இலங்கையில் 10 நவீன நஞ்சற்ற பழ பழுக்க வைக்கும் அறைகள் உருவாக்கம்
இலங்கையில் பழங்களை பழுக்க வைப்பதற்காகப் பயன்படுத்தப்படும் ஆபத்தான இரசாயன முறைகளைத் தவிர்த்து, பாதுகாப்பான வழிமுறைகளை ஊக்குவிக்கும் வகையில் நடப்பு ஆண்டில் 10 நவீன பழம் பழுக்க வைக்கும் அறைகளை அமைக்கத் திட்டமிடப்பட்டுள்ளது.
அறுவடைக்குப் பிந்தைய தொழில்நுட்ப மேலாண்மை நிறுவனத்தினால் உருவாக்கப்படும் இந்த நவீன வசதிகள், நாட்டின் பெருமளவிலான பழ உற்பத்தியாளர்களுக்குக் கிடைக்கப்பெறும் என அறிவிக்கப்பட்டுள்ளது.
தீங்கு விளைவிக்கும் இரசாயனப் பொருட்களைச் சார்ந்திருக்காமல், நவீன மற்றும் அறிவியல் ரீதியாக அங்கீகரிக்கப்பட்ட பழம் பழுக்க வைக்கும் முறைகளைப் பயன்படுத்துவதை ஊக்குவிப்பதே இதன் முக்கிய நோக்கமாகும் என வர்த்தக, வாணிப, உணவுப் பாதுகாப்பு மற்றும் கூட்டுறவு அபிவிருத்தி அமைச்சு தெரிவித்துள்ளது.
இது தொடர்பில் கருத்துத் தெரிவித்துள்ள அறுவடைக்குப் பிந்தைய தொழில்நுட்ப மேலாண்மை நிறுவனத்தின் தலைவர் பேராசிரியர் ரோஹித பிரசாந்த, நவீன பழம் பழுக்க வைக்கும் முறைகளை மேற்கொள்வதற்குத் தேவையான தொழில்நுட்பம் மற்றும் பயிற்சிகள் வணிக நிறுவனங்களுக்கும் வழங்கப்படும் எனக் குறிப்பிட்டுள்ளார்.
பாரம்பரிய பழுக்க வைக்கும் முறைகளுக்கு அப்பால் சென்று, இயற்கை மற்றும் அறிவியல் முறைகளை அறிமுகப்படுத்துவதன் மூலம் உள்ளூர் சந்தையில் பாதுகாப்பான, உயர்தர பழங்கள் கிடைப்பதை இந்தத் திட்டம் உறுதி செய்யும் என்றும் அவர் மேலும் தெரிவித்தார்.
செயற்கையாகப் பழங்களை பழுக்க வைப்பதில் பயன்படுத்தப்படும் தீங்கு விளைவிக்கும் இரசாயனங்களால் ஏற்படும் சுகாதார அபாயங்களைக் குறைப்பதற்கும், பழங்களின் பாதுகாப்பை மேம்படுத்துவதற்குமான பரந்த முயற்சியின் ஒரு பகுதியாக இத்திட்டம் முன்னெடுக்கப்படுகின்றது.
‘சிறுவர்களுக்கு நஞ்சற்ற பழங்கள்’ தேசிய திட்டம் தொடக்கம்
இதனிடையே, உலகச் சிறுவர் தினத்தை முன்னிட்டு ‘சிறுவர்களுக்கு நஞ்சற்ற பழங்கள்’ எனும் தேசிய வேலைத்திட்டம் நேற்றுமுன்தினம் வியாழக்கிழமை (01) ஆரம்பித்து வைக்கப்பட்டது.
வர்த்தக, வாணிப, உணவுப் பாதுகாப்பு மற்றும் கூட்டுறவு அபிவிருத்தி அமைச்சர் வசந்த சமரசிங்கவின் தலைமையில் அமைச்சு கேட்போர் கூடத்தில் இந்நிகழ்வு நடைபெற்றது.
தீங்கு விளைவிக்கும் இரசாயனங்கள் மூலம் பழங்களை பழுக்க வைக்கும் முறைகளைத் தடுத்து, பொதுமக்களின், குறிப்பாகச் சிறுவர்களின் ஆரோக்கியத்தைப் பாதுகாப்பதையும், நுகர்வோருக்கு உயர்தரமான மற்றும் பாதுகாப்பான பழங்கள் கிடைப்பதை உறுதி செய்வதையும் இத்தேசிய திட்டம் நோக்கமாகக் கொண்டுள்ளது.
