சிறுவனை துஷ்பிரயோகம் செய்தவருக்கு 7 ஆண்டு சிறைத்தண்டனை உறுதி
17 வயது சிறுவனை மோட்டார் சைக்கிளில் அழைத்துச் சென்று பாலியல் துஷ்பிரயோகம் செய்த குற்றச்சாட்டில் நபர் ஒருவருக்கு விதிக்கப்பட்ட ஏழு ஆண்டுகள் கடூழிய சிறைத்தண்டனையை மேன்முறையீட்டு நீதிமன்றம் உறுதி செய்துள்ளது.
குறித்த வழக்கில் எராவ்வலாகே சமந்த பிரசாத் பெர்னாண்டோ என்பவர் தாக்கல் செய்த மேன்முறையீட்டு மனுவை நிராகரித்து, நீதியரசர்களான பிரதீப் ஹெட்டியாராச்சி மற்றும் பி. குமாரரத்னம் ஆகியோர் கடந்த நவம்பர் 13ஆம் திகதி இந்தத் தீர்ப்பை வழங்கினர்.
நீதிமன்ற ஆவணங்களின்படி, 2013ஆம் ஆண்டு மார்ச் 31ஆம் திகதி பிலியந்தலை பகுதியில் தனியார் வகுப்புக்குச் சென்றுவிட்டு வீடு திரும்பிக் கொண்டிருந்த 17 வயது சிறுவனை குறித்த நபர் அணுகியுள்ளார்.
தான் அந்தச் சிறுவன் கல்வி கற்கும் நிறுவனத்தில் ஆசிரியராகப் பணியாற்றுவதாக அறிமுகப்படுத்திக்கொண்ட அவர், மோட்டார் சைக்கிளில் வீட்டிற்கு அழைத்துச் செல்வதாகக் கூறியுள்ளார்.
எனினும், சிறுவனை அவரது வீட்டிற்கு அருகில் இறக்கிவிடுவதற்குப் பதிலாக, தனது வீட்டிற்கு அழைத்துச் சென்று அங்கு பாலியல் துஷ்பிரயோகத்தில் ஈடுபட்டுள்ளார்.
இதனைத் தொடர்ந்து, சிறுவன் முதலில் தொடர்பாடல் நிலையம் ஒன்றில் இருந்த நபரிடம் சம்பவம் குறித்து தெரிவித்துள்ளார். பின்னர் தனது தந்தையிடம் சம்பவத்தை எடுத்துக்கூறியதை அடுத்து, அவர் பொலிஸில் முறைப்பாடு செய்துள்ளார்.
இந்த வழக்கை விசாரித்த ஹோமாகம மேல் நீதிமன்றம், குறித்த நபரை கடுமையான பாலியல் துஷ்பிரயோகக் குற்றத்தில் குற்றவாளியாகக் கண்டறிந்து ஏழு ஆண்டுகள் கடூழிய சிறைத்தண்டனை விதித்தது.
அத்துடன், 5,000 ரூபாய் அபராதமும், பாதிக்கப்பட்ட சிறுவனுக்கு 25,000 ரூபாய் இழப்பீடு வழங்கவும் உத்தரவிட்டிருந்தது.
எனினும், மேன்முறையீட்டு மனுவில், சிறுவனின் சம்மதத்துடனேயே பாலியல் செயற்பாடு இடம்பெற்றதாகக் குற்றஞ்சாட்டிய பிரதிவாதி, சிறுவனின் சாட்சியத்தின் நம்பகத்தன்மையையும் கேள்விக்குட்படுத்தியிருந்தார்.
இந்த வாதத்தை நிராகரித்த மேன்முறையீட்டு நீதிமன்றம், குறித்த செயலுக்கு தான் சம்மதம் தெரிவிக்கவில்லை என சிறுவன் நீதிமன்றத்தில் தெளிவாகச் சாட்சியமளித்திருந்ததைச் சுட்டிக்காட்டியது.
மேலும், பிரதிவாதியின் வீட்டிற்கு அழைத்துச் செல்லப்பட்ட சூழ்நிலை மற்றும் அச்சம் காரணமாக அங்கிருந்து தப்பிக்கவோ அல்லது உதவிக்காகக் கூச்சலிடவோ முடியாமல் போனதாக சிறுவன் தெரிவித்திருந்த விளக்கத்தையும் நீதிமன்றம் கவனத்தில் கொண்டது.
சம்பவம் தொடர்பில் சிறுவன் உடனடியாகத் தனது தந்தையிடம் தெரிவித்தமை மற்றும் அதனைத் தொடர்ந்து பொலிஸில் முறைப்பாடு செய்யப்பட்டமை ஆகியன அவரது சாட்சியத்தை உறுதிப்படுத்துவதாகவும் நீதியரசர்கள் குறிப்பிட்டனர்.
சிறுவனின் சாட்சியத்தில் காணப்பட்ட சிறிய முரண்பாடுகள் வழக்கின் அடிப்படைத் தன்மையைப் பாதிக்கவில்லை என்றும் நீதிமன்றம் தெரிவித்தது.
இதன்படி, 2025ஆம் ஆண்டு ஒக்டோபர் 29ஆம் திகதி ஹோமாகம மேல் நீதிமன்றத்தால் வழங்கப்பட்ட குற்றத்தீர்ப்பு மற்றும் தண்டனையை உறுதி செய்த மேன்முறையீட்டு நீதிமன்றம், பிரதிவாதியின் மேன்முறையீட்டை நிராகரித்தது.
மேலும், சிறைத்தண்டனையை குற்றவாளியாகத் தீர்ப்பளிக்கப்பட்ட திகதியிலிருந்து நடைமுறைப்படுத்துமாறும் நீதிமன்றம் உத்தரவிட்டுள்ளது.