குற்றப் பின்னணியில் உருவாகும் த்ரில்லர் படத்தில் பிரேம்ஜி அமரன்!
நடிகர் பிரேம்ஜி அமரன் முதன்மை கதாபாத்திரத்தில் நடிக்கும் புதிய குற்றத் த்ரில்லர் திரைப்படத்தை இயக்குநர் சி. கணேஷ்குமார் இயக்கி வருகிறார்.
‘வல்லமை’, ‘நரி வேட்டை’ உள்ளிட்ட பல திரைப்படங்களில் படத்தொகுப்பாளராகப் பணியாற்றியுள்ள சி. கணேஷ்குமார், இப்படத்தின் மூலம் இயக்குநராகப் புதிய முயற்சியில் இறங்கியுள்ளார். அபிராமி புரொடக்ஷன்ஸ் சார்பில் லாவண்யா அபிராமி இப்படத்தைத் தயாரிக்கிறார்.
இத்திரைப்படத்தில் போஸ் வெங்கட், சஸ்திக், நயனா சாய் உள்ளிட்டோர் முக்கிய கதாபாத்திரங்களில் நடிக்கின்றனர். சிற்பி குமார் ஒளிப்பதிவுப் பணிகளை மேற்கொள்கிறார்.
இப்படம் குறித்து இயக்குநர் சி. கணேஷ்குமார் தெரிவிக்கையில், இளம் பெண் ஒருவர் கொலை செய்யப்படுவதும், அந்தக் கொலையைச் செய்தது யார் என்பதைச் சுற்றியுமே திரைப்படத்தின் கதை நகர்வதாகக் குறிப்பிட்டார்.
மேலும், இப்படத்தில் முதன்மைக் கதாபாத்திரத்தில் நடிக்கும் பிரேம்ஜி அமரன், இசையமைப்புப் பணிகளையும் மேற்கொள்கிறார். தொடக்கம் முதல் இறுதிவரை பார்வையாளர்களை இருக்கையின் நுனியில் அமர வைக்கும் வகையில் விறுவிறுப்பான காட்சிகளுடன் திரைப்படம் உருவாகி வருவதாகவும் அவர் தெரிவித்தார்.
தற்போது படத்தின் படப்பிடிப்புப் பணிகள் நிறைவடைந்துள்ள நிலையில், போஸ்ட் புரொடக்ஷன் பணிகள் விரைவில் ஆரம்பமாகவுள்ளன.
