போலி சாரதி அனுமதிப்பத்திரங்கள், தேசிய அடையாள அட்டைகள் தயாரிப்பு – இருவர் கைது!
போலி சாரதி அனுமதிப்பத்திரங்கள் மற்றும் தேசிய அடையாள அட்டைகளைத் தயாரித்தல், வைத்திருத்தல் மற்றும் விற்பனை செய்தல் தொடர்பில் இருவர் பொலிஸாரால் கைது செய்யப்பட்டுள்ளனர்.
நுகேகொடை பிரிவின் குற்ற விசாரணைப் பணியக அதிகாரிகள், வெலிக்கடை பொலிஸ் பிரிவுக்குட்பட்ட பண்டாரநாயக்கபுர சந்தியில் கடந்த புதன்கிழமை (11) மாலை முன்னெடுத்த சோதனை நடவடிக்கையின்போது, போலியான சாரதி அனுமதிப்பத்திரம் ஒன்றை வைத்திருந்த சந்தேகநபர் ஒருவரைக் கைது செய்துள்ளனர்.
இதனையடுத்து முன்னெடுக்கப்பட்ட மேலதிக விசாரணைகளின் அடிப்படையில், மேலும் ஒரு சந்தேகநபர் கைது செய்யப்பட்டுள்ளார்.
அவரிடமிருந்து 12 போலி சாரதி அனுமதிப்பத்திரங்களும், 8 போலியான தேசிய அடையாள அட்டைகளும் கைப்பற்றப்பட்டதாக பொலிஸார் தெரிவித்துள்ளனர்.
கைது செய்யப்பட்ட இருவரும் 32 மற்றும் 52 வயதுடையவர்கள் எனவும், அவர்கள் அங்கொடை மற்றும் நாரஹேன்பிட்டி பகுதிகளைச் சேர்ந்தவர்கள் எனவும் தெரிவிக்கப்பட்டுள்ளது.
சம்பவம் தொடர்பான மேலதிக விசாரணைகளை நுகேகொடை பிரிவின் குற்ற விசாரணைப் பணியக அதிகாரிகள் முன்னெடுத்து வருகின்றனர்.
