கொழும்பில் 775 கிராம் கடத்தல் தங்கத்துடன் மூன்று இந்தியப் பிரஜைகள் கைது!

இலங்கைக்கு சுங்க வரி செலுத்தாமல் சட்டவிரோதமாகக் கொண்டுவரப்பட்டதாகக் கூறப்படும் 775 கிராம் தங்கத்துடன் மூன்று இந்தியப் பிரஜைகள் கொழும்பில் கைது செய்யப்பட்டுள்ளனர்.

கொட்டாஞ்சேனை, ஆர்மர் வீதி பகுதியில் அமைந்துள்ள உணவகம் ஒன்றில் கடந்த வெள்ளிக்கிழமை (16) மேற்கொள்ளப்பட்ட சுற்றிவளைப்பின்போதே சந்தேகநபர்கள் கைது செய்யப்பட்டதாகப் பொலிஸார் தெரிவித்துள்ளனர்.

சட்டவிரோதமாகத் தங்கம் கொண்டுவரப்பட்டுள்ளதாகக் கிடைத்த தகவலின் அடிப்படையில், கொட்டாஞ்சேனை பொலிஸ் நிலைய அதிகாரிகளால் இந்தச் சோதனை நடவடிக்கை முன்னெடுக்கப்பட்டுள்ளது.

இதன்போது, 30, 45 மற்றும் 50 வயதுடைய மூன்று இந்தியப் பிரஜைகள் கைது செய்யப்பட்டதுடன், அவர்களிடமிருந்து 775 கிராம் தங்கமும் கைப்பற்றப்பட்டுள்ளது.

சம்பவம் தொடர்பில் கொட்டாஞ்சேனை பொலிஸார் மேலதிக விசாரணைகளை முன்னெடுத்து வருகின்றனர்.