முன்னாள் அமைச்சரின் மனைவி கட்டடத்திலிருந்து தவறி விழுந்து உயிரிழப்பு!

மொனராகலை மாவட்ட முன்னாள் பாராளுமன்ற உறுப்பினரும் முன்னாள் அமைச்சருமான ஜகத் புஷ்பகுமார அவர்களின் மனைவி, கட்டடத்தின் இரண்டாவது மாடியிலிருந்து தவறி விழுந்து படுகாயமடைந்த நிலையில் சிகிச்சை பலனின்றி இன்று (19) அதிகாலை உயிரிழந்துள்ளார்.

தனமல்வில பகுதியில் அமைந்துள்ள அவர்களுக்குச் சொந்தமான புதிதாக நிர்மாணிக்கப்பட்டு வரும் கட்டடத்தின் இரண்டாவது மாடியிலிருந்து அவர் எதிர்பாராதவிதமாகத் தவறி கீழே விழுந்து விபத்துக்குள்ளாகியிருந்தார்.

விபத்தையடுத்து தீவிர காயங்களுக்குள்ளான அவர் உடனடியாக மீட்கப்பட்டு, காலி கராப்பிட்டிய போதனா வைத்தியசாலையின் தீவிர சிகிச்சைப் பிரிவில் அனுமதிக்கப்பட்டு சிகிச்சைப் பெற்று வந்தார். எனினும், அங்கு சிகிச்சை பலனின்றி அவர் இன்று காலை உயிரிழந்துள்ளார்.

உயிரிழந்தவர் 55 வயதுடைய இரண்டு பிள்ளைகளின் தாயார் என்பது குறிப்பிடத்தக்கது. அவரது இந்தத் திடீர் மறைவு குடும்பத்தினரையும் பிரதேசவாசிகளையும் பெரும் சோகத்தில் ஆழ்த்தியுள்ளது.

மொனராகலை மாவட்டத்தைப் பிரதிநிதித்துவப்படுத்திய மூத்த அரசியல்வாதியான ஜகத் புஷ்பகுமார, தென்னை அபிவிருத்தி மற்றும் மக்கள் தோட்ட அபிவிருத்தி அமைச்சராகவும், வெளிநாட்டு வேலைவாய்ப்பு ஊக்குவிப்பு இராஜாங்க அமைச்சராகவும் பல முக்கிய அமைச்சுப் பதவிகளை வகித்துள்ளமை குறிப்பிடத்தக்கது.