ரணில் நாட்டை வங்குரோத்து நிலையிலிருந்து மீட்டதாகக் கூறுவது பொய் – அமைச்சர் நளிந்த ஜயதிஸ்ஸ
முன்னாள் ஜனாதிபதி ரணில் விக்ரமசிங்க நாட்டை வங்குரோத்து நிலையிலிருந்து மீட்டு, வலுவான பொருளாதாரக் கையிருப்புடன் தற்போதைய அரசாங்கத்திடம் ஒப்படைத்ததாகக் கூறப்படுவது முற்றிலும் பொய்யான தகவல் என அமைச்சரவைப் பேச்சாளரும் அமைச்சருமான நளிந்த ஜயதிஸ்ஸ தெரிவித்துள்ளார்.
கொழும்பிலுள்ள அரசாங்க தகவல் திணைக்களத்தில் இன்று (17) செவ்வாய்க்கிழமை நடைபெற்ற வாராந்த அமைச்சரவைத் தீர்மானங்களை அறிவிக்கும் ஊடகவியலாளர் சந்திப்பில் அவர் இதனைத் தெரிவித்தார்.
இதன்போது மேலும் கருத்துத் தெரிவித்த அவர், 2022ஆம் ஆண்டில் இலங்கை தனது கடன்களைச் செலுத்த முடியாத நிலைக்குச் சென்றமை தெளிவான உண்மையாகும். எனினும், தற்போதைய அரசாங்கம் 2024ஆம் ஆண்டுக்குப் பின்னரே ஆட்சிப் பொறுப்பை ஏற்றுக்கொண்டது என்றார்.
ரணில் விக்ரமசிங்க நாட்டின் பொருளாதாரத்தை ஸ்திரப்படுத்தி, வலுவான கையிருப்புடன் நாட்டை ஒப்படைத்திருந்தால், சர்வதேச பொருளாதாரத் தரப்படுத்தல்களில் இலங்கை முன்னேற்றம் கண்டிருக்க வேண்டும். ஆனால், அவ்வாறான முன்னேற்றம் ஏற்படவில்லை எனவும் அவர் சுட்டிக்காட்டினார்.
மேலும், 2017ஆம் ஆண்டில் ரணில் விக்ரமசிங்க பிரதமராகப் பதவி வகித்த காலத்திலும் அரசாங்கத்தின் மொத்த வருமானத்துக்கும், கடன்களுக்கான வட்டிச் செலவுகளைத் தவிர்த்த ஏனைய செலவுகளுக்கும் இடையிலான நேர்மறையான நிதி வேறுபாடு குறைவாகவே காணப்பட்டது எனக் குறிப்பிட்டார்.
அந்தக் காலப்பகுதியில் திறைசேரியில் போதிய நிதி இருந்ததாகக் கூறப்படுவது உண்மையென்றால், ஏன் அரச ஊழியர்களின் சம்பளம் அதிகரிக்கப்படவில்லை என்றும் அவர் கேள்வி எழுப்பினார்.
வங்குரோத்து நிலையில் இருந்த நாட்டைப் பொறுப்பேற்ற தற்போதைய அரசாங்கம், பல்வேறு பொருளாதாரச் சவால்களுக்கு மத்தியிலும் மக்களுக்குத் தேவையான சம்பள அதிகரிப்புகளையும் நிவாரணங்களையும் படிப்படியாக வழங்கி வருவதாகவும் அமைச்சர் தெரிவித்தார்.
எதிர்காலத்திலும் மக்களின் நலனை முன்னிறுத்தி இவ்வாறான சாதகமான செயற்திட்டங்களை அரசாங்கம் தொடர்ந்து முன்னெடுக்கும் என்றும் அவர் மேலும் குறிப்பிட்டார்.