போதைப்பொருள் கடத்தல் மூலம் ஈட்டியதாகச் சந்தேகம் – ரூ. 3.3 கோடி பெறுமதியான சொத்துக்கள் முடக்கம்!

போதைப்பொருள் கடத்தல் மூலம் ஈட்டப்பட்ட பணத்தில் கொள்வனவு செய்யப்பட்டதாகச் சந்தேகிக்கப்படும் சுமார் 33 மில்லியன் ரூபாய் பெறுமதியான சொத்துக்கள் மற்றும் பேருந்து ஒன்றை பொலிஸார் இரண்டு தனித்தனி விசாரணைகளின் கீழ் முடக்கியுள்ளனர்.

சட்டவிரோத சொத்துக்கள் விசாரணைப் பிரிவினர், போதைப்பொருள் கடத்தல் தொடர்பான விசாரணையின் அடிப்படையில், பாணந்துறை, எலுவில பிரதேசத்தைச் சேர்ந்த 45 வயதுடைய ஒருவரை கடந்த ஒக்டோபர் 23ஆம் திகதி கைது செய்துள்ளனர்.

இதனைத் தொடர்ந்து, பாணந்துறை, மாளமுல்ல பகுதியில் அமைந்துள்ள சுமார் 20 மில்லியன் ரூபாய் பெறுமதியான இரண்டு மாடி வீடு மற்றும் 13 பேர்ச்சஸ் காணி ஆகியவற்றுடன், மேலும் இரண்டு காணிகளையும் பொலிஸார் முடக்கியுள்ளனர். குறித்த இரண்டு காணிகளினதும் மொத்தப் பெறுமதி சுமார் 5 மில்லியன் ரூபாய் எனத் தெரிவிக்கப்படுகிறது.

இவ்வாறு முடக்கப்பட்ட சொத்துக்களின் மொத்தப் பெறுமதி சுமார் 25 மில்லியன் ரூபாய் ஆகும். இந்தச் சொத்துக்கள் கடந்த ஒக்டோபர் 23ஆம் திகதி முதல் 14 நாட்களுக்கு முடக்கப்பட்டுள்ளன.

கைது செய்யப்பட்ட சந்தேகநபர் இன்று (ஒக்டோபர் 24) பாணந்துறை நீதவான் நீதிமன்றத்தில் முன்னிலைப்படுத்தப்படவுள்ளார்.

இதற்கிடையில், மேலும் 8 மில்லியன் ரூபாய் பெறுமதியான பேருந்து ஒன்றையும் பொலிஸார் முடக்கியுள்ளனர்.

போதைப்பொருள் கடத்தல் மூலம் ஈட்டப்பட்ட பணத்தில் கொள்வனவு செய்யப்பட்டிருக்கலாம் எனச் சந்தேகிக்கப்படும் இந்தப் பேருந்து, தலங்கம பகுதியில் கடந்த பெப்ரவரி 13ஆம் திகதி வாகனத் தரிப்பிடமொன்றில் இடம்பெற்ற தம்பதியினரின் இரட்டைக் கொலைச் சம்பவம் தொடர்பான விசாரணைகளின்போது ஏற்கனவே பொலிஸாரால் கைப்பற்றப்பட்டிருந்தது.

குறித்த இரட்டைக் கொலைச் சம்பவத்தில் துப்பாக்கிச் சூடு நடத்திய நபரை ஏற்றிச் செல்வதற்குப் பயன்படுத்தப்பட்ட வாகனம் இந்தப் பேருந்தாக இருக்கலாம் என விசாரணையாளர்கள் சந்தேகிக்கின்றனர்.

இந்த இரண்டு சம்பவங்கள் தொடர்பிலும் சட்டவிரோத சொத்துக்கள் விசாரணைப் பிரிவினர் மேலதிக விசாரணைகளை முன்னெடுத்து வருகின்றனர்.