தங்கத்தைப் பறிக்க வர்த்தகரை சித்திரவதை செய்த பொலிஸார் – மூன்று அதிகாரிகளுக்கு உச்ச நீதிமன்றம் அதிரடி உத்தரவு!

தங்க நகை வியாபாரி ஒருவரை உடல் ரீதியாகத் தாக்கி, அச்சுறுத்தி, சட்டவிரோதமாகத் தடுத்து வைத்து, அவரிடமிருந்து தங்கம் மற்றும் பணத்தைப் பெற்றுக்கொண்டதாகக் குற்றஞ்சாட்டப்பட்ட மூன்று பொலிஸ் அதிகாரிகளுக்கு எதிராக இலங்கை உச்ச நீதிமன்றம் தீர்ப்பளித்துள்ளது.

குறித்த மூன்று பொலிஸ் அதிகாரிகளும் வியாபாரியின் அடிப்படை உரிமைகளை மீறியுள்ளதாகத் தீர்மானித்த நீதிமன்றம், ஒவ்வொரு அதிகாரியும் தலா ஒரு இலட்சம் ரூபாவைத் தமது சொந்தப் பணத்திலிருந்து பாதிக்கப்பட்ட வியாபாரிக்கு இழப்பீடாக வழங்குமாறு உத்தரவிட்டுள்ளது. இதன்படி, மொத்தம் மூன்று இலட்சம் ரூபா இழப்பீடாக வழங்கப்பட வேண்டும்.

நீதியரசர்களான ஏ.எல். ஷிரான் குணரத்ன, மஹிந்த சமயவர்தன மற்றும் மேனகா விஜேசுந்தர ஆகியோர் அடங்கிய மூவரடங்கிய நீதியரசர் குழாம் இந்தத் தீர்ப்பை வழங்கியுள்ளது.

குளியாப்பிட்டியவைச் சேர்ந்த நகைக்கடை உரிமையாளரான சாஹுல் ஹமீட் சஷேக் என்றழைக்கப்படும் ஷவுல் ஹமீட் மொஹமட் சுபைக் என்பவரே இந்த அடிப்படை உரிமை மனுவைத் தாக்கல் செய்திருந்தார்.

தாம் அறியாமல் கொள்வனவு செய்த தங்கம் தொடர்பான பொலிஸ் விசாரணையின்போது, நீர்கொழும்பு பிரதேச குற்றப் புலனாய்வுப் பிரிவைச் சேர்ந்த அதிகாரிகள் தம்மைத் தாக்கி அச்சுறுத்தியதாக அவர் தனது மனுவில் குறிப்பிட்டிருந்தார்.

வியாபாரி வீட்டில் இல்லாத நேரத்தில் அங்கு சென்ற பொலிஸார், அவர் உடனடியாகத் திரும்பி வராவிட்டால் அவரது மனைவி மற்றும் பிள்ளைகளைக் கைது செய்வதாக அச்சுறுத்தியதாகவும் மனுவில் தெரிவிக்கப்பட்டுள்ளது.

இதனையடுத்து வீடு திரும்பிய தம்மைக் கைவிலங்கிட்டு, மனைவி மற்றும் பிள்ளைகள் முன்னிலையில் முழந்தாளிடச் செய்து கடுமையாகத் தாக்கியதாகவும் அவர் குற்றஞ்சாட்டியிருந்தார்.

மேலும், வாகனத்திற்குள் வைத்தும் தொடர்ச்சியாகத் தாக்கிய பொலிஸார், தங்கம் மற்றும் பணத்தைத் தங்களிடம் ஒப்படைக்குமாறு வற்புறுத்தியதாகவும் அவர் தெரிவித்துள்ளார்.

தனது நகைக்கடையில் பொருத்தப்பட்டிருந்த சிசிடிவி கமராக்களில் தங்கம் ஒப்படைக்கப்பட்ட சம்பவத்தின் ஒரு பகுதி பதிவாகியுள்ளதாகவும் மனுதாரர் சுட்டிக்காட்டியிருந்தார்.

அத்துடன், தம்மை மதுபானம் அருந்துமாறு பொலிஸார் வற்புறுத்தியதுடன், தாக்குதல் தொடர்பில் மருத்துவ அதிகாரிகளிடமோ நீதிமன்றத்திலோ முறைப்பாடு செய்யக்கூடாது எனவும் அச்சுறுத்தியதாகக் குற்றஞ்சாட்டியிருந்தார்.

எனினும், பொலிஸ் அதிகாரிகள் இந்தக் குற்றச்சாட்டுகளை நிராகரித்ததுடன், விசாரணையின் ஒரு பகுதியாகவே வியாபாரி சட்டபூர்வமாகக் கைது செய்யப்பட்டதாகவும், அவரிடமிருந்து தங்கப் பொருட்கள் மற்றும் வெளிநாட்டு நாணயங்கள் மீட்கப்பட்டதாகவும் தெரிவித்திருந்தனர்.

ஆனால், மனுதாரர் சமர்ப்பித்த சாட்சியங்கள், மருத்துவ அறிக்கைகள் மற்றும் ஆவணங்களைப் பரிசீலித்த உச்ச நீதிமன்றம், பொலிஸ் அதிகாரிகளின் விளக்கங்களை ஏற்றுக்கொள்ள மறுத்துள்ளது.

மனுதாரரின் குற்றச்சாட்டுகளை நிராகரிப்பதற்குப் பொலிஸ் அதிகாரிகள் முன்வைத்த மறுப்புகள் நம்பகத்தன்மை வாய்ந்தவையாக இல்லை என நீதியரசி மேனகா விஜேசுந்தர தனது தீர்ப்பில் குறிப்பிட்டுள்ளார்.

இதன்படி, பொலிஸ் பரிசோதகர் டி.ஆர்.ஏ. கிஹான் மனோஹர மற்றும் பொலிஸ் உத்தியோகத்தர்களான எம்.ஏ. அமல் சஞ்சீவ, வி.ஜி. பண்டார ஆகிய மூவரும் அரசியலமைப்பின் 11, 12(1) மற்றும் 13(2) ஆகிய உறுப்புரைகளின் கீழ் உறுதிப்படுத்தப்பட்டுள்ள மனுதாரரின் அடிப்படை உரிமைகளை மீறியுள்ளதாக நீதிமன்றம் தீர்மானித்துள்ளது.

ஒவ்வொரு அதிகாரியும் தலா ஒரு இலட்சம் ரூபாவை ஆறு மாதங்களுக்குள் பாதிக்கப்பட்ட வியாபாரிக்கு வழங்க வேண்டும் எனவும் உச்ச நீதிமன்றம் உத்தரவிட்டுள்ளது.

நீதியரசி மேனகா விஜேசுந்தர வழங்கிய தீர்ப்புடன் ஏனைய இரு நீதியரசர்களான ஏ.எல். ஷிரான் குணரத்ன மற்றும் மஹிந்த சமயவர்தன ஆகியோரும் இணக்கம் தெரிவித்துள்ளனர்.