோரா, சூராத், பருச், வதோதரா, ஆனந்த், அகமதாபாத் மற்றும் சபர்மதி ஆகிய 12 இரயில் நிலையங்கள் அமைப்பதற்குத் திட்டமிடப்பட்டுள்ளது.

இத்திட்டத்திற்கான புதிய இரயில் பெட்டிகளைச் சென்னை இணைப்புப் பெட்டி தொழிற்சாலை மற்றும் பாரத் எர்த் மூவர்ஸ் நிறுவனம் (BEML) இணைந்து வடிவமைத்து உற்பத்தி செய்து வருகின்றமை குறிப்பிடத்தக்கது.