பாதாள உலகக் குழு உறுப்பினர் ‘ரொட்டும்ப அமில’ நாளை இலங்கைக்கு அழைத்து வரப்படுகிறார்!
ரஷ்யாவில் கைது செய்யப்பட்டு தடுத்து வைக்கப்பட்டுள்ள ஒழுங்கமைக்கப்பட்ட குற்றச்செயல்களுடன் தொடர்புடைய முக்கிய சந்தேகநபரான ‘ரொட்டும்ப அமில’ என அழைக்கப்படும் அமில சம்பத் சேபால ரத்நாயக்க, நாளை (20) வெள்ளிக்கிழமை இலங்கைக்கு அழைத்து வரப்படவுள்ளார்.
அவரை நாட்டுக்கு அழைத்து வருவதற்காக குற்றப்புலனாய்வுத் திணைக்களத்தின் (CID) அதிகாரிகள் அடங்கிய விசேட குழுவொன்று ஏற்கனவே ரஷ்யாவுக்குப் பயணித்துள்ளதாகத் தெரிவிக்கப்படுகிறது.
தென் மாகாணத்தை மையமாகக் கொண்டு இடம்பெற்ற பல்வேறு கொலைச் சம்பவங்கள், கப்பம் கோருதல் மற்றும் பாரியளவிலான போதைப்பொருள் கடத்தல் உள்ளிட்ட பல குற்றச்செயல்களுடன் ரொட்டும்ப அமில தொடர்புடையவர் எனக் கூறப்படுகிறது. இதன் காரணமாக அவர் நீண்டகாலமாகப் பொலிஸாரால் தேடப்பட்டு வந்தார்.
சட்ட நடவடிக்கைகளைத் தவிர்த்து நாட்டை விட்டு வெளியேறித் தலைமறைவாகியிருந்த அவர், சர்வதேச பொலிஸாரின் (INTERPOL) சிவப்பு எச்சரிக்கைக்கு அமைய 2025ஆம் ஆண்டு மார்ச் மாதம் ரஷ்யப் பாதுகாப்புப் பிரிவினரால் கைது செய்யப்பட்டார்.
அவரது கைது தொடர்பில் ரஷ்யப் பொலிஸார் இலங்கை அதிகாரிகளுக்கு உத்தியோகபூர்வமாக அறிவித்ததைத் தொடர்ந்து, நாடு கடத்தல் சட்டத்தின் கீழ் அவரை இலங்கைக்கு அழைத்து வருவதற்கான நடவடிக்கைகள் சட்டமா அதிபர் திணைக்களத்தின் ஒத்துழைப்புடன் முன்னெடுக்கப்பட்டன.
எனினும், தன்னை இலங்கைக்கு நாடு கடத்துவதற்கு எதிராக ரஷ்ய நீதிமன்றத்தில் அவர் மேன்முறையீடு செய்திருந்ததால், அவரை நாட்டுக்கு அழைத்து வரும் நடவடிக்கைகளில் தாமதம் ஏற்பட்டிருந்தது.
மேலும், இலங்கைக்கு ஒப்படைக்கப்படுவதைத் தவிர்க்கும் நோக்கில் ரஷ்ய இராணுவத்தில் இணைந்து அந்நாட்டுப் பிரஜாவுரிமையைப் பெற்றுக்கொள்ளும் முயற்சியிலும் அவர் ஈடுபட்டிருந்ததாக இலங்கைப் புலனாய்வுத் தகவல்கள் மற்றும் பொலிஸ் விசாரணைகளில் தெரியவந்திருந்தது.
மாத்தறை, ரொட்டும்ப பகுதியைச் சேர்ந்த அமில சம்பத் சேபால ரத்நாயக்கவுக்கு எதிராக, 2005ஆம் ஆண்டு ஓகஸ்ட் 25ஆம் திகதி ஊருபொக்க பகுதியில் வர்த்தகர் ஒருவரைச் சுட்டுக்கொலை செய்தமை உள்ளிட்ட பல்வேறு குற்றச்சாட்டுகள் தொடர்பான வழக்குகள் நிலுவையில் உள்ளன.
இதேவேளை, 2017ஆம் ஆண்டு ஓகஸ்ட் 7ஆம் திகதி அவர் டுபாய்க்குத் தப்பிச் சென்றிருந்தார். பின்னர், 2019ஆம் ஆண்டு டுபாயில் பாதாள உலகக் குழுத் தலைவராக அறியப்பட்ட மாகந்துரே மதுஷ் நடத்திய களியாட்ட நிகழ்வின்போது, ஐக்கிய அரபு அமீரகப் பொலிஸாரால் கைது செய்யப்பட்டார்.
இதனையடுத்து, கஞ்சிப்பானை இம்ரானுடன் இலங்கைக்கு நாடு கடத்தப்பட்ட அவர், மாத்தறை குற்றத்தடுப்புப் பிரிவினரால் தடுத்து வைக்கப்பட்டு விசாரணைக்கு உட்படுத்தப்பட்டார்.
பின்னர் பிணையில் விடுவிக்கப்பட்ட அவர், மீண்டும் வெளிநாட்டுக்குத் தப்பிச் சென்றிருந்தமை குறிப்பிடத்தக்கது.