நெதர்லாந்து வேலைவாய்ப்பு விசா தொடர்பில் மோசடி – பொதுமக்களுக்கு அந்நாட்டு தூதரகம் எச்சரிக்கை

நெதர்லாந்தில் வேலைவாய்ப்புகளைப் பெற்றுத் தருவதாகக் கூறி முன்னெடுக்கப்படும் மோசடிகள் தொடர்பில் இலங்கையில் உள்ள நெதர்லாந்து தூதரகம் பொதுமக்களுக்கு எச்சரிக்கை விடுத்துள்ளது.

இவ்வாறான மோசடிகளில் சிக்கி ஏற்கனவே பலர் பாதிக்கப்பட்டுள்ளதாக தூதரகம் தெரிவித்துள்ளது.

இது தொடர்பாக இன்று வியாழக்கிழமை (12) வெளியிட்டுள்ள அறிக்கையில், நெதர்லாந்தில் வேலைவாய்ப்புகளைப் பெற்றுத் தருவதாகப் பொய்யான வாக்குறுதிகளை வழங்கி, வேலை தேடுபவர்களை சில தரப்பினர் ஏமாற்றி வருவதாகக் குறிப்பிடப்பட்டுள்ளது.

மேலும், நெதர்லாந்து குடிவரவு அதிகாரிகளால் வழங்கப்பட்டவை எனக் கூறப்படும் போலியான கடிதங்களும் புழக்கத்தில் விடப்படுவதாகத் தூதரகம் சுட்டிக்காட்டியுள்ளது.

பொதுவாக, பெரும்பாலான வேலைவாய்ப்புகளுக்காக நெதர்லாந்து வேலை விசாக்களை வழங்குவதில்லை எனத் தெரிவித்துள்ள தூதரகம், உயர்திறன் கொண்ட தொழில்கள் மற்றும் உயர் தொழில்நுட்பத் துறைகள் உள்ளிட்ட சில விதிவிலக்கான சந்தர்ப்பங்களில் உண்மையான வேலைவாய்ப்புகள் காணப்படலாம் என்றும் விளக்கமளித்துள்ளது.

அதேவேளை, நெதர்லாந்தில் வேலைவாய்ப்புகளைப் பெற்றுக்கொடுக்கும் ஆட்சேர்ப்பு நடவடிக்கைகளில் தூதரகம் ஈடுபடுவதில்லை என்றும் வலியுறுத்தியுள்ளது.

எனவே, வேலைவாய்ப்புகளைப் பெற்றுத் தருவதாகக் கூறுபவர்களுக்கு பணம் செலுத்துவதற்கு முன்னர், சம்பந்தப்பட்ட நிறுவனங்களுடன் நேரடியாகத் தொடர்புகொண்டு வேலைவாய்ப்பின் உண்மைத்தன்மையை உறுதிப்படுத்துமாறு இலங்கையர்களிடம் தூதரகம் கேட்டுக்கொண்டுள்ளது.

இவ்வாறான மோசடிகளால் பாதிக்கப்பட்டவர்கள் உடனடியாக இலங்கைச் சட்ட அமுலாக்க அதிகாரிகளின் உதவியை நாடி சட்ட நடவடிக்கைகளை மேற்கொள்ளுமாறும் அறிவுறுத்தப்பட்டுள்ளது.