பொரளை டி.எஸ். சேனநாயக்க சந்தியில் இன்று இரவு முதல் வீதி மூடல்
கொழும்பு, பொரளை பொலிஸ் பிரிவுக்குட்பட்ட டி.எஸ். சேனநாயக்க சந்தியில் இன்று (20) இரவு 10 மணி முதல் தற்காலிகமாக வீதி மூடப்படவுள்ளதாக பொலிஸ் போக்குவரத்துப் பிரிவு அறிவித்துள்ளது.
குறித்த வீதியின் கொழும்பு நோக்கிச் செல்லும் பாதையே இவ்வாறு மூடப்படவுள்ளது.
குறித்த பகுதியில் கழிவுநீர் கட்டமைப்பில் ஏற்பட்டுள்ள நீர் வழிந்தோடும் பிரச்சினையைச் சீரமைப்பதற்காக கொழும்பு மாநகர சபையினால் மேற்கொள்ளப்படவுள்ள திருத்தப் பணிகள் காரணமாக இந்த நடவடிக்கை எடுக்கப்பட்டுள்ளது.
திருத்தப் பணிகள் நிறைவடையும் வரை குறித்த வீதி மூடப்பட்டிருக்கும் என பொலிஸ் ஊடகப் பிரிவு தெரிவித்துள்ளது.
இதனால், வாகன சாரதிகள் மாற்று வீதிகளைப் பயன்படுத்துமாறு பொலிஸார் அறிவுறுத்தியுள்ளனர்.
வெலிக்கடை திசையிலிருந்து பயணிக்கும் வாகனங்கள் ஆயுர்வேத சந்தியிலிருந்து கொட்டா வீதிக்குத் திரும்பி பொரளை நோக்கிப் பயணிக்க முடியும்.
அதேபோன்று, மொடல் பார்ம் சந்தியிலிருந்து பழைய பொரளை வீதி வழியாக கனத்த சுற்றுவட்டத்தை நோக்கியும் பயணிக்க முடியும் என அறிவிக்கப்பட்டுள்ளது.