கமல்ஹாசன் தயாரிப்பில் உருவாகும் ‘தர்மன்’ – ரஜினிகாந்துடன் மீண்டும் இணையும் நயன்தாரா!
நடிகர் ரஜினிகாந்த் நடிப்பில் உருவாகிவரும் புதிய தமிழ்த் திரைப்படமான ‘தர்மன்’ படத்தில் நடிகை நயன்தாரா இணைந்துள்ளதாகப் படக்குழு அதிகாரபூர்வமாக அறிவித்துள்ளது.
அஷ்வத் மாரிமுத்து இயக்கும் இத்திரைப்படத்தை, நடிகர் கமல்ஹாசனின் ராஜ் கமல் ஃபிலிம்ஸ் இன்டர்நேஷனல் நிறுவனம் தயாரிக்கிறது. இத்திரைப்படத்தில் நயன்தாரா இணைந்துள்ளமை தொடர்பான அறிவிப்பு ஒக்டோபர் 26ஆம் திகதி வெளியிடப்பட்டது.
இதன் மூலம் ரஜினிகாந்த் – நயன்தாரா கூட்டணி மீண்டும் இணைகிறது. ஏற்கனவே ‘சந்திரமுகி’, ‘குசேலன்’, ‘தர்பார்’, ‘அண்ணாத்த’ ஆகிய திரைப்படங்களில் இருவரும் இணைந்து நடித்துள்ளனர்.
‘ஓ மை கடவுளே’, ‘டிராகன்’ ஆகிய திரைப்படங்களை இயக்கிய அஷ்வத் மாரிமுத்து, ‘தர்மன்’ திரைப்படத்தை இயக்குகிறார். இத்திரைப்படத்தில் சிம்ரன், ராஷி கண்ணா, யோகி பாபு உள்ளிட்டோரும் முக்கிய கதாபாத்திரங்களில் நடிக்கின்றனர்.
இத்திரைப்படத்திற்கு அனிருத் ரவிச்சந்தர் இசையமைக்கிறார். ஒளிப்பதிவுப் பணிகளை நிகேத் பொம்மி மேற்கொள்ளும் நிலையில், படத்தொகுப்புப் பணிகளை பிரதீப் ஈ. ராகவ் கவனிக்கிறார்.
நயன்தாரா இத்திரைப்படத்தில் ஏற்று நடிக்கும் கதாபாத்திரம் மற்றும் படத்தின் கதைக்களம் தொடர்பான மேலதிக தகவல்கள் இதுவரை வெளியிடப்படவில்லை.
இதற்கிடையில், ரஜினிகாந்தும் கமல்ஹாசனும் இயக்குநர் நெல்சன் திலீப்குமார் இயக்கத்தில் உருவாகவுள்ள மற்றுமொரு திரைப்படத்திலும் இணைந்து நடிக்கவுள்ளனர். இதனால், நீண்டகாலமாக இருவரையும் ஒன்றாகத் திரையில் காண எதிர்பார்த்திருக்கும் ரசிகர்கள் மத்தியில் இந்தப் படம் குறித்த எதிர்பார்ப்பும் அதிகரித்துள்ளது.
நயன்தாரா இறுதியாக ‘ஹாய்’ திரைப்படத்தில் நடித்திருந்தார். அவர் நடிப்பில் உருவாகியுள்ள ‘மூக்குத்தி அம்மன் 2’ திரைப்படம் தீபாவளியை முன்னிட்டு திரையரங்குகளில் வெளியாகவுள்ளது.
