சுரேஷ் சாலே மீண்டும் CID-யிடம் ஒப்படைப்பு: மருத்துவமனை அனுமதி முடிவு
கொழும்பு தேசிய வைத்தியசாலையில் சிகிச்சை பெற்றுவந்த முன்னாள் அரச புலனாய்வுச் சேவையின் (SIS) பணிப்பாளர், ஓய்வுபெற்ற மேஜர் ஜெனரல் சுரேஷ் சாலே, வைத்தியசாலையிலிருந்து வெளியேற்றப்படத் தகுதியான நிலையில் உள்ளதாக மருத்துவக் குழுவினர் சான்றளித்துள்ளனர். இதனையடுத்து, அவர் மீண்டும் குற்றப் புலனாய்வுத் திணைக்களத்தின் (CID) தடுப்புக் காவலில் எடுக்கப்படவுள்ளார்.
ஈஸ்டர் ஞாயிறு பயங்கரவாதத் தாக்குதல்கள் தொடர்பான விசாரணைகள் தொடர்பில், பயங்கரவாதத் தடைச் சட்டத்தின் (PTA) கீழ் கைது செய்யப்பட்டு குற்றப் புலனாய்வுத் திணைக்களத்தின் காவலில் வைக்கப்பட்டிருந்த சுரேஷ் சாலே, கொழும்பு தேசிய வைத்தியசாலையில் அனுமதிக்கப்பட்டு சிகிச்சை பெற்று வந்தார்.
இந்நிலையில், கொழும்பு தேசிய வைத்தியசாலையின் 10 உறுப்பினர்களைக் கொண்ட விசேட மருத்துவக் குழுவினர், சாலேவுக்கான சிகிச்சைகள் நிறைவடைந்துள்ளதாகவும், அவர் வைத்தியசாலையிலிருந்து வெளியேறுவதற்குத் தகுதியான ஆரோக்கிய நிலையில் உள்ளதாகவும் கொழும்பு மேலதிக நீதிவான் நீதிமன்றத்திற்கு அறிக்கை சமர்ப்பித்துள்ளனர்.
குறித்த மருத்துவ மதிப்பீட்டு அறிக்கையை அடுத்து, கூடுதல் சொலிசிட்டர் ஜெனரல் திலீப பீரிஸ் நீதிமன்றத்தில் கருத்துத் தெரிவிக்கையில்; ஓய்வுபெற்ற மேஜர் ஜெனரல் சுரேஷ் சாலே இன்று பிற்பகல் மீண்டும் குற்றப் புலனாய்வுத் திணைக்களத்தினரால் பொறுப்பேற்கப்பட்டு, தொடர்ந்தும் தடுப்புக் காவலில் வைக்கப்படுவார் எனத் தெரிவித்தார்.
