ஜே.பி. மோர்கன் புதிய பிணைமுறிச் சுட்டெண்: இலங்கைக்கு 7.5% பங்களிப்பு!

சர்வதேச ரீதியில் புகழ்பெற்ற ஜே.பி. மோர்கன் (J.P. Morgan) நிதி நிறுவனத்தின் புதிய எல்லைப்புறச் சந்தை உள்ளூர் நாணய அரச பிணைமுறிச் சுட்டெண்ணில் இலங்கைக்கு 7.5 சதவீத பங்களிப்பு விகிதம் ஒதுக்கப்பட்டுள்ளது. இதன் மூலம் இச்சுட்டெண்ணில் மிக உயர்ந்த பங்களிப்பைப் பெற்றுள்ள பிரதான நாடுகளில் ஒன்றாக இலங்கை பரிணமித்துள்ளது.

‘வளர்ந்துவரும் சந்தைகளுக்கான எல்லைப்புற அரச பிணைமுறிச் சுட்டெண்’ (GBI-EM Edge) என அழைக்கப்படும் இந்தப் புதிய சுட்டெண், வரும் செப்டம்பர் மாத இறுதிக்குள் உத்தியோகபூர்வமாக அறிமுகப்படுத்தப்படவுள்ளது. இது 26 எல்லைப்புறச் சந்தைகளில் உள்ள சுமார் 330 பில்லியன் அமெரிக்க டொலர் பெறுமதியான அரச பிணைமுறைகளைக் கண்காணிக்கும்.

இச்சுட்டெண்ணில் ஒரு நாட்டிற்கு வழங்கப்படக்கூடிய அதிகபட்ச பங்களிப்பு விகிதம் 8 சதவீதமாகும். அந்த வகையில், இலங்கைக்கு வழங்கப்பட்டுள்ள 7.5 சதவீத பங்களிப்பானது மிக உயர் மட்டத்தில் அமைந்திருக்கின்றது.

வியட்நாம், எகிப்து, மொரோக்கோ, பாகிஸ்தான், பங்களாதேஷ் மற்றும் கஸகஸ்தான் ஆகிய நாடுகள் அதிகபட்சமாக தலா 8 சதவீத பங்களிப்பைப் பெற்றுள்ள அதேவேளை, நைஜீரியா 7.4 சதவீத பங்களிப்பைக் கொண்டுள்ளது.

சர்வதேச முதலீட்டாளர்களுக்கு வழிகாட்டி

எளிமையாகக் கூறின், சிறிய வளர்ந்துவரும் அல்லது 'எல்லைப்புற' பொருளாதாரங்களின் உள்நாட்டு நாணயங்களில் வெளியிடப்படும் அரச பிணைமுறைகளில் முதலீடு செய்ய விரும்பும் சர்வதேச முதலீட்டாளர்களுக்கு இச்சுட்டெண் ஒரு பிரதான வழிகாட்டியாகச் செயல்படும்.

இச்சுட்டெண்ணில் இலங்கை சேர்க்கப்பட்டுள்ளதன் மூலம், இலங்கை ரூபாய் மதிப்பிலான அரச பிணைமுறைகள் சர்வதேச நிதிச் சந்தையில் கணிசமான முக்கியத்துவத்தைப் பெறும் சூழல் ஏற்பட்டுள்ளது.

இருப்பினும், 7.5 சதவீத பங்களிப்பு ஒதுக்கீடு என்பது, சர்வதேச முதலீட்டின் 7.5 சதவீதம் தானாகவே இலங்கைக்குள் முதலீடாக வரும் என்பதைக் குறிக்காது. மாறாக, இச்சுட்டெண்ணைப் பின்பற்றி இயங்கும் உலகளாவிய நிதி மேலாளர்கள் , இலங்கைப் பிணைமுறைகளில் எவ்வளவு முதலீடு செய்யலாம் என்பதைத் தீர்மானிப்பதற்கு இந்த ஒதுக்கீட்டை ஒரு சர்வதேச ஒப்பீட்டுச் சான்றாகப் பயன்படுத்துவர்.

நிபந்தனைகளும் எதிர்பார்க்கப்படும் நன்மைகளும்

குறைந்தது 250 மில்லியன் அமெரிக்க டொலருக்குச் சமமான நிலுவை மதிப்பையும், குறைந்தபட்சம் இரண்டரை ஆண்டுகள் எஞ்சிய முதிர்வுக் காலத்தையும் கொண்ட தகுதியுள்ள உள்ளூர் நாணய அரச பிணைமுறைகளே இச்சுட்டெண்ணில் சேர்க்கப்படும். பெரிய சந்தைகள் இச்சுட்டெண்ணை ஆதிக்கம் செலுத்துவதைத் தடுப்பதற்காக, எந்தவொரு தனிப்பட்ட நாட்டின் பங்களிப்பையும் அதிகபட்சமாக 8 சதவீதத்திற்குள் ஜே.பி. மோர்கன் நிறுவனம் கட்டுப்படுத்தியுள்ளது.

இந்தப் புதிய சுட்டெண்ணின் அறிமுகமானது, சர்வதேச முதலீட்டாளர்கள் மத்தியில் இலங்கையின் உள்நாட்டு அரசப் பத்திரங்களுக்கான கவனத்தையும் வரவேற்பையும் கணிசமாக அதிகரிக்கும். மேலும், உலகளாவிய நிதி மேலாளர்கள் பிற எல்லைப்புற நாடுகளின் பிணைமுறைகளுடன் இலங்கையின் பிணைமுறைகளை இலகுவாக ஒப்பிட்டுப் பார்க்கவும் இது வழிவகுக்கும்.