இந்தியாவில் 200 அடி ஆழ்குழாய் கிணற்றில் வீழ்ந்த 3 வயது சிறுமி சிகிச்சை பலனின்றி பலி

இந்தியாவின் ஹரியானா மாநிலத்தில் 200 அடி ஆழமுடைய திறந்த ஆழ்குழாய் கிணற்றில் வீழ்ந்த மூன்று வயது சிறுமி, நீண்ட நேர போராட்டத்திற்குப் பின்னர் மீட்கப்பட்ட போதிலும் சிகிச்சை பலனின்றி இன்று (28) திங்கட்கிழமை பரிதாபமாக உயிரிழந்தார்.

ஹரியானா மாநிலத்தின் பரிதாபாத் பகுதியில் நேற்று (27) ஞாயிற்றுக்கிழமை மாலை 6.00 மணியளவில் இச்சோகச் சம்பவம் இடம்பெற்றுள்ளது.

அப்பகுதியில் நிறுத்தப்பட்டிருந்த உழவு இயந்திரத்திற்கு அருகில் விளையாடிக்கொண்டிருந்த குறித்த சிறுமி, எதிர்பாராதவிதமாக அருகில் மூடப்படாமல் இருந்த ஆழ்குழாய் கிணற்றுக்குள் தவறி வீழ்ந்துள்ளார்.

சம்பவம் தொடர்பில் இரவு 7.45 மணியளவில் தேசிய பேரிடர் மீட்புப் படைக்கு (NDRF) தகவல் வழங்கப்பட்டதை அடுத்து, இரவு 9.05 மணியளவில் விரைந்து வந்த மீட்புக் குழுவினர் தீவிர மீட்பு நடவடிக்கைகளில் ஈடுபட்டனர்.

சுமார் 10 மணி நேரத் தொடர் போராட்டத்திற்குப் பிறகு, இன்று அதிகாலை 3.50 மணியளவில் சிறுமி உயிருடன் மீட்கப்பட்டு உடனடியாக மருத்துவமனைக்குக் கொண்டு செல்லப்பட்டார்.

எனினும், மருத்துவமனையில் தீவிர சிகிச்சை அளிக்கப்பட்டு வந்த நிலையில், சிகிச்சை பலனின்றி அச்சிறுமி உயிரிழந்ததாக மருத்துவர்கள் உறுதிப்படுத்தியுள்ளனர்.

10 மணி நேரப் போராட்டத்திற்குப் பின் சிறுமி உயிருடன் மீட்கப்பட்டும், இறுதியில் அவரது உயிர் பிரிந்த இச்சம்பவம் அப்பகுதியில் பெரும் அதிர்ச்சியையும் சோகத்தையும் ஏற்படுத்தியுள்ளது.