அனைத்து மாகாணங்களிலும் ஆசிரியர் நியமன நேர்முகத் தேர்வுகள் ஒத்திவைப்பு
தேசிய மற்றும் மாகாணப் பாடசாலைகளில் நிலவும் ஆசிரியர் வெற்றிடங்களுக்கு பட்டதாரிகளை ஆட்சேர்ப்பு செய்வதற்காக நாளை (20) அனைத்து மாகாணங்களிலும் நடைபெறவிருந்த நேர்முகத் தேர்வுகள் ஒத்திவைக்கப்பட்டுள்ளன.
தவிர்க்க முடியாத காரணங்களால் இந்தத் தீர்மானம் எடுக்கப்பட்டுள்ளதாக கல்வி அமைச்சின் செயலாளர் நாலக களுவேவா தெரிவித்துள்ளார்.
இதற்கமைய, ஒத்திவைக்கப்பட்ட நேர்முகத் தேர்வுகள் பின்வரும் திகதிகளில் நடைபெறும் என அறிவிக்கப்பட்டுள்ளது.
- மேல் மற்றும் வடமேல் மாகாணங்கள் – நவம்பர் 29
- வடக்கு, தெற்கு, கிழக்கு மற்றும் சபரகமுவ மாகாணங்கள் – நவம்பர் 28
- ஊவா மற்றும் வடமத்திய மாகாணங்கள் – நவம்பர் 26
- மத்திய மாகாணம் – டிசம்பர் 1
எவ்வாறாயினும், நவம்பர் 20ஆம் திகதி நடைபெறவிருந்த நேர்முகத் தேர்வுகளுக்கு மாத்திரமே இந்த மாற்றம் பொருந்தும் எனவும், நவம்பர் 21ஆம் திகதி முதல் திட்டமிடப்பட்டுள்ள நேர்முகத் தேர்வுகள் ஏற்கனவே அறிவிக்கப்பட்ட திகதிகளின்படி நடைபெறும் எனவும் தெரிவிக்கப்பட்டுள்ளது.
இதற்கிடையில், பாடசாலை விருப்பத் தெரிவுகளைச் சமர்ப்பிப்பதற்கான ஆசிரியர் ஆட்சேர்ப்பு விண்ணப்ப முறைமை நவம்பர் 19ஆம் திகதி முதல் கல்வி அமைச்சின் உத்தியோகபூர்வ இணையத்தளத்தில் செயல்படுத்தப்பட்டுள்ளது.
முன்னதாக அறிவிக்கப்பட்டதைப் போன்று நவம்பர் 19ஆம் திகதியுடன் இந்த முறைமைக்கான கால அவகாசம் நிறைவடையாது எனவும், விண்ணப்பதாரர்களுக்கு நேர்முகத் தேர்வுக்காக அழைப்பு விடுக்கப்பட்ட நாளன்று இரவு 8 மணி வரை இணையவழி முறைமையைப் பயன்படுத்த முடியும் எனவும் அறிவிக்கப்பட்டுள்ளது.
மேலும், நேர்முகத் தேர்வுக்கான திகதியன்று அழைப்புக் கடிதம் கிடைக்காத விண்ணப்பதாரர்கள், 2026 ஒக்டோபர் 30ஆம் திகதி இணையத்தளத்தில் வெளியிடப்பட்ட பட்டியலில் தமது பெயர் இடம்பெற்றுள்ள பக்கத்தின் பிரதியையும், அடையாளத்தை உறுதிப்படுத்தும் ஆவணங்களையும் எடுத்துக்கொண்டு, நேர்முகத் தேர்வு நடைபெறும் இடத்திலுள்ள காத்திருப்பு அறைக்கு அதிகாலையிலேயே வருகை தர வேண்டும் என அறிவுறுத்தப்பட்டுள்ளது.
அவர்களுக்கான இணைய முறைமை அணுகல் வசதி காலை 8 மணி முதல் ஏற்படுத்திக் கொடுக்கப்படும்.
அத்தகைய விண்ணப்பதாரர்கள் இணைய முறைமையைப் பயன்படுத்திக்கொண்டே நேர்முகத் தேர்வு மற்றும் செய்முறைப் பரீட்சைகளில் பங்கேற்க முடியும். அத்துடன், பாடசாலை விருப்பத் தெரிவுகள் அடங்கிய ஆவணங்களின் அச்சுப் பிரதிகளை அன்றைய தினம் இரவு 8 மணி வரை நேர்முகத் தேர்வு நடைபெறும் இடத்திலுள்ள காத்திருப்பு அறையில் சமர்ப்பிக்க முடியும்.
இந்த மாற்றங்களால் விண்ணப்பதாரர்களுக்கு ஏற்பட்டுள்ள சிரமங்களுக்கு கல்வி அமைச்சின் செயலாளர் நாலக களுவேவா வருத்தம் தெரிவித்துள்ளார்.