மன்னாரில் சுகாதார விதிமீறல்கள்: மூன்று உணவகங்களுக்கு ரூ.95,000 அபராதம்
மன்னார் நகர சபை எல்லைக்குட்பட்ட பகுதிகளில் இயங்கும் மூன்று உணவகங்களில் சுகாதார மற்றும் உணவுப் பாதுகாப்பு விதிமுறைகள் மீறப்பட்டமை தொடர்பில், அவற்றின் உரிமையாளர்களுக்கு நீதிமன்றம் மொத்தம் 95,000 ரூபாய் அபராதம் விதித்துள்ளது.
அத்துடன், மூவருக்கும் தலா 24 மாத கால ஒத்திவைக்கப்பட்ட சிறைத்தண்டனையும் விதிக்கப்பட்டுள்ளது.
மன்னார் நகர சபையின் பொதுச் சுகாதாரப் பரிசோதகரால் தாக்கல் செய்யப்பட்ட வழக்கை விசாரித்த நீதிமன்றம் இந்த உத்தரவைப் பிறப்பித்துள்ளது.
இதன்படி, ஒருவருக்கு 35,000 ரூபாயும், ஏனைய இருவருக்கும் தலா 30,000 ரூபாயும் அபராதமாக விதிக்கப்பட்டுள்ளது.
குறித்த உணவகங்கள் உரிய வணிகப் பதிவு மற்றும் அங்கீகரிக்கப்பட்ட மருத்துவச் சான்றிதழ்கள் இன்றி உணவு தயாரித்தமை, சுத்திகரிக்கப்படாத கழிவுநீரை நேரடியாக பிரதான வடிகால் கட்டமைப்பில் வெளியேற்றியமை மற்றும் உணவு தயாரிக்கும் இடங்களில் ஈக்களைக் கட்டுப்படுத்துவதற்கான நடவடிக்கைகளை மேற்கொள்ளாமை உள்ளிட்ட குற்றச்சாட்டுகள் முன்வைக்கப்பட்டிருந்தன.
மேலும், எலிகள் மற்றும் கரப்பான் பூச்சிகளின் எச்சங்கள் காணப்பட்ட சுகாதாரமற்ற சூழலில் உணவு தயாரித்தமை, உணவைக் கையாளும்போது கட்டாயமாக அணிய வேண்டிய முகக்கவசம், கையுறை, தலைக்கவசம் மற்றும் பாதுகாப்பு மேலங்கி போன்றவற்றை அணியத் தவறியமை உள்ளிட்ட பல்வேறு சுகாதார விதிமீறல்களும் கண்டறியப்பட்டுள்ளன.
பொதுமக்களின் சுகாதாரத்துக்கு அச்சுறுத்தலாக அமையக்கூடிய விடயங்களைக் கண்டறியும் நோக்கில் மன்னார் நகர சபையின் பொதுச் சுகாதாரப் பரிசோதகர்கள் மேற்கொண்ட வழக்கமான சோதனை நடவடிக்கைகளின்போதே இந்தக் குறைபாடுகள் கண்டறியப்பட்டுள்ளன.
உணவைக் கையாளும் அனைத்து நிறுவனங்களின் உரிமையாளர்களும் உணவுப் பாதுகாப்புச் சட்டங்கள் மற்றும் சுகாதார வழிகாட்டுதல்களை முறையாகப் பின்பற்றி, பொதுமக்களுக்குப் பாதுகாப்பான மற்றும் சுகாதாரமான உணவை வழங்குவதை உறுதிப்படுத்த வேண்டும் என சுகாதார அதிகாரிகள் வலியுறுத்தியுள்ளனர்.