இஸ்ரேல் தேர்தலில் நெதன்யாகுவின் கூட்டணி முன்னிலை; ஆட்சியமைக்கத் தேவையான பெரும்பான்மை இல்லை!

இஸ்ரேலில் நடைபெற்ற பொதுத் தேர்தலில் பிரதமர் பெஞ்சமின் நெதன்யாகுவின் தலைமையிலான கூட்டணி முன்னிலை பெற்றுள்ள போதிலும், ஆட்சியமைப்பதற்குத் தேவையான பெரும்பான்மையைப் பெறத் தவறியுள்ளது. வெள்ளிக்கிழமை (ஒக்டோபர் 30) வெளியிடப்பட்ட இறுதி தேர்தல் முடிவுகளின்படி, அடுத்த அரசாங்கத்தை அமைப்பதில் கட்சிகளுக்கு இடையிலான கூட்டணிப் பேச்சுவார்த்தைகள் முக்கியத்துவம் பெற்றுள்ளன. பேச்சுவார்த்தைகள் தோல்வியடைந்தால் மீண்டும் தேர்தல் நடத்தப்படக்கூடிய சூழலும் உருவாகியுள்ளது.

இஸ்ரேலிய நாடாளுமன்றமான நெசெட்டில் மொத்தம் 120 ஆசனங்கள் உள்ள நிலையில், நெதன்யாகுவின் வலதுசாரி மற்றும் தீவிர வலதுசாரிக் கட்சிகள் அடங்கிய கூட்டணி 53 ஆசனங்களைக் கைப்பற்றியுள்ளது. அவரது லிகுட் கட்சி 27 ஆசனங்களைப் பெற்று, நாடாளுமன்றத்தின் மிகப்பெரிய தனிக் கட்சியாகத் திகழ்கிறது.

மத்தியவாதத் தலைவரான காடி ஐசன்கொட் தலைமையிலான எதிர்க்கட்சிக் கூட்டணி 48 ஆசனங்களைப் பெற்றுள்ளது.

அதேவேளை, அரபுக் கட்சிகளான ராம் (Ra'am) மற்றும் கூட்டுப் பட்டியல் (Joint List) ஆகியவை இணைந்து 19 ஆசனங்களைக் கைப்பற்றியுள்ளன. இதன்மூலம், அடுத்த அரசாங்கத்தை அமைப்பதில் இக்கட்சிகள் தீர்மானிக்கும் சக்திகளாக உருவெடுத்துள்ளன.

அரசாங்கம் அமைப்பதற்குத் தேவையான 61 ஆசனங்களை எந்தவொரு கூட்டணியும் தனித்துப் பெறாத நிலையில், பல வாரங்கள் நீடிக்கக்கூடிய கடினமான அரசியல் பேச்சுவார்த்தைகளுக்கு வழி ஏற்பட்டுள்ளது.

அரபுக் கட்சிகள் மீது நிதி மோசடி குற்றச்சாட்டு

தேர்தல் முடிவுகள் வெளியாகும் முன்னதாக, இஸ்ரேலிய அரபுக் குழுக்களுக்கு வெளிநாடுகளிலிருந்து நிதி வழங்கப்பட்டு, தேர்தலில் செல்வாக்குச் செலுத்த முயற்சிகள் மேற்கொள்ளப்பட்டதாக நெதன்யாகுவின் ஆதரவாளர்கள் குற்றச்சாட்டுகளை முன்வைத்திருந்தனர். எனினும், இந்தக் குற்றச்சாட்டுகளுக்கு இதுவரை அரசாங்க அதிகாரிகள் ஆதாரங்களை வெளியிடவில்லை.

குறிப்பாக, கத்தாரிடமிருந்து ராம் கட்சி நிதியைப் பெற்று, வாக்காளர்களுக்குப் பணம் வழங்கும் நடவடிக்கைகளில் ஈடுபட்டதாகக் குற்றஞ்சாட்டப்பட்டது. ஹமாஸ் அமைப்புடன் தொடர்புகளைப் பேணும் கத்தார், இஸ்ரேலிய அரசியலில் தலையிட முயன்றதாகவும் குற்றச்சாட்டுகள் முன்வைக்கப்பட்டன.

இந்த விவகாரத்தைத் தொடர்ந்து, லிகுட் கட்சி வெளியிட்ட அறிக்கையில், தேர்தல் மோசடி இடம்பெற்றுள்ளதாகக் குற்றஞ்சாட்டியதுடன், இந்த விவகாரத்தை அரசியல் பூகம்பம் எனவும் வர்ணித்தது.

எனினும், ராம் கட்சியின் தலைவர் மன்சூர் அப்பாஸ் குற்றச்சாட்டுகளை நிராகரித்ததுடன், விசாரணைகளை வரவேற்றுள்ளார்.

மறுபுறம், கூட்டுப் பட்டியல் கட்சி, அரபு வாக்காளர்களின் அரசியல் செல்வாக்கு அதிகரிப்பதைக் கண்டு அச்சமடைந்துள்ள நெதன்யாகுவும் அவரது ஆதரவாளர்களும் தூண்டுதல் பிரசாரத்தில் ஈடுபடுவதாகக் குற்றஞ்சாட்டியுள்ளது.

விசாரணை நடத்தும் ஷின் பெத்

தேர்தலில் முறைகேடுகள் இடம்பெற்றிருக்கலாம் என்ற சந்தேகத்தின் அடிப்படையில், இஸ்ரேலின் உள்நாட்டுப் பாதுகாப்புப் பிரிவான ஷின் பெத் விசாரணைகளை ஆரம்பித்துள்ளது.

எனினும், ஜனநாயக மற்றும் சட்டபூர்வமான முறையில் வாக்களித்த ஒட்டுமொத்த சமூகத்தையும் சந்தேகத்திற்கு உட்படுத்துவதோ அல்லது குற்றஞ்சாட்டுவதோ விசாரணையின் நோக்கமல்ல என அந்த அமைப்பு வலியுறுத்தியுள்ளது.

இதேவேளை, தேர்தல் ஆணைக்குழுவின் பதில் பணிப்பாளர் நாயகம் டீன் லிவ்னே, தேர்தலில் பரவலான முறைகேடுகள் இடம்பெற்றதாக முன்வைக்கப்படும் கருத்துக்கள் முற்றிலும் ஆதாரமற்றவை எனத் தெரிவித்துள்ளார்.

எதிர்க்கட்சித் தலைவர்கள், ஆட்சியமைப்பதற்கான பெரும்பான்மையைப் பெறத் தவறிய நெதன்யாகு, தேர்தல் முடிவுகள் தொடர்பில் மக்களிடையே சந்தேகத்தை ஏற்படுத்த முயற்சிப்பதாகக் குற்றஞ்சாட்டியுள்ளனர்.

இடதுசாரித் தலைவரான யாயிர் கோலான், தேர்தல் முடிவுகளைச் சவாலுக்கு உட்படுத்த நெதன்யாகு முயற்சிப்பதாகத் தெரிவித்துள்ளார்.

எதிர்க்கட்சித் தலைவர் காடி ஐசன்கொட், ஷின் பெத் மற்றும் தேர்தல் ஆணைக்குழுவிடமிருந்து விளக்கங்களைப் பெற்றுள்ளதாகக் குறிப்பிட்டுள்ளார். என்ன நடந்தது, உண்மையில் ஏதேனும் முறைகேடு இடம்பெற்றதா என்பதைத் தீர்மானிப்பதற்கு இன்னும் கால அவகாசம் தேவைப்படுவதாகவும் அவர் தெரிவித்துள்ளார்.

அதேவேளை, தேர்தல் முடிவுகளின் நம்பகத்தன்மையைச் சீர்குலைக்கும் நோக்கில் லிகுட் கட்சியும் நெதன்யாகுவும் ஒருங்கிணைந்த பிரசாரத்தை முன்னெடுத்துள்ளதாகவும் அவர் குற்றஞ்சாட்டியுள்ளார்.

குற்றச்சாட்டுகளை நிராகரித்த கத்தார்

இந்தத் தேர்தல் விவகாரம் தொடர்பான குற்றச்சாட்டுகளை கத்தார் நிராகரித்துள்ளது. அவை அபத்தமானவை மற்றும் ஆபத்தானவை என அந்நாடு தெரிவித்துள்ளது.

கடந்த ஆண்டு நெதன்யாகுவின் இரண்டு உதவியாளர்கள் கத்தாரிடமிருந்து பணம் பெற்றதாகக் கூறப்படும் குற்றச்சாட்டுகளின் அடிப்படையில் கைது செய்யப்பட்டதைத் தொடர்ந்து, அவருக்கும் கத்தாருக்கும் இடையிலான தொடர்புகள் குறித்த சர்ச்சைகள் மீண்டும் எழுந்துள்ளன.

இஸ்ரேலின் நீண்டகாலம் பதவி வகித்த பிரதமரான நெதன்யாகு, காஸாவில் நிலைத்தன்மையைப் பேணும் நோக்கில் கத்தார் ஹமாஸ் அமைப்புக்கு நிதியுதவி வழங்குவதை முன்னர் மறைமுகமாக ஆதரித்திருந்தார்.

எனினும், 2023 ஒக்டோபர் 7ஆம் திகதி இடம்பெற்ற ஹமாஸின் தாக்குதலுக்குப் பின்னர் அந்த அணுகுமுறை கடுமையான சவால்களை எதிர்கொண்டது.

தற்போதைய தேர்தல் முடிவுகளால் எந்தவொரு கூட்டணிக்கும் தெளிவான பெரும்பான்மை கிடைக்காத நிலையில், இஸ்ரேலில் அடுத்த அரசாங்கத்தை அமைப்பதற்கான பேச்சுவார்த்தைகளும், அதில் அரபுக் கட்சிகள் வகிக்கக்கூடிய தீர்மானகரமான பங்கும் அரசியல் ரீதியாக முக்கியத்துவம் பெற்றுள்ளன.