பிரகீத் எக்னலிகொடவுடன் தொடர்பு: விடுதலைப் புலிகள் அமைப்பின் உறுப்பினர் சாட்சியம்

காணாமல்போன ஊடகவியலாளர் பிரகீத் எக்னலிகொடவுடன் நெருங்கிய தொடர்பு – முன்னாள் புலி உறுப்பினர் நீதிமன்றில் சாட்சியம்

காணாமல்போன ஊடகவியலாளர் பிரகீத் எக்னலிகொடவுடன் நெருங்கிய தொடர்பைப் பேணி வந்ததாகவும், அவருடனான உறவு குறித்து விடுதலைப் புலிகள் அமைப்பின் மூத்த தலைவர்களுக்குத் தெரியப்படுத்தியதாகவும் முன்னாள் விடுதலைப் புலிகள் உறுப்பினர் ஒருவர் உயர் நீதிமன்றில் சாட்சியமளித்துள்ளார்.

எக்னலிகொட கடத்தப்பட்டு காணாமலாக்கப்பட்ட சம்பவம் தொடர்பான வழக்கு விசாரணையின்போது, கடந்த வெள்ளிக்கிழமை (ஒக்டோபர் 16) மூன்று நீதிபதிகள் கொண்ட உயர் நீதிமன்ற அமர்வில் இந்தச் சாட்சியம் பதிவு செய்யப்பட்டது.

சுமதிபால சுரேஷ் குமார் என்ற இயற்பெயரைக் கொண்ட, முரளி என அழைக்கப்படும் சாட்சியாளர், தான் விடுதலைப் புலிகள் அமைப்பில் உறுப்பினராக இருந்த காலத்தில் எக்னலிகொடவுடன் சகோதரத்துவமான உறவைப் பேணி வந்ததாகத் தெரிவித்துள்ளார்.

பாதுகாப்புத் தரப்பு சட்டத்தரணி அசித் சிறிவர்தனவின் குறுக்கு விசாரணையின்போது, போர்க்கால அனுபவங்களை எக்னலிகொடவுடன் பகிர்ந்துகொண்டதாகவும், அவருடனான தனது தொடர்பு குறித்து தமிழ்ச்செல்வன், ஞானவேல் மற்றும் பொட்டு அம்மான் உள்ளிட்ட விடுதலைப் புலிகள் அமைப்பின் மூத்த தலைவர்களுக்குத் தெரியப்படுத்தியதாகவும் முரளி கூறியுள்ளார்.

மேலும், ஹபரணை பகுதியில் ஓர் இடத்தில் எக்னலிகொடவுடன் இடம்பெற்ற உரையாடல் தொடர்பாக ஏற்கெனவே வாக்குமூலம் வழங்கியிருந்தமையையும் அவர் உறுதிப்படுத்தியுள்ளார்.

அந்த உரையாடலின்போது, அப்போதைய ஜனாதிபதி மஹிந்த ராஜபக்ஷ பயணிக்கும் விமானத்தின் மீது ஏவுகணைத் தாக்குதல் நடத்துவதன் மூலம் நாட்டின் தலைமைத்துவத்தை மாற்றக்கூடிய சாத்தியம் குறித்து எக்னலிகொட குறிப்பிட்டதாகச் சாட்சியத்தில் தெரிவிக்கப்பட்டுள்ளது.

எனினும், பிரதி சொலிசிட்டர் ஜெனரல் வசந்த பெரேரா மேலதிகமாகக் கேள்வி எழுப்பியபோது, போரின் முடிவுக்குப் பின்னர் நாட்டில் ஏற்படக்கூடிய அரசியல் மாற்றங்கள் குறித்து இடம்பெற்ற கற்பனையான கலந்துரையாடலின் போதே இந்தக் கருத்து முன்வைக்கப்பட்டதாக முரளி விளக்கமளித்துள்ளார்.

தானும் நாதன் என அடையாளப்படுத்தப்பட்ட மற்றொரு நபரும், போர் முடிவடைந்த பின்னர் அமைதியாக வாழ்வதற்கான சாத்தியக்கூறுகள் குறித்து உரையாடியதாகவும் அவர் தெரிவித்துள்ளார்.

போர் முடிவடைந்திருந்தாலும் நாட்டின் பிரச்சினைகள் இன்னும் தீர்க்கப்படவில்லை என எக்னலிகொட பதிலளித்ததாகவும் முரளி சாட்சியமளித்துள்ளார்.

அரசாங்கம் மேலும் 20 ஆண்டுகளுக்கு ஆட்சியில் நீடிக்கக்கூடும் எனத் தாங்கள் தெரிவித்தபோது, அரசியல் சூழ்நிலைகள் எவ்வளவு விரைவாக மாறக்கூடும் என்பதை விளக்கும் உதாரணமாக, ஜனாதிபதி பயணிக்கும் விமானத்தின் மீது ஏவுகணைத் தாக்குதல் நடத்தப்படுவது குறித்து எக்னலிகொட குறிப்பிட்டதாகவும் அவர் கூறியுள்ளார்.

2010 ஜனவரி மாதம் காணாமல்போன ஊடகவியலாளர் பிரகீத் எக்னலிகொட தொடர்பான வழக்கு விசாரணையின் ஒரு பகுதியாகவே இந்தச் சாட்சியங்கள் பதிவு செய்யப்பட்டுள்ளன.