டெல்லியில் ராவணன் உருவ பொம்மையுடன் 30 அடி உயர கரப்பான்பூச்சி பொம்மையும் எரிக்கத் திட்டம்!
இந்தியத் தலைநகர் டெல்லியில் தசரா பண்டிகையை முன்னிட்டு ராவணன் உருவ பொம்மையுடன் 30 அடி உயர கரப்பான்பூச்சி உருவ பொம்மையையும் எரிப்பதற்குத் தீர்மானிக்கப்பட்டுள்ளது.
வடமேற்கு டெல்லியின் பிதாம்புரா பகுதியில் நடைபெறவுள்ள ராம்லீலா நிகழ்வை ஏற்பாடு செய்யும் ‘ஸ்ரீ கேசவ் ராம் லீலா கமிட்டி’ இந்த முடிவை எடுத்துள்ளது.
டெல்லியில் தசரா பண்டிகையின்போது ராவணன், கும்பகர்ணன், மேகநாதன் ஆகியோரின் உருவ பொம்மைகள் எரிக்கப்படுவது வழக்கம். இம்முறை அவற்றுடன் 30 அடி உயர கரப்பான்பூச்சி உருவ பொம்மையையும் எரிக்கத் திட்டமிடப்பட்டுள்ளது.
கரப்பான்பூச்சி உருவ பொம்மையை எரிப்பதற்கு அரசியல் பின்னணி இருப்பதாகக் கருதப்படும் நிலையில், இதற்கு அரசியல் உள்நோக்கம் எதுவும் இல்லை என ஏற்பாட்டுக் குழுவின் தலைவரும் பாஜக சட்டமன்ற உறுப்பினருமான அசோக் கோயல் தெரிவித்துள்ளார்.
தூய்மை விழிப்புணர்வுக்காக என விளக்கம்
இதுகுறித்து ஸ்ரீ கேசவ் ராம் லீலா கமிட்டி வெளியிட்டுள்ள அறிக்கையில், கரப்பான்பூச்சி அழுக்கு மற்றும் அசுத்தத்தின் அடையாளமாகக் கருதப்படுவதாகக் குறிப்பிடப்பட்டுள்ளது.
தூய்மை இந்தியா, தூய்மை டெல்லி ஆகிய பிரசாரங்கள் தொடர்பில் மக்களிடையே விழிப்புணர்வை ஏற்படுத்துவதுடன், தீமையின் மீது நன்மை வெற்றி பெறுவதை எடுத்துரைக்கும் நோக்கிலும் இந்த உருவ பொம்மை எரிக்கப்படவுள்ளதாகக் குழு தெரிவித்துள்ளது.
தேர்தல் ஆணையருக்கு எதிரான போராட்டங்களால் பரபரப்பு
இந்தியத் தலைமைத் தேர்தல் ஆணையர் ஞானேஷ் குமாருக்கு எதிராக ‘கரப்பான்பூச்சி ஜனதா கட்சி’ (CJP) என்ற அமைப்பு டெல்லியில் தொடர் போராட்டங்களை முன்னெடுத்து வருகிறது.
வாக்காளர் பட்டியலில் முறைகேடுகள் இடம்பெற்றுள்ளதாகக் குற்றஞ்சாட்டி நடத்தப்படும் இந்தப் போராட்டங்களின் காரணமாக, கரப்பான்பூச்சி உருவம் ஆளும் அரசியல் தரப்புக்கு எதிரான அடையாளமாக மாறியுள்ளதாகக் கூறப்படுகிறது.
இத்தகைய அரசியல் சூழலில் கரப்பான்பூச்சி உருவ பொம்மையை எரிப்பதற்கான அறிவிப்பு வெளியாகியுள்ளமை கவனத்தை ஈர்த்துள்ளது.
போராட்டங்களால் வியாபாரம் பாதிப்பு எனக் குற்றச்சாட்டு
இதற்கிடையில், டெல்லியில் நடைபெறும் போராட்டங்கள் மற்றும் அவற்றையொட்டி விதிக்கப்படும் போக்குவரத்துக் கட்டுப்பாடுகளால் வியாபாரம் பாதிக்கப்படுவதாக வர்த்தகர்கள் புகார் தெரிவித்துள்ளனர்.
போராட்டங்கள் காரணமாக வாடிக்கையாளர்கள் சந்தைகளுக்குச் செல்வதில் சிரமம் ஏற்படுவதாகவும், இதனால் சிறு வணிகர்களின் வாழ்வாதாரம் பாதிக்கப்படுவதாகவும் பாலிகா பஜார் வர்த்தகர்கள் குறிப்பிட்டுள்ளனர். இதுதொடர்பாக வர்த்தகர்கள் சங்கம் சார்பில் டெல்லி நீதிமன்றத்திலும் வழக்குத் தொடரப்பட்டுள்ளது.
மேலும், டெல்லியின் முக்கிய வர்த்தக அமைப்பான ‘சேம்பர் ஒஃப் டிரேட் அண்ட் இன்டஸ்ட்ரீஸ்’ (CTI), மத்திய உள்துறை அமைச்சர் அமித் ஷாவுக்கு கடிதம் ஒன்றை அனுப்பியுள்ளது.
அந்தக் கடிதத்தில், போராட்டங்களால் டெல்லி வர்த்தகர்களுக்கு நாளொன்றுக்கு சுமார் 2,000 கோடி ரூபாய் இழப்பு ஏற்படுவதாகக் குறிப்பிடப்பட்டுள்ளது.
தீபாவளி பண்டிகை வரையாவது இத்தகைய போராட்டங்களுக்குத் தடை விதிக்க வேண்டும் என்றும் அந்த அமைப்பு கோரிக்கை விடுத்துள்ளது.
