காலி தேசிய வைத்தியசாலையில் கதிர்வீச்சு அனர்த்த ஒத்திகை!

கதிரியக்கப் பொருட்கள் கசிவினால் ஏற்படக்கூடிய அவசரநிலைகளை எதிர்கொள்வதற்கான தயார் நிலையை மதிப்பிடும் நோக்கில், காலி தேசிய வைத்தியசாலையில் விசேட அனர்த்த முகாமைத்துவ ஒத்திகை நடத்தப்பட்டுள்ளது.

கடந்த ஒக்டோபர் 17ஆம் திகதி நடத்தப்பட்ட இந்த ஒத்திகையில், கதிரியக்கப் பொருட்களை ஏற்றிச் சென்ற லொறியொன்று பயணிகள் பேருந்துடன் மோதியதால் விபத்து ஏற்பட்டதாகக் கற்பனைச் சூழல் உருவாக்கப்பட்டது.

இதன்போது, கதிர்வீச்சினால் பாதிக்கப்பட்டவர்களை விபத்து இடம்பெற்ற இடத்திலிருந்து பாதுகாப்பாக வைத்தியசாலைக்கு அழைத்துச் செல்லும் நடவடிக்கைகள் முன்னெடுக்கப்பட்டன.

அத்துடன், கதிரியக்க மாசுபாட்டுக்கு உள்ளானவர்களைத் தூய்மைப்படுத்தும் நடைமுறைகள் மற்றும் பாதிக்கப்பட்டவர்களுக்கு அவசர மருத்துவச் சிகிச்சைகளை வழங்கும் செயற்பாடுகளும் ஒத்திகை மூலம் பயிற்சி செய்யப்பட்டன.

கதிர்வீச்சு தொடர்பான அனர்த்தங்கள் ஏற்படும் பட்சத்தில், அவசரகாலப் பதிலளிப்புக் குழுக்களுக்கு இடையிலான ஒருங்கிணைப்பை வலுப்படுத்துவதுடன், இவ்வாறான சூழ்நிலைகளைத் திறம்படக் கையாள்வதற்கான தயார் நிலையை மேம்படுத்துவதும் இந்த ஒத்திகையின் பிரதான நோக்கமாகும்.

இந்தப் பயிற்சியில் வைத்தியர்கள், தாதியர்கள் உள்ளிட்ட வைத்தியசாலைப் பணியாளர்கள், காலி பொலிஸார் மற்றும் முப்படையினரும் கலந்துகொண்டனர்.