சமூக ஊடகங்களால் ஜனநாயகத்திற்கு ஆபத்து: ஆய்வில் தகவல்!

சமூக ஊடகத் தளங்கள் மனிதர்களை தவறான வழியில் நடத்தி, மக்களிடையே பிரிவினையை ஏற்படுத்தி, ஜனநாயக அமைப்பிற்கே பெரும் அச்சுறுத்தலாக உருவெடுத்துள்ளதாக Pew ஆராய்ச்சி மையம் நடத்திய புதிய ஆய்வில் தெரியவந்துள்ளது. உலகளவில் சமூக ஊடகங்கள் மீதான கவலைகளும் கண்காணிப்புகளும் அதிகரித்து வரும் நிலையிலேயே இந்த ஆய்வு முடிவுகள் வெளியாகியுள்ளன.

மெட்டா (Meta), ஸ்னாப் (Snap) மற்றும் டிக்டொக் (TikTok) போன்ற முன்னணி சமூக ஊடக நிறுவனங்கள், பயனர்களுக்குப் பாதிப்பை ஏற்படுத்தியதாகக் கூறி ஆயிரக்கணக்கான வழக்குகளையும், நஷ்டஈடுகளையும் எதிர்கொண்டு வருகின்றன. இதனிடையே, தமது குடிமக்களின் தரவுப் பாதுகாப்பை (Privacy) உறுதி செய்வதற்கான உறுதியான வழிகளை உலக நாடுகளின் அரசாங்கங்கள் தீவிரமாக ஆராய்ந்து வருகின்றன.

குறிப்பாக, 16 வயதிற்கு உட்பட்ட சிறுவர்களுக்கு சமூக ஊடகங்களைப் பயன்படுத்தத் தடை விதித்த உலகின் முதல் நாடான ஆஸ்திரேலியா, பயனர்கள் செயற்கை நுண்ணறிவு வழிமுறைகளின் (Algorithm) அடிப்படையிலான பரிந்துரைகளைத் தவிர்க்கும் வகையிலான புதிய விதிகளையும் முன்மொழிந்துள்ளது. சிறுவர்களுக்கான சமூக ஊடகத் தடையை அரசாங்கம் அமல்படுத்தியதற்கு 82 சதவீத ஆஸ்திரேலியப் பெரியவர்கள் ஆதரவு தெரிவித்துள்ளதாக இந்த ஆய்வு சுட்டிக்காட்டுகிறது.

சமூக ஊடகங்கள் மக்களுக்குத் தகவல்களை வழங்குவதோடு, அரசியல் கருத்துக்களை வெளிப்படுத்த குரல் கொடுக்கின்றன எனப் பெரும்பாலானோர் ஒப்புக்கொண்ட போதிலும், 2022 ஆம் ஆண்டுடன் ஒப்பிடுகையில் சமூக ஊடகங்களை ஒரு "மோசமான விஷயம்" எனப் பார்க்கும் மக்களின் எண்ணிக்கை பெருமளவில் அதிகரித்துள்ளது.

கானா (Ghana), கென்யா (Kenya) மற்றும் நைஜீரியா (Nigeria) போன்ற குறைந்த தலா மொத்த உள்நாட்டு உற்பத்தி (GDP per capita) கொண்ட நாடுகளுடன் ஒப்பிடுகையில், அமெரிக்கா (US), கனடா (Canada) மற்றும் பிரிட்டன் (UK) போன்ற பணக்கார நாடுகளைச் சேர்ந்த மக்களே சமூக ஊடகங்கள் ஜனநாயகத்தைச் சீர்குலைப்பதாக அதிகம் நம்புகின்றனர்.

இதில் அமெரிக்க மக்கள் மிகவும் தீவிரமான சந்தேகப் பார்வையைக் கொண்டுள்ளனர். அங்குள்ள பெரியவர்களில் 64 சதவீதத்தினர் சமூக ஊடகங்களால் ஜனநாயகம் பாதிக்கப்படுவதாகத் தெரிவித்துள்ளனர். அத்துடன், பழைய தரவுகள் கிடைக்கப் பெற்ற 26 நாடுகளில், 16 நாடுகளில் சமூக ஊடகங்கள் ஜனநாயகத்திற்குப் பாதகமானவை எனக் கருதும் மக்களின் எண்ணிக்கை கணிசமாக உயர்ந்துள்ளது.

37 நாடுகளில் 45,000 க்கும் மேற்பட்ட மக்களிடம் ஆய்வு நடத்தப்பட்டதாகவும், அமெரிக்காவில் சமூக ஊடகப் பயன்பாடு குறித்து மேலதிகமாக 5,511 பெரியவர்களிடம் கருத்துக்கணிப்பு நடத்தப்பட்டதாகவும் Pew ஆராய்ச்சி மையம் தெரிவித்துள்ளது.