‘டோரதி’ திரைப்படம்: கார்த்திக் சுப்புராஜுக்கு திருநர்கள் சமூகம் வரவேற்பு

இயக்குநர் கார்த்திக் சுப்புராஜ் இயக்கத்தில் அண்மையில் வெளியான ‘டோரதி’ (Dorathy) திரைப்படம், திருநங்கைகளின் நிஜ வாழ்க்கை யதார்த்தங்களை மிகத் துல்லியமாகப் பிரதிபலிப்பதாகத் தெரிவித்துள்ள திருநர்கள் சமூகம், அப்படத்திற்குத் தங்களது ஆதரவை வெளிப்படுத்தியுள்ளது.

கடந்த செப்டம்பர் 25-ஆம் திகதி திரையரங்குகளில் வெளியாகி வெற்றிகரமாக ஓடிக் கொண்டிருக்கும் இத்திரைப்படத்திற்கு சமூக வலைத்தளங்களில் ஆதரவாகவும் எதிராகவும் பல்வேறு கருத்துகள் பகிரப்பட்டு வருகின்றன. இந்நிலையில், படத்தின் மீதான எதிர்மறை விமர்சனங்களுக்குப் பதிலளிக்கும் வகையில் திருநங்கைகள் தரப்பில் செய்தியாளர் சந்திப்பு மற்றும் கருத்துப் பகிர்வுகள் மேற்கொள்ளப்பட்டுள்ளன.

இது குறித்து கருத்து தெரிவித்துள்ள திருநர்கள் சமூகத்தினர், குழந்தைப் பருவத்தில் இருந்து தாம் சந்திக்கும் சவால்கள் மற்றும் வாழ்வியல் அனுபவங்களை ‘டோரதி’ திரைப்படம் மிகச் சரியாக வெளிப்படுத்தியுள்ளதாகக் குறிப்பிட்டுள்ளனர். ஓர் அமைப்பாகத் தங்களால் செய்ய முடியாத விழிப்புணர்வை இத்திரைப்படம் மக்கள் மத்தியில் சேர்த்துள்ளதாகத் தெரிவித்துள்ள அவர்கள், இயக்குநர் கார்த்திக் சுப்புராஜுக்குத் தங்களது மனமார்ந்த நன்றிகளையும் தெரிவித்துக் கொண்டனர்.

பாலினக் கல்வியின் அவசியம்:

இது தொடர்பாகக் கருத்து வெளியிட்ட கலைமாமணி சுதா, "எங்களைப் போன்ற திருநர் சமூகத்தினர் குழந்தைப் பருவத்தில் இருந்து எப்படிப்பட்ட வாழ்க்கையை எதிர்கொள்கிறார்கள் என்பதை உலகம் அறியும் வகையில் இத்திரைப்படம் உருவாக்கப்பட்டுள்ளது. அதேநேரத்தில், சமூகத்தில் பாலினத்திற்கும் பாலியல் விருப்பத்திற்கும் இடையிலான வேறுபாடுகளில் குழப்பம் நிலவுகிறது. இதற்குச் சரியான பாலினக் கல்வி சார்ந்த புரிதல் அவசியமாகும்," எனக் கூறினார்.

மற்றொரு திருநங்கையான மேக்னா தெரிவிக்கையில், சமூகத்தின் எதிர்பார்ப்புகளுக்கு ஏற்ப வாழ்வதற்காகத் தனது உண்மையான அடையாளத்தைச் சுமார் 15 ஆண்டுகள் மறைத்து வாழ வேண்டியிருந்ததாகக் குறிப்பிட்டார். இத்திரைப்படம் தங்களது சமூகத்தின் உண்மை நிலையை உலகுக்கு உணர்த்தியுள்ளதால், பொதுமக்கள் அனைவரும் எதிர்மறை எண்ணங்களைத் தவிர்த்து, இப்படத்தின் பின்னணியில் உள்ள நல்ல நோக்கத்தைப் புரிந்து கொள்ள வேண்டும் என்றும் அவர் வேண்டுகோள் விடுத்தார்.

திரைப்படப் பின்னணி:

இயக்குநர் கார்த்திக் சுப்புராஜின் 10-வது படைப்பான ‘டோரதி’ திரைப்படத்திற்கு இசைஞானி இளையராஜா இசையமைத்துள்ளார். கீர்த்தி சுரேஷ், சனத், ரிஷிகாந்த் ஆகியோர் முதன்மைப் பாத்திரங்களில் நடித்துள்ள இத்திரைப்படத்தை, ஜியோ ஸ்டுடியோஸ் (Jio Studios) மற்றும் சிக்யா என்டர்டெயின்மென்ட் (Sikya Entertainment) நிறுவனங்களுடன் இணைந்து கார்த்திக் சுப்புராஜின் 'தம்மம் பிலிம்ஸ்' தயாரித்துள்ளது.

இப்படத்திற்கு எஸ். திருநாவுக்கரசு ஒளிப்பதிவு செய்ய, கணேஷ் சிவா படத்தொகுப்பு பணிகளையும், தினேஷ் சுப்புராயன் சண்டைப் பயிற்சி பணிகளையும் மேற்கொண்டுள்ளமை குறிப்பிடத்தக்கது.