காவல்துறையில் 20,000 பேரை கட்டம் கட்டமாக இணைக்கத் திட்டம் – அமைச்சர் அறிவிப்பு
இலங்கை காவல்துறையில் நிலவும் ஆளணிப் பற்றாக்குறையை நிவர்த்தி செய்யும் நோக்கில், 20,000 புதிய பணியாளர்களை கட்டம் கட்டமாக இணைக்க அரசாங்கம் திட்டமிட்டுள்ளதாக பொதுமக்கள் பாதுகாப்பு மற்றும் நாடாளுமன்ற விவகார அமைச்சர் ஆனந்த விஜேபால தெரிவித்துள்ளார்.
இன்று (18) நாடாளுமன்றத்தில் உரையாற்றிய அவர், முதற்கட்டமாக 10,000 பேரை ஆட்சேர்ப்பு செய்ய நடவடிக்கை எடுக்கப்பட்டுள்ளதாகவும், அந்த ஆட்சேர்ப்பு நடவடிக்கைகள் எதிர்வரும் ஏப்ரல் அல்லது மே மாதத்திற்குள் நிறைவடையும் எனவும் குறிப்பிட்டார். இதனைத் தொடர்ந்து மேலும் 10,000 பேர் காவல்துறையில் இணைத்துக்கொள்ளப்படவுள்ளனர்.
ஆட்சேர்ப்பு நடவடிக்கைகள் தொடர்பில் விளக்கமளித்த அமைச்சர், தற்போது 4,000 பேர் பயிற்சிகளை நிறைவு செய்து வருவதாகத் தெரிவித்தார். அதேவேளை, மாகாண மட்டத்திலான நேர்முகத் தேர்வுகளும் நடைபெற்று வருகின்றன.
காவல்துறை கான்ஸ்டபிள் முதல் உப பொலிஸ் பரிசோதகர் வரையிலான பதவிகளுக்கான ஆட்சேர்ப்பு தொடர்பான வர்த்தமானி அறிவித்தல் அடுத்த மாதம் வெளியிடப்படவுள்ளதாகவும் அவர் கூறினார்.
மேலும், முதன்முறையாக 19 உதவிப் பொலிஸ் அத்தியட்சகர் (ASP) பதவிகளுக்கும் ஆட்சேர்ப்பு செய்யப்படவுள்ளதாகத் தெரிவித்த அவர், இதன் மூலம் முதற்கட்டமாக 10,000 பேரை இணைக்கும் நடவடிக்கைகள் நிறைவுசெய்யப்படும் என்றார்.
தற்போது காவல்துறையில் சுமார் 38,000 பேருக்கான ஆளணிப் பற்றாக்குறை நிலவுவதாகவும், இதன் காரணமாக காவல்துறை அதிகாரிகள் நீண்ட நேரம் பணியாற்ற வேண்டிய நிலை ஏற்பட்டுள்ளதாகவும் அமைச்சர் சுட்டிக்காட்டினார்.
இந்நிலையில், காவல்துறை அதிகாரிகளுக்கான தங்குமிடம் மற்றும் உணவுக் கொடுப்பனவுகள் மேலதிகமாக 10,000 ரூபாவால் அதிகரிக்கப்பட்டுள்ளதாகவும், நீதித்துறைப் பிரிவுடன் தொடர்புடைய கொடுப்பனவுகளிலும் திருத்தங்கள் மேற்கொள்ளப்பட்டுள்ளதாகவும் அவர் தெரிவித்தார்.
ஆட்சேர்ப்பு நடவடிக்கைகளில் அரசியல் தலையீடுகள் எதுவும் இடம்பெறாது என உறுதியளித்த அமைச்சர், தகுதியின் அடிப்படையில் திறமையானவர்களை அரச சேவையில் இணைத்துக்கொள்வதற்கான சூழல் உருவாக்கப்பட்டுள்ளதாகவும் குறிப்பிட்டார்.