இலங்கை - தாய்லாந்து இடையே விசா இல்லாத பயண ஒப்பந்தத்திற்கு அமைச்சரவை அனுமதி

இலங்கை மற்றும் தாய்லாந்து ஆகிய இரு நாடுகளுக்கும் இடையே சாதாரண கடவுச்சீட்டு வைத்துள்ளவர்கள் விசா இன்றி பயணம் செய்வதற்கான ஒப்பந்தத்தில் கையெழுத்திட அமைச்சரவை ஒப்புதல் அளித்துள்ளது.

முன்மொழியப்பட்டுள்ள இந்த ஒப்பந்தத்தின் கீழ், செல்லுபடியாகும் சாதாரண கடவுச்சீட்டுகளைக் கொண்ட இலங்கை மற்றும் தாய்லாந்து குடிமக்கள் சாதாரண பயண நோக்கங்களுக்காக விசா பெறாமல் இரு நாடுகளுக்குள்ளும் நுழையவும், வெளியேறவும் மற்றும் ஊடறுத்துச் செல்லவும் அனுமதிக்கப்படுவர்.

இதன்படி, பயணிகள் ஒருமுறை விஜயம் செய்யும் போது அதிகபட்சமாக 30 நாட்கள் வரை தங்குவதற்கு அனுமதிக்கப்படுவதுடன், ஏதேனும் 180 நாட்கள் கொண்ட காலப்பகுதிக்குள் மொத்தமாக தங்கும் காலம் 90 நாட்களாக வரம்பிடப்படும் .

எனினும், வேலைவாய்ப்பு, கல்வி, ஊடக செயற்பாடுகள் அல்லது முன்அனுமதி தேவைப்படும் பிற நோக்கங்களுக்காக பயணம் செய்பவர்களுக்கு இந்த விசா விலக்கு பொருந்தாது என தெரிவிக்கப்பட்டுள்ளது.

இலங்கைக்கும் தாய்லாந்திற்கும் இடையிலான நட்பு உறவுகளை மேலும் வலுப்படுத்துவதுடன், இரு நாடுகளுக்கும் இடையிலான பயணங்களை இலகுபடுத்துவதையும் இந்த ஒப்பந்தம் நோக்கமாகக் கொண்டுள்ளது.

பொது பாதுகாப்பு மற்றும் பாராளுமன்ற விவகாரங்கள் அமைச்சரினால் சமர்ப்பிக்கப்பட்ட இந்த விசா விலக்கு ஒப்பந்தத்தில் கையெழுத்திடுவதற்கான முன்மொழிவுக்கே அமைச்சரவை இவ்வாறு அனுமதி வழங்கியுள்ளது.