பாகிஸ்தான் பெண் ஊடகவியலாளர் வீட்டில் சடலமாக மீட்பு; கணவர் கொலை செய்ததாக ஒப்புதல்!

பாகிஸ்தானைச் சேர்ந்த தொலைக்காட்சி செய்தி வாசிப்பாளரான ராபியா அஹ்சன் (Rabia Ahsan), ராவல்பிண்டியில் உள்ள அவரது வீட்டில் துப்பாக்கிச் சூட்டுக் காயங்களுடன் சடலமாக மீட்கப்பட்டுள்ளார்.

ஞாயிற்றுக்கிழமை (08) பிற்பகல் இடம்பெற்ற இந்தச் சம்பவம் தொடர்பில், அவரது கணவர் அஹ்சன் தாஹிரை பொலிஸார் கைது செய்து விசாரணைக்கு உட்படுத்தியுள்ளனர். அத்துடன், கொலைக்குப் பயன்படுத்தப்பட்டதாகச் சந்தேகிக்கப்படும் துப்பாக்கியையும் பொலிஸார் கைப்பற்றியுள்ளனர்.

சமூக ஊடகங்களில் பகிரப்பட்டுள்ள முதல் தகவல் அறிக்கையின் (FIR) பிரகாரம், 41 வயதான ராபியா அஹ்சன், பிற்பகல் சுமார் 3 மணியளவில் தனது படுக்கையறையில் வைத்து துப்பாக்கியால் சுட்டுக் கொல்லப்பட்டுள்ளார்.

சம்பவம் இடம்பெற்றபோது, அவருடன் ஒரே வீட்டில் வசித்து வந்த அவரது தாயும் சகோதரியும் வீட்டின் முற்றத்தில் இருந்துள்ளனர்.

துப்பாக்கிச் சத்தத்தைக் கேட்ட ராபியாவின் சகோதரி அல்வினா, உடனடியாக படுக்கையறைக்கு விரைந்துள்ளார். அங்கு ராபியா இரத்த வெள்ளத்தில் தரையில் கிடந்ததையும், அவரது கணவர் கைத்துப்பாக்கியுடன் நின்றிருந்ததையும் கண்டுள்ளார்.

சம்பவ இடத்துக்கு வந்த பொலிஸார் மேற்கொண்ட ஆரம்பகட்ட பரிசோதனையில், ராபியாவின் கழுத்துக்குக் கீழ் ஒரு துப்பாக்கிச் சூட்டுக் காயமும், முதுகின் வலது பக்கத்தில் மற்றொரு காயமும் காணப்பட்டதாகத் தெரிவிக்கப்பட்டுள்ளது.

இதற்கிடையில், ராபியாவைக் கொலை செய்ததாக அவரது கணவர் அஹ்சன் தாஹிர் ஒப்புக்கொண்டுள்ளதாக பாகிஸ்தானின் 'Samaa' ஊடகம் செய்தி வெளியிட்டுள்ளது.

எனினும், சம்பவத்தின்போது துப்பாக்கி தவறுதலாக வெடித்ததாக அஹ்சன் தாஹிர் கூறியதாக வீட்டில் பணிபுரியும் ஆண் பணியாளர் ஒருவர் பொலிஸாரிடம் தெரிவித்துள்ளார்.

கொலைக்குப் பயன்படுத்தப்பட்டதாகச் சந்தேகிக்கப்படும் .30 ரக கைத்துப்பாக்கி மற்றும் அதற்கான தோட்டாக்களை பஞ்சாப் தடயவியல் அறிவியல் அதிகார சபை (PFSA) சம்பவ இடத்திலிருந்து மீட்டுள்ளது.

மேலும், விசாரணையின்போது குறித்த துப்பாக்கியை வைத்திருப்பதற்கான செல்லுபடியாகும் உரிமம் அல்லது அனுமதிப்பத்திரத்தை அஹ்சன் தாஹிர் சமர்ப்பிக்கத் தவறியுள்ளார்.

இதனையடுத்து, பாகிஸ்தான் தண்டனைச் சட்டத்தின் 302ஆவது பிரிவின் கீழ் கொலைக் குற்றச்சாட்டு பதிவு செய்யப்பட்டு வழக்குத் தாக்கல் செய்யப்பட்டுள்ளது.

இச்சம்பவம் தொடர்பில் பாகிஸ்தான் முதல் பெண்மணி ஆசீபா பூட்டோ சர்தாரி ஆழ்ந்த கவலை வெளியிட்டுள்ளதுடன், பெண் ஊடகவியலாளரின் படுகொலைக்கு கடும் கண்டனத்தையும் தெரிவித்துள்ளார்.

இந்தச் சம்பவம் தொடர்பில் பக்கச்சார்பற்ற, வெளிப்படையான மற்றும் முழுமையான விசாரணை நடத்தப்பட வேண்டும் என்றும், குற்றவாளிகள் சட்டத்தின் முன் நிறுத்தப்பட வேண்டும் என்றும் அவர் வலியுறுத்தியுள்ளார்.

மூன்று மாதங்களுக்கும் குறைவான காலப்பகுதிக்கு முன்னர் ஹினா ஜாவேத் என்ற மற்றொரு பெண்ணும் கொலை செய்யப்பட்ட சம்பவத்தை நினைவுகூர்ந்த அவர், அந்த வழக்கின் விசாரணை முடிவுகள் இன்னமும் வெளியாகவில்லை எனவும் சுட்டிக்காட்டியுள்ளார்.

பெண்கள் தங்களது உயிருக்கு அச்சுறுத்தல் இன்றி வாழவும், பணியாற்றவும் கூடிய பாதுகாப்பான சூழல் உறுதிப்படுத்தப்பட வேண்டும் என்றும் அவர் தெரிவித்துள்ளார்.

இரண்டு பெண் பிள்ளைகளின் தாயான ராபியா அஹ்சன், 92 News தொலைக்காட்சியில் பணியாற்றியதாகத் தெரிவிக்கப்படுகிறது. அவரது கணவர் அஹ்சன் தாஹிர், Overseas Pakistanis Foundation (OPF) நிறுவனத்தில் பிரதி பணிப்பாளராகப் பணியாற்றி வருவதாகவும் கூறப்படுகிறது.

இந்தக் கொலைச் சம்பவம் தொடர்பான மேலதிக விசாரணைகளைப் பொலிஸார் தொடர்ந்து முன்னெடுத்து வருகின்றனர்.