ஸ்பெயின் ரயில் விபத்தில் உயிரிழப்பு 69 ஆக அதிகரிப்பு!

ஸ்பெயினில் இரண்டு அதிவேக ரயில்கள் மோதிய கோர விபத்தில் உயிரிழந்தவர்களின் எண்ணிக்கை 69 ஆக அதிகரித்துள்ளது. நேற்று 50 பேர் உயிரிழந்ததாகத் தகவல்கள் வெளியாகியிருந்த நிலையில், தொடர்ந்து முன்னெடுக்கப்பட்ட மீட்புப் பணிகளின்போது மேலும் சடலங்கள் மீட்கப்பட்டதைத் தொடர்ந்து உயிரிழப்பு எண்ணிக்கை அதிகரித்துள்ளது.

மத்திய ஸ்பெயினின் டோலிடோ மாகாணத்தில் உள்ள உர்டா (Urda) பகுதிக்கு அருகில் புதன்கிழமை இடம்பெற்ற இந்த விபத்தில், ஒரு ரயில் மற்றொரு ரயிலின் பின்புறத்தில் மோதியதாகத் தெரிவிக்கப்பட்டுள்ளது.

விபத்து இடம்பெற்ற பகுதியில் வியாழக்கிழமையும் மீட்புப் பணிகள் தொடர்ந்து முன்னெடுக்கப்பட்டன. மோப்ப நாய்களின் உதவியுடன் தேடுதல் நடவடிக்கைகள் மேற்கொள்ளப்பட்டதுடன், விபத்தில் சேதமடைந்த ரயில் பெட்டிகளை அகற்றுவதற்குப் பாரிய கிரேன்களும் பயன்படுத்தப்பட்டன.

காஸ்டில்லா லா மஞ்சா பிராந்தியத் தலைவர் எமிலியானோ கார்சியா-பேஜ், உயிரிழந்தவர்களின் எண்ணிக்கை 69 ஆக அதிகரித்துள்ளதாகத் தெரிவித்துள்ளார்.

50 பேர் தொடர்ந்தும் வைத்தியசாலையில்

விபத்தில் காயமடைந்து வைத்தியசாலைகளில் அனுமதிக்கப்பட்ட 110 பேரில் 60 பேர் சிகிச்சையின் பின்னர் வீடு திரும்பியுள்ளனர். மேலும் 50 பேர் தொடர்ந்தும் வைத்தியசாலைகளில் சிகிச்சை பெற்று வருவதாக அதிகாரிகள் தெரிவித்துள்ளனர்.

தீவிர சிகிச்சைப் பிரிவில் உள்ள 15 பேரில் நால்வரின் உடல்நிலையில் முன்னேற்றம் ஏற்பட்டுள்ளதாகவும் தெரிவிக்கப்பட்டுள்ளது.

இதற்கிடையில், காணாமல் போன தமது உறவினர்களைத் தேடி பலர் வைத்தியசாலைகளிலும் அவசர உதவி மையங்களிலும் காத்திருப்பதாகத் தகவல்கள் தெரிவிக்கின்றன.

மூன்று நாட்கள் தேசிய துக்க தினம்

இந்தக் கோர விபத்தைத் தொடர்ந்து ஸ்பெயின் அரசாங்கம் மூன்று நாட்கள் தேசிய துக்க தினமாக அறிவித்துள்ளது.

விபத்தில் உயிரிழந்தவர்களுக்கு அஞ்சலி செலுத்தும் வகையில் நாடாளுமன்ற உறுப்பினர்கள், ரயில்வே ஊழியர்கள் மற்றும் தொழிற்சங்கப் பிரதிநிதிகள் உள்ளிட்டோர் ஒரு நிமிட மௌன அஞ்சலி செலுத்தியுள்ளனர்.

ஸ்பெயின் பிரதமர் பெட்ரோ சான்செஸ், விபத்து தொடர்பில் முழுமையான விசாரணை நடத்தப்படும் என்றும், பாதிக்கப்பட்ட குடும்பங்களுக்கு அரசாங்கம் ஆதரவளிக்கும் என்றும் உறுதியளித்துள்ளார்.

இந்த ஆண்டில் இரண்டாவது பாரிய விபத்து

ஸ்பெயினில் இந்த ஆண்டில் இடம்பெற்ற இரண்டாவது பாரிய அதிவேக ரயில் விபத்து இதுவாகும்.

கடந்த ஜனவரி மாதம் தெற்கு ஸ்பெயினில் இடம்பெற்ற மற்றொரு ரயில் விபத்தில் 46 பேர் உயிரிழந்திருந்தனர். இந்நிலையில், ஒரே ஆண்டில் இரண்டு பாரிய ரயில் விபத்துகள் இடம்பெற்றுள்ளமை அந்நாட்டின் ரயில் போக்குவரத்துப் பாதுகாப்பு குறித்து புதிய கேள்விகளை எழுப்பியுள்ளது.

மட்ரிட் மற்றும் செவில்லா நகரங்களை இணைக்கும் அதிவேக ரயில் பாதையிலேயே இந்த ஆண்டின் இரண்டு விபத்துகளும் இடம்பெற்றுள்ளன.

விபத்துக்கான காரணங்கள் குறித்து விசாரணைகள் முன்னெடுக்கப்பட்டு வரும் நிலையில், ரயில் பாதுகாப்பு நடைமுறைகளை வலுப்படுத்த வேண்டியதன் அவசியம் குறித்தும் கவனம் செலுத்தப்பட்டுள்ளது.