நிறுவனங்களுக்கு இறுதி எச்சரிக்கை – ஒரு மில்லியன் ரூபா அபராதம், 10 ஆண்டுகள் சிறை!

இலங்கையில் நிறுவனங்களின் உண்மையான உரிமையாளர்கள் தொடர்பான (Beneficial Ownership) தகவல்களைச் சமர்ப்பிக்கத் தவறிய நிறுவனங்களுக்கு, நிறுவனப் பதிவாளர் திணைக்களம் இறுதி எச்சரிக்கை விடுத்துள்ளது.

குறித்த தகவல்களைச் சமர்ப்பிக்காமல் தொடர்ந்து சட்ட விதிமுறைகளை மீறும் நிறுவனங்களுக்கு எதிராக சட்ட நடவடிக்கை எடுக்கப்படும் என்றும், அதிகபட்சமாக ஒரு மில்லியன் ரூபா அபராதம் அல்லது 10 ஆண்டுகள் வரை சிறைத்தண்டனை விதிக்கப்படலாம் என்றும் திணைக்களம் எச்சரித்துள்ளது.

கடந்த ஒக்டோபர் 28ஆம் திகதி வெளியிடப்பட்ட அறிவித்தலில், நிறுவனங்கள் தமது உரிமையாளர் தொடர்பான தகவல்களைச் சமர்ப்பிப்பதற்காக வழங்கப்பட்டிருந்த நீடிக்கப்பட்ட காலக்கெடு 2026 ஒக்டோபர் 21ஆம் திகதியுடன் நிறைவடைந்துள்ளதாகத் தெரிவிக்கப்பட்டுள்ளது.

இதற்கு முன்னர், செப்டெம்பர் 30ஆம் திகதியாக அறிவிக்கப்பட்டிருந்த காலக்கெடு, ஒக்டோபர் 21ஆம் திகதி வரை நீடிக்கப்பட்டிருந்தது.

இந்நிலையில், இதுவரை உரிய தகவல்களைச் சமர்ப்பிக்காத நிறுவனங்கள் எவ்வித தாமதமுமின்றி நிலுவையிலுள்ள தகவல்களைச் சமர்ப்பிக்குமாறு நிறுவனங்களின் பதிவாளர் நாயகம் அறிவுறுத்தியுள்ளார்.

2007ஆம் ஆண்டின் 7ஆம் இலக்க நிறுவனங்கள் சட்டத்தில், 2025ஆம் ஆண்டின் 12ஆம் இலக்க நிறுவனங்கள் (திருத்தச்) சட்டத்தின் ஊடாக மேற்கொள்ளப்பட்ட திருத்தங்களுக்கு அமைவாக, உண்மையான உரிமையாளர் தொடர்பான தகவல்களைச் சமர்ப்பிப்பது சட்டப்பூர்வக் கடமையாகும்.

இந்தச் சட்ட விதிமுறைகளை மீறுவது குற்றமாகக் கருதப்படும் எனவும், குற்றம் நிரூபிக்கப்பட்டால் ஒரு மில்லியன் ரூபாவுக்கு மேற்படாத அபராதம் அல்லது 10 ஆண்டுகளுக்கு மேற்படாத சிறைத்தண்டனை அல்லது இவ்விரு தண்டனைகளும் விதிக்கப்படலாம் எனவும் திணைக்களம் சுட்டிக்காட்டியுள்ளது.

ஒரு நிறுவனத்தை இறுதியாகச் சொந்தமாகக் கொண்டிருக்கும் அல்லது அதன் கட்டுப்பாட்டைச் செலுத்தும் தனிநபர்களை அடையாளம் காண்பதே இந்த உரிமையாளர் தகவல் வெளிப்படுத்தல் நடைமுறையின் நோக்கமாகும். இதன் மூலம் நிறுவனங்களின் வெளிப்படைத்தன்மை மற்றும் பொறுப்புக்கூறலை மேம்படுத்த முடியும் என எதிர்பார்க்கப்படுகிறது.

எனவே, பாதிக்கப்பட்ட அனைத்து நிறுவனங்களும் நிறுவனப் பதிவாளர் திணைக்களத்தின் Beneficial Ownership System ஊடாக நிலுவையிலுள்ள தகவல்களை உடனடியாகச் சமர்ப்பித்து, தமது பதிவுகளைச் சட்டத்திற்கு அமைவாகச் சீரமைத்துக் கொள்ளுமாறு வலியுறுத்தப்பட்டுள்ளது.