பிரைம் மெல்வாவுக்கு மூலோபாய முக்கியத்துவம் வாய்ந்த வர்த்தக அந்தஸ்து
கொழும்பு துறைமுக நகரப் பொருளாதார ஆணைக்குழுச் சட்டத்தின் கீழ், பிரைம் மெல்வா (தனியார்) லிமிடெட் நிறுவனத்தை மூலோபாய முக்கியத்துவம் வாய்ந்த முதன்மை வர்த்தக நிறுவனமாகப் பிரகடனப்படுத்துவதற்கான உத்தரவை நாடாளுமன்றத்தில் சமர்ப்பிக்க அரசாங்கம் அனுமதி வழங்கியுள்ளது.
இதன் மூலம் குறித்த நிறுவனத்துக்கு சட்டத்தின் ஏற்பாடுகளுக்கு அமைய வரிச் சலுகைகள் உள்ளிட்ட பல்வேறு ஊக்குவிப்புகளைப் பெற்றுக்கொள்ளும் வாய்ப்பு கிடைக்கும்.
2021ஆம் ஆண்டின் 11ஆம் இலக்க கொழும்பு துறைமுக நகரப் பொருளாதார ஆணைக்குழுச் சட்டத்தின் கீழ், பிரைம் மெல்வா நிறுவனத்துக்கு இந்த மூலோபாய வர்த்தக அந்தஸ்தை வழங்குவதற்கான ஆரம்ப அனுமதி கடந்த 2026 செப்டெம்பர் 14ஆம் திகதி வழங்கப்பட்டிருந்தது.
இதனைத் தொடர்ந்து, குறித்த நிறுவனத்தை மூலோபாய முக்கியத்துவம் வாய்ந்த முதன்மை வர்த்தக நிறுவனமாகப் பிரகடனப்படுத்தும் உத்தரவு, 2026 செப்டெம்பர் 23ஆம் திகதிய 2507/47ஆம் இலக்க அதிவிசேட வர்த்தமானி அறிவித்தல் மூலம் வெளியிடப்பட்டது.
இந்நிலையில், குறித்த உத்தரவை நாடாளுமன்றத்தின் அங்கீகாரத்துக்காகச் சமர்ப்பிப்பதற்கு அமைச்சரவை அனுமதி வழங்கியுள்ளது.
நிதி, திட்டமிடல் மற்றும் பொருளாதார அபிவிருத்தி அமைச்சராகவும் செயற்படும் ஜனாதிபதி அநுரகுமார திஸாநாயக்கவினால் முன்வைக்கப்பட்ட யோசனைக்கே அமைச்சரவை இந்த அனுமதியை வழங்கியுள்ளது.
கொழும்பு துறைமுக நகரப் பொருளாதார ஆணைக்குழுச் சட்டத்தின் கீழ் நிறுவனத்துக்கு வழங்கப்பட்டுள்ள மூலோபாய வர்த்தக அந்தஸ்தை சட்டரீதியாக உறுதிப்படுத்தும் நடைமுறையின் ஒரு கட்டமாக இந்த நடவடிக்கை முன்னெடுக்கப்படுகின்றது.