பேராதனை கருப்பு பாலத்திற்கு இணையாக புதிய புகையிரதப் பாலம்: அமைச்சர் பிமல் ரத்நாயக்க
பேராதனை 'களு பாலம்' (கருப்புப் பாலம்) எனப்படும் புகையிரதப் பாலத்திற்குப் சமாந்தரமாக, புதிய புகையிரதப் பாலமொன்று நிர்மாணிக்கப்படவுள்ளதாக போக்குவரத்து, நெடுஞ்சாலைகள் மற்றும் நகர அபிவிருத்தி அமைச்சர் பிமல் ரத்நாயக்க தெரிவித்துள்ளார்.
இப்புதிய பாலத்திற்கான அபிவிருத்தித் திட்டங்களும் கட்டமைப்பு வடிவமைப்பு பணிகளும் தற்போது முன்னெடுக்கப்பட்டு வருவதாகவும் அமைச்சர் குறிப்பிட்டுள்ளார்.
கொழும்பு கோட்டையிலிருந்து விசேட புகையிரதத்தில் இன்று (02) பேராதனை புகையிரத நிலையத்தை வந்தடைந்த அமைச்சர், அங்கு மேற்கொண்ட கண்காணிப்பு விஜயத்தின் பின்னர் ஊடகங்களுக்குக் கருத்துத் தெரிவிக்கும்போதே இதனைத் தெரிவித்தார்.
அண்மையில் ஏற்பட்ட அனர்த்த நிலைமை காரணமாக, மலைநாட்டுப் புகையிரதப் பாதையின் ரம்புக்கனை முதல் பேராதனை வரையிலான புகையிரதப் போக்குவரத்து நடவடிக்கைகள் இடைநிறுத்தப்பட்டிருந்தன. சுமார் பத்து மாதகால இடைவெளிக்குப் பின்னர், குறித்த பாதை போக்குவரத்துக்காக இன்று மீண்டும் திறக்கப்பட்டது. இதன் ஆரம்பக் கட்ட பயணத்தைக் குறிக்கும் வகையில், கொழும்பு கோட்டையிலிருந்து விசேட புகையிரதம் மூலம் வருகை தந்த அமைச்சர், பேராதனை புகையிரத நிலையத்தை வந்தடைந்து நிலைமைகளை ஆராய்ந்தார்.
தற்போதுள்ள பேராதனை கருப்புப் பாலத்தின் பராமரிப்பு மற்றும் நிர்மாணப் பணிகள் வேகமாக நடைபெற்று வருவதாகக் குறிப்பிட்ட அமைச்சர், பல்வேறு காரணங்களால் இப்பணிகள் தாமதமடைந்த போதிலும், அவற்றை விரைவாக நிறைவு செய்வதற்குத் தேவையான நடவடிக்கைகள் எடுக்கப்பட்டுள்ளதாகவும் தெரிவித்தார்.
மேலும், புகையிரதத் திணைக்களத்தின் உள்கட்டமைப்பு வசதிகளை மேம்படுத்தவும், புகையிரதச் சேவைகளை விருத்தி செய்யவும், ஊழியர்களுக்கான அத்தியாவசிய வசதிகளை வழங்கவும் தேவையான நடவடிக்கைகள் ஆரம்பிக்கப்பட்டுள்ளதாக அவர் குறிப்பிட்டார்.
சமூக வலைத்தளங்களில் சிலரால் முன்வைக்கப்படும் விமர்சனங்கள் காரணமாகப் புகையிரத ஊழியர்கள் பெரும் மன உளைச்சலுக்கு உள்ளாகியிருப்பதாகச் சுட்டிக்காட்டிய அமைச்சர், விமர்சிப்பவர்கள் எதிர்பார்ப்பது போலப் புகையிரதப் பாதைகளின் நிர்மாணப் பணிகளை மிக விரைவாகச் செய்து முடித்துவிட முடியாது என்பதையும் சுட்டிக்காட்டினார்.
