பாலியல் துஷ்பிரயோகக் குற்றச்சாட்டு - அக்கரைப்பற்று முன்னாள் மேயர் சக்கி அதாவுல்லாஹ்வுக்கு விளக்கமறியல் நீடிப்பு!

பெண் அரச அதிகாரி ஒருவரைத் திருமணம் முடிப்பதாக ஆசை வார்த்தைகள் கூறி பாலியல் மற்றும் அதிகாரத் துஷ்பிரயோகம் செய்த குற்றச்சாட்டின் பேரில் கைது செய்யப்பட்ட அக்கரைப்பற்று மாநகர சபையின் முன்னாள் மேயர் சக்கி அதாவுல்லாஹ்வை எதிர்வரும் செப்டம்பர் மாதம் 01 ஆம் திகதி வரை தொடர்ந்தும் விளக்கமறியலில் வைக்குமாறு அக்கரைப்பற்று நீதவான் நீதிமன்றம் உத்தரவிட்டுள்ளது.

இவ்வழக்கு அக்கரைப்பற்று நீதவான் முன்னிலையில் நேற்று புதன்கிழமை (19) விசாரணைக்கு எடுத்துக்கொள்ளப்பட்ட போதே இந்த உத்தரவு பிறப்பிக்கப்பட்டது.

அக்கரைப்பற்று மாநகர சபையின் மேயராக சக்கி அதாவுல்லாஹ் செயற்பட்ட காலத்தில், அங்கு கடமையாற்றிய அக்கரைப்பற்று பள்ளிக்குடியிருப்பைச் சேர்ந்த அரச பெண் உத்தியோகத்தர் ஒருவரைத் திருமணம் முடிப்பதாக வாக்குறுதி அளித்துத் துஷ்பிரயோகத்திற்கு உட்படுத்தியதாகக் குற்றம்சாட்டப்பட்டது. இது குறித்து பாதிக்கப்பட்ட பெண் அண்மையில் சமூகவலைத்தள நேரலை ஊடாக நியாயம் கேட்டிருந்ததோடு, அம்பாறை சிறுவர் மற்றும் மகளிர் பணியகத்திலும் முறைப்பாடு செய்திருந்தார்.

இம்முறைப்பாட்டின் அடிப்படையில் தேடப்பட்டு வந்த சந்தேகநபரான சக்கி அதாவுல்லாஹ், வாக்குமூலம் வழங்குவதற்காகப் பணியகத்திற்கு வருகை தந்த வேளையில், பிரதம பொலிஸ் பரிசோதகர் தயானி கமகே தலைமையிலான குழுவினரால் கைது செய்யப்பட்டார்.

அதனைத் தொடர்ந்து, அதிகாரத் துஷ்பிரயோகம் மற்றும் பாலியல் துஷ்பிரயோகம் தொடர்பில் கைது செய்யப்பட்ட சந்தேகநபருக்கு எதிராக அம்பாறை மாவட்ட பெண்கள் மற்றும் சிறுவர் பிரிவினரால் கடந்த செவ்வாய்க்கிழமை (18) அக்கரைப்பற்று நீதவான் நீதிமன்றில் வழக்குத் தாக்கல் செய்யப்பட்டது.

முன்னதாக ஆகஸ்ட் 19 ஆம் திகதி வரை விளக்கமறியலில் வைக்கப்பட்டிருந்த சந்தேகநபர், சிறைச்சாலை அதிகாரிகளால் நீதிமன்றில் முற்படுத்தப்பட்டபோதே விளக்கமறியலை செப்டம்பர் 01 ஆம் திகதி வரை நீடித்து நீதவான் உத்தரவிட்டார்.

இச்சம்பவம் தொடர்பான மேலதிக விசாரணைகளை அம்பாறை மாவட்ட பெண்கள் மற்றும் சிறுவர் பொலிஸ் பிரிவினர் தீவிரமாக முன்னெடுத்து வருகின்றனர்.